Kiyovu Sports ikomeje kuyobora Shampiyona n'amanota 25 nyuma yo kunganya na APR FC ubusa ku busa mu mukino w'umunsi wa 12 wa Shampiyona waberaga i Nyamirambo.

Ikipe y'Ingabo igumye ku mwanya wa kabiri n'amanota 24 ndetse ifite ibirarane bibiri izahuramo na Mukura Victory Sports ndetse na Rutsiro FC.

Turabashimiye mwese twabanye kuri uyu mukino, tuzasubire ku wa Mbere ku mukino uzahuza Mukura Victory Sports na Police FC.

Mbonyingabo Regis ahinduye umupira mu rubuga rw'amahina ushyirwa muri koruneri n'abakinnyi ba APR FC.

Usubijwe mu kibuga na Bizimana Hamissi, Rwabuhihi ashyiraho umutwe.

Umusifuzi ahise asoza umukino.

Iracyadukunda Eric ahawe ikarita y'umuhondo nyuma yo gukinira nabi Omborenga Fitina.

Amakipe yombi akomeje gushaka uko abona igitego. Umusifuzi wa kane Ngabonziza Jean Paul yerekanye iminota itatu y'inyogera.

Bizimana Hamissi 'Coutinho' asimbuye Harerimana Ismael Pichu wababaye cyane.

Tuyishime Benjamin akiniye nabi Mugisha Bonheur. Ikosa rihanwe na Manishimwe Djabel, umupira ukurwaho na Bigirimana Abeddy.

Byiringiro Lague na Mugunga Yves basimbuwe na Bizimana Yannick ndetse na Rwabuhihi Placide ku ruhande rwa APR FC.

Omborenga Fitina ahawe umupira na Byiringiro Lague, na we awutanga kuri Ishimwe Anicet ucenze myugariro wa Kiyovu Sports, atera ishoti risubijwe inyuma n'igiti cy'izamu. Bwari uburyo bw'igitego kuko umupira wari ku giti cya kabiri.

Harerimana Ismael akiniye nabi Ishimwe Anicet. Ikosa rihanwe na Manishimwe Djabel, umupira ujya hejuru kure cyane y'izamu.

Tuyishime Benjamin asimbuye Dusingizimana Gilbert ku ruhande rwa Kiyovu Sports

Benedata Janvier ahannye ikosa Ruboneka yakoreye Ismael, umupira ushyizweho umutwe na Bigirimana Abeddy ujya hejuru y'izamu.

Ruboneka Jean Bosco ahawe ikarita ya kabiri y'umuhondo ku ikosa akoreye kuri Harerimana Ismael Pichu hafi n'urubuga rw'amahina mu ruhande.

Ishimwe Anicet asimbuye Mugisha Gilbert ku ruhande rwa APR FC.

Umutoza Haringingo Francis Christian wa Kiyovu Sports, ahawe ikarita y'umuhondo kubera kutishimira ibyemezo by'abasifuzi no kurenga aho agomba guhagarara.

Ruboneka Jean Pierre akiniye nabi Bigirimana Abeddy mu kibuga hagati, ahabwa ikarita y'umuhondo. Byashobokaga ko hatangwa n'ikarita itukura.

Umutoza Adil wa APR FC na Haringingo wa Kiyovu Sports bari guterana amagambo nyuma y'uko Mugenzi Bienvenu agushijwe ahagana ku murongo w'urubuga rw'amahina ariko abasifuzi bayobowe na Hakizimana Louis bakavuga ko nta cyabaye.

Kiyovu Sports yongeye kwirangaraho ku mupira ucomekewe Bigirimana Abeddy, atera ishoti risubijwe inyuma na Ishimwe Jean Pierre ndetse yongera gusubizamo, uyu munyezamu wari wahagarutse afata neza umupira.

Mugenzi Bienvenu asimbuye Pinoki Vuvu Patshelli ku ruhande rwa Kiyovu Sports.

Omborenga Fitina ahawe ikarita y'umuhondo ku nkokora akubise Bigirimana Abeddy wa Kiyovu Sports.

Bigirimana Abeddy ahawe umupira mwiza ari mu rubuga rw'amahina, awuteye ukurwamo na Ishimwe Jean Pierre, ariko umusifuzi wo ku ruhande agaragaza ko hari habayeho kurarira.

Omborenga Fitina acenze Dusingizimana Gilbert atanga umupira kuri Manishimwe Djabel ushatse gutungura umunyezamu umupira ujya hejuru.

Serumogo Ally ahinduye umupira mwiza mu rubuga rw'amahina, usanga Bigirimana Abeddy uwushyize ku gituza ndetse atera ishoti rinyuze ku ruhande.

IGIHE yongeye kubaha ikaze kuri Stade ya Kigali hari kubera umukino wa Kiyovu Sports na APR FC ku munsi wa 12 wa Shampiyona.

Nta mpinduka amakipe yombi akoze ndetse umukino urasubukuwe.

Kimenyi Yves arokoye Kiyovu Sports ku mupira ukomeye utewe na Ruboneka Jean Bosco, arasimbuka awukoraho ujya muri koruneri itagize icyo itanze.

Manishimwe Djabel ahannye ikosa Lague akoreweho na Ismael Pichu, umupira ukurwaho na Dusingizimana Gilbert ukinishije umutwe.

Harerimana Ismael Pichu wa Kiyovu Sports ahawe ikarita y'umuhondo akiniye nabi Byiringiro Lague wari umucitse ashaka kwinjira mu rubuga rw'amahina.

Ruboneka Bosco atanze umupira muremure imbere, Mugisha Gilbert asiga abakinnyi bose ba Kiyovu Sports, ariko ashatse kuroba Kimenyi wari wasohotse, umupira uramutenguha ujya hejuru y'izamu. Bwari uburyo bw'igitego.

Byiringiro Lague yinjiranye umupira anyuze ibumoso, atambuka kuri Ngendahimana Eric, awuhinduye mu rubuga rw'amahina ukorwaho na Ndayishimiye Thierry mbere y'uko ufatwa na Kimenyi Yves.

Adil Mohamed wa APR FC (wambaye umutuku) na Haringingo Francis wa Kiyovu Sports wambaye ishati.

Ruboneka Jean Bosco ahawe umupira ari inyuma y'urubuga rw'amahina atera ishoti rikozweho na myugariro wa Kiyovu Sports, ujya muri koruneri. Usubijwe mu kibuga na Manishimwe Djabel, Pinoki Vuvu akiza izamu ateresheje umutwe.

Harerimana Ismael Pichu atanze umupira kuri Pinoki Vuvu ugerageje kwinjira mu rubuga rw'amahina rwa APR FC, atera ishoti rikomeye rifashwe na Ishimwe Jean Pierre.

Buregeya Prince atabaye APR FC ku mupira akuye ku kirenge cya Pinoki Vuvu nyuma yo gucomekerwa umupira mwiza na Serumogo Ally Omar. Myugariro wa APR FC ahise ahamagarizwa abaganga ngo bamwiteho.

Kiyovu Sports iri gukina neza muri iyi minota ndetse iri gukoresha APR FC amakosa menshi. Mukanya gashize, Urucaca rubonye uburyo bubiri ariko abakinnyi barwo b'imbere bakisanga baraririye.

Bigirimana Abeddy ahaye umupira Dusingizimana Gilbert ari mu rubuga rw'amahina wenyine kandi atarariye, mu gihe yitegura gutera mu izamu haza Nsabimana Aimable uhise uwumukuraho. Bwari uburyo bw'igitego.

Dusinzigizimana Gilbert yinjiranye umupira mu rubuga rw'amahina awutanga kuri Pinoki Vuvu Patshelli ushatse kuwutera mu izamu awushota Serumogo ku mutwe, ujya hanze.

Birasa n'aho amakipe yombi agabanyije umuvuduko ukurikije n'uburyo mu minota 10 ishize byari bimeze. Kiyovu Sports yari yinjiye mu rubuga rw'amahina rwa APR FC, Serumogo Ally agorwa na Niyomugabo Claude umwambuye umupira.

APR FC yongeye kuzamukana umupira, Byiringiro Lague acenga ab'inyuma ba Kiyovu Sports, ariko ishoti ateye rikorwaho na Ndayishimiye Thierry mbere y'uko rifatwa na Kimenyi Yves.

Pinoki Vuvu agerageje kunaniza abakinnyi ba APR FC barenza umupira, usubijwe mu kibuga uhabwa Benedata Janvier uteye ishoti ridakomeye rifatwa na Ishimwe Jean Pierre.

Niyomugabo Claude ahawe umupira na Manishimwe Djabel, azamuka yiha mu ruhande rw'ibumoso, akinana na Mugisha Gilbert winjiye mu rubuga rw'amahina, ateye ishoti rica ku ruhande gato rw'izamu ririnzwe na Kimenyi Yves.

Mugunga Yves yongeye gucomekerwa umupira asiga abakinnyi ba Kiyovu Sports, ariko ashatse kuroba Kimenyi ujya ku ruhande rw'izamu.

Byiringiro Lague akinanye na Omborenga Fitina uhinduye umupira mu rubuga rw'amahina usanga Mugisha Gilbert ushyizeho umutwe, ufatwa na Kimenyi Yves.

APR FC iri guhererekanya cyane muri iyi minota ya mbere, ariko nta buryo bw'umupira ugana mu izamu iragerageza. Kiyovu Sports ntiragera muri 1/3 cy'ikibuga cya APR FC.

Mugunga Yves acomekewe umupira mwiza, ariko awutangwa na Kimenyi Yves.

Umusifuzi wo hagati Hakizimana Louis atangije umukino. Umupira wa mbere utewe na Kiyovu Sports, Bigirimana atanga umupira kuri Serumogo na we wutanga ku rundi ruhande.

Mu mikino 35 iheruka guhuza amakipe yombi muri Shampiyona, APR yatsinzemo 25, Kiyovu itsinda itatu, zinganya imikino irindwi.


APR FC yatsinze imikino 20 muri 23 iheruka guhuriramo na Kiyovu Sports harimo n’uheruka warangiye ari 1-0.


Muri iyi mikino 23, APR FC yinjijemo ibitego 43 mu izamu rya Kiyovu Sports mu gihe Urucaca rwo rwatsinze ibitego bitanu gusa.

Uretse Marines FC yabonye amanota atatu gusa mu mikino yahuyemo na APR FC mu myaka 11 ishize, Kiyovu Sports yabonye amanota atanu gusa kuri iyi kipe y’ingabo.

Intsinzi ya Kiyovu Sports yo ku wa 27 Ukwakira 2017, yabonetse nyuma y'imyaka 12 Urucaca rudatsinda APR FC. Uyu mukino warangiye ari igitego 1-0 cyatsinzwe na Mustafa Francis ndetse icyo gihe Kiyovu Sports yari imaze iminota isaga 630 (imikino irindwi) itinjiza igitego mu izamu rya APR FC.

Kiyovu Sports yaherukaga gutsinda APR FC muri Shampiyona tariki ya 30 Ukwakira 2005, ibitego 3-1 ku mukino w’umunsi wa nyuma wa shampiyona y’uwo mwaka yanegukanywe na APR FC.

Umutoza Adil Mohammed Erradi yitabaje:

Ishimwe Jean Pierre
Omborenga Fitina
Niyomugabo Claude
Buregeya Prince
Nsabimana Aimable
Mugisha Bonheur
Ruboneka Jean Bosco
Manishimwe Djabel
Mugisha Gilbert
Byiringiro Lague
Mugunga Yves

Haringingo Francis utoza Kiyovu Sports yitabaje:

Kimenyi Yves (c)
Iracyadukunda Eric
Mbonyingabo Regis
Ngendahimana Eric
Ndayishimiye Thierry
Harerimana Ismael
Serumogo Ally Omar
Benedata Janvier
Pinoki Vuvu
Bigirimana Abeddy
Dusingizimana Gilbert

IGIHE ibahaye ikaze kuri Stade ya Kigali i Nyamirambo hagiye kubera umukino w'umunsi wa 12 wa Shampiyona hagati ya Kiyovu Sports na APR FC.

Ni umukino ugiye guhuza amakipe abiri ayoboye muri Shampiyona, aho Kiyovu Sports ifite amanota 24 naho APR FC ikaba ifite amanota 23 ku mwanya wa kabiri, ariko ifite ibirarane bibiri.

Uyu mukino utangira saa Cyenda n'iminota 15 wabanjirijwe n'uwo Gorilla FC yanganyijemo na Bugesera FC igitego 1-1.