Rayon Sports inganyije na Musanze FC ubusa ku busa mu mukino w'umunsi wa 12 wa Shampiyona waberaga i Nyamirambo.

Kunganya bitumye Rayon Sports ifata umwanya wa kane n'amanota 20 inganya na AS Kigali ya gatatu, zombi zirusha inota rimwe Police FC izakina na Mukura VS ku wa Mbere.

Musanze FC igumye ku mwanya wa gatandatu n'amanota 17.

Mu yindi mikino yabaye kuri uyu wa Gatandatu, Espoir FC yanganyije na Étoile de l'Est ubusa ku busa naho Étincelles FC itsindwa na Marines FC igitego 1-0.

Turabashimiye mwese twabanye kuri uyu mukino, tuzasubire ku Cyumweru ku mukino uzahuza Kiyovu Sports na APR FC.

Rayon Sports ibonye amahirwe yo gutsinda ku munota wa nyuma, ariko Essomba Onana atera umupira hejuru y'izamu.

Umunyezamu Ntaribi Steven ahawe ikarita y'umuhondo kubera gutinza umukino.

Mu gihe amakipe yombi akomeje gushaka uko abona igitego, umusifuzi wa kane yerekanye iminota itanu y'inyongera,

Rayon Sports yari ibonye uburyo bwiza ariko Sekamana Maxime atera umupira hanze.

Muhire Kevin ahaye umupira Nishimwe Blaise uteye ishoti ashaka gutungura umunyezamu Ntaribi Steve, ariko awufata neza.

Nkundimana asimbuye Ben Ocen ku ruhande rwa Musanze FC.

Nshimiyimana Amran ahawe ikarita y'umuhondo nyuma yo gukinira nabi Muhire Kevin kandi yihanangirijwe kenshi.

Musanze FC ikoze impinduka ya mbere: Kwizera Jean Luc asimbuye Nyirinkindi Saleh.

Sekamana Maxime asimbuye Mushimiyimana Mohamed ku ruhande rwa Rayon Sports.

Asanzemo Niyonkuru Sadjati na Rudasingwa Prince basimbuye Manace Mutatu na Souleymane Sanogo.

Mu minota itanu ishize, Rayon Sports ikomeje gusatira ishaka igitego. Mu buryo bw'umupira uhinduwe na Nizigiyimana, Essomba Onana ashyizeho umutwe ariko ku bw'amahirwe make umupira uca ku ruhande rw'izamu.

Kapiteni wa Musanze FC, Niyitegeka Idrissa, ahawe ikarita y'umuhondo nyuma yo gushyamirana na Nishimwe Blaise ubwo Adolphe yari akiniye nabi Angua.

Umunyezamu Hakizimana Adolphe ahawe ikarita y'umuhondo nyuma yo gukubita inkokora Eric Kanga Angua.

Rayon Sports ikoze contre-attaque nyuma y'uburyo buhushijwe na Nyirinkindi Saleh, ariko umupira utewe na Essomba Willy Onana ujya ku ruhande.

Muhire Kevin na we yinjiranye umupira mu rubuga rw'amahina agushwa hasi yamaze kuwutakaza.

Musanze FC ikomeje kotsa igitutu Rayon Sports. Eric Kanga akinanye na Ben Ocen uhinduye umupira mu rubuga rw'amahina, abakinnyi ba Rayon Sports bawushyira muri koruneri itewe na Nyirinkindi Saleh ariko umupira ukurwaho na Muvandimwe n'umutwe.

Niyitegeka Idrissa arengeje umupira wari ugeze mu rubuga rw'amahina rwa Musanze FC. Koruneri ya Rayon Sports itewe na Mutatu umupira ukurwaho n'abakinnyi ba Musanze bakoze contre-attaque, ariko Muvandimwe Jean Marie Vianney agira amahirwe umupira akoze ujya hejuru y'izamu kuko yashoboraga kwitsinda.

Essomba Willy Onana akiniye nabi Saleh Nyirinkindi, ikosa rihanwe na Nyandwi Saddam, ariko abakinnyi ba Rayon Sports bakiza izamu.

Rayon Sports ni yo itangije igice cya kabiri, umupira wa mbere uterwa na Sanogo uwutanze kuri bagenzi be na bo batangira gusatira Musanze FC.

Umusifuzi wa kane yerekanye umunota umwe w'inyongera ny gihe Nyandwi Saddam wari uryamye hasi yamaze guhaguruka.

Mu gukiza izamu, Dushimumugenzi Jean akoze umupira n'ukuboko ari ku murongo w'urubuga rw'amahina.

Ikosa rihanwe na Nizigiyimana Karim uteye umupira mu rukuta, ugarutse awusubizayo awushota Kapiteni wa Musanze FC, Niyitegeka Idrissa,

Nyirinkindi Saleh acometse umupira iburyo ashaka Namanda Wafula urobye umunyezamu Hakizimana Adolphe akamurenza umupira, ariko uca ku ruhande rw'izamu.

Nyandwi Saddam akiniye nabi Essomba Willy Onana hafi y'urubuga rw'amahina. Onana ni we uhannye iri kosa, umupira ujya hejuru cyane kure y'izamu rya Musanze FC ririnzwe na Ntaribi Steven.

Nyirinkindi Saleh azamukanye umupira mu ruhande rw'iburyo, awuhinduye mu rubuga rw'amahina ashaka Ben Ocen, ariko ugonga myugariro Niyigena mbere y'uko ufatwa neza na Hakizimana Adolphe.

Kapiteni wa Musanze FC, Niyitegeka Idrissa, acometse umupira imbere ashaka Namanda Luke Wafula, ariko awutangwa na Hakizimana Adolphe wasohotse. Musanze FC ibonye kandi uburyo bw'ishoti ritewe na Idrissa, umupira ujya ku ruhande.

Essomba Willy Onana acomekewe umupira na Manace Mutatu awufunga n'igituza, ariko agerageje gucenga abakinnyi ba Musanze FC barimo Dushimumugenzi Jean ngo atere mu izamu, umupira uramutengushye ujya hanze.

Nshimiyimana Amran akiniye nabi Muhire Kevin. Ikosa rihanwe na Nizigiyimana Karim uteye umupira muremure mu rubuga rw'amahina, ugeze kuri Habimana Hussein ashyiraho umutwe, ariko ku bw'amahirwe make umupira hejuru y'izamu.

Essomba Onana akiniwe na Nshimiyimana Amran, ikosa rihanwe na Mohamed Mushimiyimana ukinanye na Sanogo, ariko umupira awushota umukinnyi wa Musanze FC.

Niyitegeka Idrissa atanze umupira muremure ashaka gukinana na Ben Ocen ukuweho umupira na Muvandimwe Jean Marie. Uyu mupira ugarutse kuri Nshimiyimana Amran uwukinnye, ariko akinirwa nabi na Essomba Onana.

Nshimiyimana Amran wa Musanze FC akiniwe nabi Souleymane Sanogo uhawe ikarita y'umuhondo. Abaganga bahamagajwe mu kibuga ngo bamwiteho.

Niyigena Clement wa Rayon Sports agonganye na Eric Kanga Angua wa Musanze FC bateranye imitwe. Uyu myugariro wa Rayon Sports ahise aryama hasi, umusifuzi Ishimwe ahamagaza abaganga ngo bamwiteho.

Essomba Willy Onana atanze umupira kuri Kapiteni we, Muhire Kevin, uteye ishoti ashaka gutungura umunyezamu Ntaribi Steven, ariko awufata neza.

Umusifuzi Ishimwe Jean Claude ni we uyoboye umukino. Umupira wa mbere utewe na Eric Angua awuha bagenzi be.

Umutoza wa Musanze FC, Frank Ouma, yitabaje:

Ntaribi Steven
Niyitegeka Idrissa (c)
Dusabe Jean Claude
Lulihoshi Hertier François
Dushimumugenzi Jean
Nyandwi Saddam
Nyirinkindi Saleh
Nshimiyimana Amran
Ben Ocen
Eric Kanza Angua
Namanda Luke Wafula

Umutoza Lomami Marcel yitabaje:

Hakizimana Adolphe
Nizigiyimana Karim Mackenzi
Muvandimwe Jean Marie Vianney
Niyigena Clement
Habimana Hussein
Nishimwe Blaise
Sanogo Souleymane
Mushimiyimana Mohamed
Muhire Kevin (c)
Essomba Willy Onana
Manace Mutatu Mbedi

Rayon Sports igiye gukina uyu mukino itari kumwe n'Abanya-Maroc Rharb Youssef na Ayoub Ait Lahssaine bamaze gutandukana na yo ndetse bakaba bagomba gusubira muri Raja Casablanca yari yabatije.

IGIHE ibahaye ikaze kuri Stade ya Kigali i Nyamirambo hagiye kubera umukino w'umunsi wa 12 ya Shampiyona hagati ya Rayon Sports na Musanze FC guhera saa 15:15.

Rayon Sports iri ku mwanya wa gatanu n'amanota 19 mu gihe Musanze FC ifite amanota 16 ku mwanya wa gatandatu.

Uyu mukino wabimburiwe n'uwo AS Kigali yatsinzwemo na Rutsiro FC ibitego 2-1.