Rwanda 2-0 Repubulika ya Centrafrique
Uko umukino uri kugenda
Umwanditsi |
: Habimana Sadi |
Amafoto |
: FERWAFA |
16:58
93' Umukino urarangiye
Umukino wa gicuti wahuzaga Ikipe y'Igihugu Amavubi na Centrafrique, urangiye Amavubi atsinze 2-0. Biteganyijwe ko uwo kwishyura uzakinwa ku wa Mbere tariki ya 07 Kamena 2021.
Mwakoze mwese twabanye kuri uyu mukino, mugire ibihe byiza!!!
Mwakoze mwese twabanye kuri uyu mukino, mugire ibihe byiza!!!
16:56
92' Centrafrique iri gushaka igitego cy'impozamarira
Amakipe yombi ari gukina asa n'acunga amazamu yayo. Gusa Centrafrique iri kunyuzamo igashaka kugabanya umubare w'ibitego bibiri yatsinzwe ariko abakinnyi b'Amavubi bakayibera ibamba.
16:54
90'+3 Hari gukinwa iminota y'inyongera
Iminota 90 y'umukino yarangiye, umusifuzi yerekanye iminota itatu y'inyongera. Amakipe yombi akomeje guhagarara neza aho u Rwanda ruri gushaka ikindi gitego mu gihe na Centrafrique iri gushaka impozamarira kuko izamu ryayo ryamaze kwinjiramo ibitego bibiri.
16:52
87' Koruneri y'Amavubi
Mu minota ya nyuma, abakinnyi b'Amavubi bayobowe na Ishimwe Blaise bari kotsa igitutu Centrafrique. Uyu musore ubyarwa na Mateso Jean de Dieu uzwi muri Rayon Sports, yahaye umupira mwiza Mugunga Yves agerageje gucenga, ba myugariro barawurenza ujya muri koruneri ariko yatewe ntiyabyara umusaruro.
16:49
85' Coup franc ya Centrafrique
Ruboneka Bosco akoreye ikosa Theodore, abasifuzi baha umupira Centrafrique, ariko bagerageje kuwutera uhita ufatwa na myugariro w'Amavubi Ngwabije Bryan.
16:47
83' Gusimbuza kw'Amavubi
Manishimwe Djabel asimbuwe na Ruboneka Bosco bakinana mu kipe imwe ya APR FC.
16:43
78' Amavubi akomeje gusatira
Mugunga Yves na Byiringiro Lague bakomeje kugora ba myugariro ba Centrafrique. Lague ahushije igitego ku mupira ateye mu izamu ufatwa neza n'umunyezamu Samolah Elvis.
16:39
75' Gusimbuza kw'Amavubi
Mugunga Yves asimbuye Tuyisenge Jacques. Aba ba rutahizamu bombi bakinira APR FC.
16:38
74' Coup franc y'Amavubi itewe nabi
Amavubi akomeje kotsa igitutu Centrafrique ndetse ari gukorerwaho amakosa ndetse yavuyemo Coup franc. Iri kosa ryatewe na Manishimwe Djabel ariko umupira awukubita mu rukuta, abakinnyi ba Centrafrique bahita bakiza izamu ryabo.
16:37
72' Ikarita y'umuhondo kuri Centrafrique
Theodore yeretswe ikarita y'umuhondo ku ikosa akoreye Ishimwe Blaise. Uyu mukinnyi wa Rayon Sports akomeje kugora abakinnyi ba Centrafrique kuva yakwinjira mu kibuga.
16:36
70' Koruneri ya Centrafrique
Rukundo Denis arengeje umupira, koruneri ihita iterwa ariko Buhake akubita umupira ibipfunsi ujya imbere ariko urongera ufatwa na Centrafrique.
16:33
68' Igitego cya kabiri cy'Amavubi
Tuyisenge Jacques atsinze igitego cya kabiri cy'Amavubi. Ni igitego cyateguwe neza kuko Ishimwe Blaise ukinira Rayon Sports yacenze abakinnyi batatu ba Centrafrique, acomeka umupira hagati ya ba myugariro bayo, usanga Tuyisenge wacenze umwe, ahita ateresha umupira ukuguru kw'iburyo uruhukira mu rushundura.
16:31
65' Centrafrique iri kunyuzamo ikataka Amavubi
Centrafrique yari izamutse neza biciye ku bakinnyi bayo barimo Ngam-Ngam na Kondogbia, ariko umupira uyu rutahizamu yateye waciye hejuru y'izamu ry'Amavubi ririnzwe na Buhake, uri gukina umukino we wa mbere mu Ikipe y'Igihugu, Amavubi.
16:28
63' Gusimbuza kw'Amavubi
Iradukunda Bertrand ukinira Gasogi United asimbuye Kwitonda Alain Bacca wa Bugesera FC. Uyu musore usimbuwe ni ubwa mbere agaragaye mu mwenda w'Ikipe y'Igihugu Amavubi nyuma yo kwigaragaza cyane mu mikino ya Shampiyona y'Icyiciro cya Mbere mu Rwanda.
16:25
61' Centrafrique yakangutse
Abakinnyi ba Centrafrique [ Les Fauves du Bas-Oubangui] barimo gukinira mu gice cy'Amavubi. Imikinire yabo irerekana ko bafite inyota yo kwishyura igitego batsinzwe mu gice cya mbere.
16:23
57' Coup franc ya Centrafrique
Manishimwe Djabel akoreye ikosa Yambere, abasifuzi batanga ikosa kuri Centrafrique
16:21
54' Ikarita y'umuhondo ku Amavubi
Myugariro Rukundo Denis ukinira Ikipe ya Police FC muri Uganda yeretswe ikarita y'umuhondo ku ikosa akoreye Geoffrey Kondogbia hagati mu kibuga. Rihise rihanwa ariko abakinnyi ba Centrafrique barawutakaza, ab'Amavubi barawusubirana. Ubu ni bo bari guhererekanya neza.
16:12
46' Amavubi ahise akora impinduka
Rwatubyaye Abdoul, Iradukunda Eric na Samuel Gueulette, basimbuwe na Ishimwe Blaise, Nirisarike Salom, Rukundo Denis. Mashami Vincent utoza Amavubi ari gukora impinduka zigamije kureba urwego abakinnyi be bariho by'umwihariko hibandwa ku bashya.
16:09
46' Igice cya kabiri kiratangiye
Amakipe yombi agarutse gukina iminota 45 y'igice cya kabiri. Nyuma y'iminota 15, amakipe yombi ari guhabwa inama z'uburyo bwo kwitwara mu minota isigaye, bagarutse mu kibuga.
15:52
47' Igice cya mbere kirarangiye
Iminota 45 y'igice cya mbere irarangiye. U Rwanda ruri imbere n'igitego 1-0 cyatsinzwe na Rwatubyaye Abdoul.
15:51
45' Koruneri yindi ya Centrafrique
Rutanga Eric atabaye izamu ririnzwe na Buhake bituma hatangwa koruneri, itatanza umusaruro kuko uyu munyezamu yahise afata umupira neza.
15:50
44' Coup franc nziza ya Centrafrque
Mvondoze akorewe ikosa na Niyonzima Olivier Sefu ukinira APR FC. Ni nko muri metero nka 30 uvuye ku izamu ry'Amavubi. Coup franc yatewe n'abakinnyi ba Centrafrique ariko Buhake ahita afata umupira neza.
15:45
39' Igitego cy'Amavubi
Myugariro Rwatubyaye Abdoul yafunguye amazamu ku ruhande rw'Amavubi. Yatsinze igitego cy'umutwe nyuma y'umupira mwiza yari ahawe na Manishimwe Djabel.
15:40
35' Gusimbuza kwa Centrafrique
François Zahoui utoza Centrafrique yakoze impinduka mu kugerageza kureba ko yakwishyura igitego yatsinzwe n'Amavubi. Yakuye mu kibuga Mboumbouni Dylan ashyiramo Ngam-Ngam Saint Cyr.
15:35
30' Amavubi ahushije igitego
Byiringiro Lague azamukanye umupira agerageza kuwuha Tuyisenge Jacques, ashyizeho umutwe umupira umubana muremure uhita ugera mu biganza by'umunyezamu wa Centrafrique.
15:34
28' Koruneri yindi ya Centrafrique
Geoffrey Kondogbia usanzwe akinira Atlético Madrid yo muri Espagne yari atanze umupira mwiza kuri bagenzi be ariko umunyezamu w'Amavubi Buhake Clément arawurenza. Koruneri yatewe bwangu ariko abakinnyi b'Amavubi bakiza izamu ryabo, barawurenza.
15:32
26' Amavubi akomeje gusatira Centrafrique
Abakinnyi b'Amavubi atozwa na Mashami Vincent bakomeje gusatira Centrafrique. Binyuze kuri myugariro Iradukunda Eric yazamukanye umupira ahererekanya neza na Kwitonda Alain, wawucomekeye neza Samuel Gueulette awuteresheje umutwe uca hejuru y'izamu.
15:30
25' Amavubi arimo gutakaza imipira myinshi
Ba myugariro b'Ikipe y'Igihugu Amavubi, bayobowe na Rwatubyaye Abdoul, Ngabwije Bryan, Eric Rutanga ntibaratuza neza. Bakomeje gutakaza imipira myinshi bari guhanahana hagati yabo.
15:25
19' Centrafrique irimo guhana neza
Guhera mu bwugarizi bwa Centrafrique, abakinnyi bari guhanahana neza imipira ahanini bakoresheje impande zayo. Iyi kipe iri kugaruka mu mukino neza ndetse ntikiri gutakaza imipira myinshi.
15:19
13' Koruneri ya Centrafrique
Samuel Gueulete arengeje umupira wari ugaruwe na Geoffrey Kondogbia, itewe Ngwabije ahita ashyira umupira imbere akiza izamu rye ririnzwe na Buhake Clément.
15:14
07' Amavubi ahushije penaliti
Kapiteni w'Amavubi, Tuyisenge Jacques, ni we wateye penaliti arayihusha nyuma yo kunyuza umupira hejuru y'izamu.
15:13
06' Penaliti y'u Rwanda
Ikipe y'Igihugu, Amavubi yabonye penaliti yakorewe kuri Byiringiro Lague. Uyu rutahizamu yakorewe penaliti nyuma y'umupira mwiza yari ahawe na Iradukunda Eric Radu, yamara kuwufata agahita ategerwa mu rubuga rw'amahina.
15:11
05' Koruneri ya mbere y'u Rwanda
Myugariro w'iburyo wa Centrafrique arengeje umupira ubwo yari yatatswe na Lague. Koruneri yatewe yaciye hejuru cyane y'izamu.
15:08
03' Amavubi ahushije igitego
Manishimwe Djabel ahaye umupira mwiza Kapiteni Tuyisenge Jacques, agerageje kuwuteresha umutwe uca hejuru gato y'izamu rya Centrafrique.
15:06
01' Umukino uratangiye
Ikipe ya Centrafrique ni yo yatangije umukino ariko abasore bayo bamaze guhererekanya bahita batakaza umupira ufatwa n'abakinnyi b'Amavubi.
15:02
Indirimbo zubahiriza ibihugu byombi zimaze kuririmbwa
Habanje kuririmbwa indirimbo "La Renaissance" ya Centrafrique, hakurikiraho "Rwanda Nziza" y'u Rwanda.
14:59
Ikaze kuri Stade Amahoro i Remera
IGIHE ibahaye kaze kuri Stade Amahoro i Remera, ahagiye kubera umukino wa gicuti uhuza Ikipe y’Igihugu y’u Rwanda, Amavubi na Centrafrique.
Aya makipe yombi y’ibihugu akaba akomeje kwitegura imikino iteganyijwe muri Nzeri, yo gushaka itike yo kujya mu Gikombe cy’Isi kizabera muri Qatar mu 2022.
Ubwo u Rwanda rwaherukaga gukina na Centrafrique mu gushaka itike yo kujya mu Gikombe cya Afurika cya 2019, umukino ubanza wabereye i Bangui muri Centrafrique Amavubi yahatsindiwe 2-1, uwo kwishyura wabereye i Huye, amakipe yombi anganya 2-2.
Ku wa Mbere tariki ya 07 Kamena, hateganyijwe undi mukino wo kwishyura uzahuza aya makipe yombi.
Abakinnyi 11 b'u Rwanda babanjemo: Buhake Clement, Rwatubyaye Abdoul, Ngwabije Bryan Clovis, Rutanga Eric, Iradukunda Eric, Niyonzima Olivier, Manishimwe Djabel, Kwitonda Alain Bacca, Byiringiro Lague, Tuyisenge Jacques, Samuel Gueulette.
Abakinnyi 11 ba Centrafrique: Samolah Elvis, Yambere Cedric, Ndobe Sadoc, Mvondoze Georgino, Mboumbouni Dylan, Toropite Trezor, Kotton Ralph, Geoffrey Kondogbia, Zahibo Wilfred, Yangano Flory, Yapende Marc.
Aya makipe yombi y’ibihugu akaba akomeje kwitegura imikino iteganyijwe muri Nzeri, yo gushaka itike yo kujya mu Gikombe cy’Isi kizabera muri Qatar mu 2022.
Ubwo u Rwanda rwaherukaga gukina na Centrafrique mu gushaka itike yo kujya mu Gikombe cya Afurika cya 2019, umukino ubanza wabereye i Bangui muri Centrafrique Amavubi yahatsindiwe 2-1, uwo kwishyura wabereye i Huye, amakipe yombi anganya 2-2.
Ku wa Mbere tariki ya 07 Kamena, hateganyijwe undi mukino wo kwishyura uzahuza aya makipe yombi.
Abakinnyi 11 b'u Rwanda babanjemo: Buhake Clement, Rwatubyaye Abdoul, Ngwabije Bryan Clovis, Rutanga Eric, Iradukunda Eric, Niyonzima Olivier, Manishimwe Djabel, Kwitonda Alain Bacca, Byiringiro Lague, Tuyisenge Jacques, Samuel Gueulette.
Abakinnyi 11 ba Centrafrique: Samolah Elvis, Yambere Cedric, Ndobe Sadoc, Mvondoze Georgino, Mboumbouni Dylan, Toropite Trezor, Kotton Ralph, Geoffrey Kondogbia, Zahibo Wilfred, Yangano Flory, Yapende Marc.
