APR FC vs Rayon Sports

APR FC 2-1 Rayon Sports

Uko umukino uri kugenda

Umwanditsi

: Mihigo Saddam

Amafoto

: Sendegeya Jules

17:01

APR FC yegukanye intsinzi yavuye ahakomeye

APR FC yatsinze Rayon Sports ibitego 2-1 mu mikino yombi ihita ibona itike yo kugera ku mukino wa nyuma w'Igikombe cy'Amahoro. Iyi Kipe y'Ingabo z'Igihugu izacakirana na AS Kigali yagezeyo nyuma yo gutsinda Police FC ibitego 3-2 mu mikino yombi.

17:01

UMUKINO URARANGIYE

90+6' Ikipe ya APR FC ni yo yegukanye intsinzi ku mukino wo kwishyura wa 1/2 wayihuje na Rayon Sports.

16:57

Ikarita y'umuhondo kuri Sanogo

95' Sanogo Souleymane yahawe ikarita y'umuhondo nyuma yo gukorera ikosa kuri myugariro Nsabimana Aimable wa APR FC.

16:54

APR FC iri gukina irwana no kurinda igitego cyayo

93' Mu gihe habura iminota mike ngo umukino urangire. Abakinnyi ba APR FC bari gukina bagerageza kugarira no kurinda izamu ryabo. Ku rundi ruhande, abafana bari kubaha amashyi menshi yo kubakomeza.

16:52

Iminota itanu y'inyongera

90' Iminota yagenewe umukino yarangiye. Umusifuzi yongeyeho iminota itanu.

16:51

Ikosa rikorewe kuri Ishimwe Pierre wa APR FC

89' Umunyezamu wa APR FC, Ishimwe Pierre, yakoreweho ikosa ari mu rubuga rw'amahina, ahita agwa hasi. Abaganga batangira kumwitaho, ahita ahaguruka.

16:49

Gisumbuza kwa APR FC

88' Nshuti Innocent watsinze igitego cya mbere cya APR FC yakuwe mu kibuga asimburwa na Rwabuhihi Aime Placide.

16:46

Rayon Sports yahushije uburyo bwabazwe

85' Rayon Sports yabuze amahirwe yabazwe nyuma y'uko Ishimwe Kevin azamukanye umupira agacenga myugariro wa APR FC, Nsabimana Aimable, yatera umupira ukagonga umutambiko w'izamu.

16:44

Rayon Sports yinjije abakinnyi batatu

77' Abakinnyi batatu ba Rayon Sports barimo Kwizera Pierrot na Sanogo Souleymane binjiye mu kibuga. Umutoza wa Rayon Sports, Jorge Manuel da Silva Paixão Santos, ari kugerageza amahirwe ya nyuma mu gihe iminota igana ku musozo.

16:39

Amakipe yombi ari gukina umukino wa 96 mu marushanwa yose yahuriyemo


Mu mikino 95 bakinnye, habonetsemo ibitego 252 harimo 120 ku ruhande rwa Rayon Sports n’ibitego 132 ku ruhande rwa APR FC.

Umwaka wa 2017, ni wo wonyine aya makipe yahuyemo inshuro eshanu, inyinshi zabaye mu mwaka umwe hagati y'impande zombi kuko adakunda gukina hagati yayo bya gicuti.

Mu 2016, APR FC yashoboye gutsinda Rayon Sports gatatu yikurikiranya (mu irushanwa ryateguwe na AS Kigali (3-0), Shampiyona (1-0) n’Igikombe cy’Intwari (1-0), ibisubiramo mu mwaka w’imikino wa 2017/18, yayitsinze igitego 1-0 na 2-1 muri Shampiyona ndetse n’ibitego 2-1 mu Gikombe cy’Intwari cya 2018.

Rayon Sports na yo yatumye APR FC imara imikino itatu itazi uko gutsinda "El Classico" Nyarwanda bimera nyuma yo kunganya igitego 1-1 muri Shampiyona y’Umwaka w’Imikino 2016/17 mu gice cyo kwishyura, ikayitsinda 1-0 ubwo yegukanaga irushanwa ry’Agaciro ndetse na 2-0 kuri Super Cup 2017 yabereye i Rubavu igasorezwa i Kigali.

16:36

APR FC yakambitse imbere y'izamu rya Rayon Sports

74' Ishimwe Anicet wa APR FC yazamukanye umupira ageze inyuma y'urubuga rw'amahina atera ishoti rikomeye rigana mu izamu rya Kwizera Olivier ariko awukubita ibipfunsi ugana hanze. Koruneri yatewe nta musaruro yatanze.

16:31

Umunyezamu wa APR FC ari kuvurwa

Umunyezamu wa APR FC, Ishimwe Pierre, ari kwitabwaho n'abaganga nyuma y'imvune yagize ariko idakanganye.

16:31

Gusimbuza kwa Rayon Sports


70' Rudasingwa Prince yavuye mu kibuga asimburwa na Ishimwe Kevin. Rayon Sports ikomeje kongera imbaraga mu busatirizi bwayo binyuze mu gushyiramo amaraso mashya.

16:27

Rayon Sports isa n'iyakangutse

55' Abakinnyi ba Rayon Sports basa n'abakangutse ndetse batangiye gusatira cyane izamu rya APR FC ariko ab'inyuma b'iyi kipe y'ingabo bakomeje kubabera ibamba.

16:24

Gusimbuza ku mpande zombi

Rayon Sports yakoze impinduka aho Nizigiyimana Mackenzie yavuyemo hinjiramo Sekamana Maxime. Ku ruhande rwa APR FC, Ishimwe Anicet na Byiringiro Lague na bo binjiye mu kibuga mu kongerera imbaraga ubusatirizi.

16:12

APR FC yatangiranye igitego igice cya kabiri

48' Nsabimana Aimable wa APR FC yafashije ikipe ye kuyobora umukino. Ni nyuma y'igitego cyiza yatsinze ateye ishoti rikomeye mu izamu rya Rayon Sports ariko Kwizera Olivier ananirwa kuwukuramo.

15:52

IGICE CYA MBERE CY'UMUKINO KIRARANGIYE

45+2' Igice cya mbere cy'umukino hagati ya APR FC na Rayon Sports cyarangiye. Amakipe yombi yasoje iminota 47 anganya 1-1. Ni igice cyaranzwe no kotsana igitutu hagati y'amakipe yombi. Bitandukanye n'umukino wabanje, uwo kwishyura wo usa n'ufunguye ndetse amakipe yombi ari kwerekana ko ashobora gukina.

15:49

Iminota ibiri y'inyongera

45' Iminota 45 y'igice cya mbere yarangiye, umusifuzi wa kane, Uwikunda Samuel yerekana ko hongereweho iminota ibiri yatakaye ubwo igice cya mbere cyakinwaga.

15:46

Igitego cya Rayon Sports

40' Kapiteni wa Rayon Sports, Muhire Kevin, yinjije neza penaliti. Yayiteye mu ruhande rw'iburyo, umunyezamu Ishimwe Pierre yerekeza mu rw'ibumoso, ahindukira asanga inshunduro zinyeganyega.

15:44

Penaliti ya Rayon Sports

40' Rutahizamu wa Rayon Sports, Mussa Essenu yakoreweho ikosa ari mu rubuga rw'amahina, Umusifuzi Twagirumukiza Abdul Kharim ahita atanga penaliti.

15:42

Abafana ba Rayon Sports bakonje, aba APR FC mu bicu

Mu gihe APR FC ikiri imbere n'igitego kimwe ku busa, abafana bayo bari kubyina batiza abakinnyi bayo umurindi. Bafite umuriri uherekejwe n'induru y'ingoma biri hejuru cyane.


Ku rundi ruhande, Rayon Sports yo abayo batuje, bategereje kureba niba hari igitangaza cyabaho bakaba bakwishyura igitego binjijwe.

15:31

APR FC iracyayoboye

26' Ikipe ya APR FC iracyari imbere n'igitego kimwe cyatsinzwe na Nshuti Innocent. Umukino uramutse urangiye gutya Ikipe y'Ingabo z'Igihugu yahita ikatisha itike yo kugera ku mukino wa nyuma isanga AS Kigali yawugezeho nyuma yo gutsinda Police FC 3-2 mu mikino yombi.

15:26

Ni wo mukino uhenze mu mateka ya ruhago y’u Rwanda


Umukino wa Rayon Sports na APR FC ni wo mu busanzwe winjiza agatubutse binyuze mu mafaranga yishyuzwa ku kibuga mu mikino yose ibera mu Rwanda.

Mu 2019, mu mikino yahuje APR FC na Rayon Sports, buri wose winjije asaga miliyoni 60 Frw ku wo buri ruhande rwakiriye muri uwo mwaka.

Bwa mbere mu mateka y’umupira w’amaguru mu Rwanda, itike ya menshi kuri uyu mukino wa Rayon Sports na APR FC ni ibihumbi 50 Frw. Mu gihe mu bindi bice ari 10.000 Frw ahasanzwe, ibihumbi 20 Frw n’ibihumbi 30 Frw ahiyubashye.

15:23

Umukino ubanza wahuje amakipe yombi yarawunganyije


Rayon Sports yaherukaga guhurira na APR FC mu Gikombe cy’Amahoro mu mukino ubanza aho amakipe yombi yanganyije 0-0 mu mukino utari uryiheye ijisho.


Mbere y’uyu mukino, APR FC ni yo yitwaye neza ubwo yaherukaga gucakirana na Rayon Sports. Icyo gihe yatsinze umukino wa nyuma w’irushanwa rya 2016, warangiye ari igitego 1-0 cyinjijwe na Ismaila Diarra mu minota y’inyongera.

15:22

Abafana ntibaraba benshi muri stade

Mu gihe uyu mukino wahuje amakipe y'inkorokoro muri ruhago y'u Rwanda ukunda kurebwa n'abafana benshi, kuri iyi nshuro stade iracyarimo bake ahanini bishobora kuba bifitanye isano n'igiciro gihanitse.


15:16

Igitego cya APR FC

10' Nshuti Innocent yafunguye amazamu ku ruhande rwa APR FC. Ni igitego yatsinze nyuma y'umupira watewe ku ikosa ryakorewe hagati mu kibuga, umusanga mu rubuga rw'amahina na we aterekaho umutwe, awuboneza iy'urushundura.

15:14

APR FC ikomeje kotsa igitutu Rayon Sports

8' Abakinnyi ba APR FC bakomeje guhererekanya neza umupira hagati mu kibuga. Rutahizamu wa APR FC, Nshuti Innocent yasigaranye n'umunyezamu wenyine ateye ishoti, Kwizera Olivier awufata neza abanje kuwuhoza.

15:12

Ishoti rikomeye rya APR FC ntacyo ryabyaye

7' Bizimana Yannick wa APR FC agerageje gutera ishoti rikomeye ari inyuma y'urubuga rw'amahina ariko umunyezamu wa Rayon Sports, Kwizera Olivier awufata neza.

15:09

Rayon Sports itangiye yataka cyane

3' Abakinnyi ba Rayon Sports ni bo batangiye umukino botsa igitutu izamu rya APR FC ririnzwe na Ishimwe Pierre.

15:07

Umukino uratangiye

Umusifuzi Twagirumukiza Abdoul Karim yatangiye umukino w'ishiraniro hagati ya APR FC na Rayon Sports.

15:06

Abakinnyi babanjemo ku mpande zombi

Abatoza b'amakipe yombi nta mpinduka zikomeye bakoze mu bakinnyi basanzwe babanza mu kibuga.


APR FC XI: Ishimwe Pierre (GK), Ombolenga Fitina, Niyomugabo Claude, Nsabimana Aimable, Buregeya Prince, Mugisha Bonheur, Ruboneka Bosco, Mugisha Gilbert, Kwitonda Alain Bacca na Bizimana Yannick.

Rayon Sports XI: Kwizera Olivier (GK), Nizigiyimana Abdul Karim ‘Mackenzie’, Iranzi Jean Claude, Niyigena Clement, Ndizeye Samuel, Mugisha François Master, Nishimwe Blaise, Muhire Kevin, Mael Ndindjek, Moussa Essenu na Rudasingwa Prince.

14:18

Ikipe irokoka hagati ya APR FC na Rayon Sports irasanga AS Kigali

Ikipe itsinda hagati ya APR FC na Rayon Sports irasanga AS Kigali ku mukino wa nyuma. Iyi kipe y'Abanyamujyi yageze ku mukino wa nyuma nyuma yo gusezerera Police FC iyitsinze ibitego 3-2 mu mikino yombi.


APR FC na Rayon Sports zanganyije 0-0 mu mukino ubanza, utari uryoheye ijisho.

14:16

Ni umukino wo gupfa no gukira

Umukino uhuza APR FC na Rayon Sports uba uhanzwe amaso n'abakunzi b'umupira w'amaguru. Kuri iyi nshuro bisa n'ibikomeye kurushaho kuko Rayon Sports ni wo ihanze amaso wayigeze ku Gikombe cy'Amahoro cyayihesha gusohokera u Rwanda.

Ku ruhande rw'Ikipe y'Ingabo, na yo ishaka gushakishiriza amahiriwe muri iri rushanwa kuko muri Shampiyona y'Umupira w'Amaguru y'u Rwanda imibare yayibanye myinshi nyuma y'uko kuri ubu inganya amanota 60 na Kiyovu Sports mu gihe habura imikino itatu gusa ngo umwaka upfundikirwe.

14:12

APR FC yakiriye Rayon Sports mu mukino ukomeye

Ikaze kuri Stade ya Kigali i Nyamirambo aho APR FC yakiriye Rayon Sports mu mukino wo kwishyura wa 1/2 cy'Igikombe cy'Amahoro cya 2022.