Rayon Sports vs Musanze FC

Rayon Sports 4-2 Musanze FC

Uko umukino uri kugenda

Umwanditsi

: Ishimwe Israel

Amafoto

: Ntare Julius

22:12

Kiyovu Sports izisobanura na Rayon Sports ku mukino wa nyuma

Amakipe afite ibigwi muri ruhago y'u Rwanda ya Kiyovu Sports na Rayon Sports yakatishije itike yo kugera ku mukino wa nyuma w'Irushanwa rya Made in Rwanda Cup.

Kiyovu Sports yatsinze Mukura VS igitego 1-0 mu gihe Rayon Sports yasezereye Musanze FC kuri penaliti enye kuri ebyiri nyuma yo gusoza iminota 90 isanzwe y'umukino anganya 0-0.

Umukino wa nyuma uzaba ku Cyumweru tariki ya 9 Ukwakira 2022, saa Kumi; uzabanzirizwa n’uwo guhatanira umwanya wa gatatu uzakinwa saa Munani.

Ikipe izegukana igikombe cya ‘Made in Rwanda Cup 2022’ izahabwa miliyoni 5 Frw, iya kabiri ihabwe miliyoni 4 Frw, iya gatatu izafata miliyoni 3 Frw mu gihe iya kane izatahana miliyoni 2 Frw.

22:11

Aba-Rayon basoje umunsi mu byishimo

Abakinnyi ba Rayon Sports bishimanye n'abafana babo nyuma yo kwegukana intsinzi yabonetse kuri penaliti. Mu kwishimira iyi ntsinzi, bagiye kubaramutsa bakoma amashyi mu buryo bumaze kumenyerwa kuri iyi kipe y'abaturage. Nyuma yo gukatisha itike y'umukino wa nyuma, abafana ba Gikundiro binjiye neza muri weekend.

21:47

Rayon Sports yageze ku mukino wa nyuma itsinze Musanze FC


Rayon Sports yatsinze Musanze FC penaliti enye kuri ebyiri, ikatisha itike yo kugera ku mukino wa nyuma wa Made in Rwanda Cup 2022 isanzeyo Kiyovu Sports.

Abakinnyi bateye penaliti ku ruhande rwa Musanze FC

- Ben Ocen: Yayihushije
- Niyonshuti Gad: Yayihushije
- Namanda Luke Wafula: Yayinjije
- Ntijyinama Patrick: Yayinjije

Abakinnyi bateye penaliti ku ruhande rwa Rayon Sports FC

- Bavakure Ndekwe Félix: Yayinjije
- Muvandimwe Jean Marie Vianney: Yayihushije
- Mitima Isaac: Yayinjije
- Paul Were: Yayinjije
- Onana Léandre Willy Essomba: Yayinjije

21:46

Amafoto y'abafana n'abarebye umukino wa Rayon Sports na Musanze FC

Umukino wahuje Rayon Sports na Musanze FC warebwe n'abafana baringaniye n'abandi banyacyubahiro batandukanye. Mu bakurikiye uyu mukino harimo Umuyobozi wa Gasogi United, Kakooza Nkuriza Charles (KNC) ndetse n'Umuraperi Khalfan Govinda.

21:32

Umwanya wa penaliti uregereje

Abatoza ku mpande zombi bari guhitamo abakinnyi bagiye gutera penaliti. Bari kubaganiriza bababwira uko bari bwitware imbere y'uru rugamba rubategereje.

21:27

UMUKINO URARANGIYE!

94' Umukino wahuzaga Rayon Sports na Musanze FC urangiye amakipe anganya 0-0. Amakipe yombi agiye kwitabaza penaliti kugira ngo hamenyekane ikipe izahura na Kiyovu Sports yageze ku mukino wa nyuma isezereye Mukura VS.

21:26

Umukino nurangira gutya haritabazwa penaliti

Umukino uri guhuza Rayon Sports na Musanze FC nurangira nta kipe irebye mu izamu rya ngenzi yayo, harahita hitabazwa penaliti kugira ngo haboneke ikipe ikomeza ku mukino wa nyuma.

21:25

Amahirwe ya nyuma ku mpande zombi

92' Rayon Sports na Musanze FC ziri kugerageza amahirwe ya nyuma kugira ngo zirebe ko hari iyabona amahirwe yo gutsinda igitego cyayihesha intsinzi.

21:22

Iminota y'inyongera

90' Iminota isanzwe y'umukino yarangiye, hongerwaho ine y'inyongera kugira ngo amakipe yisobanure.

21:21

Ikarita y'umuhondo kuri Raphael Osalue Olise

89' Raphael Osalue Olise yahawe ikarita y'umuhondo nyuma yo gukorera ikosa kuri Ben Ocen wa Musanze FC.

21:20

Ikarita y'umuhondo kuri Rayon Sports

89' Umutoza wa Rayon Sports, Haringingo Francis yahawe ikarita y'umuhondo kubera guterana amagambo n'abasifuzi.

21:19

Gusimbuza kwa Musanze FC

87' Musanze FC yakoze impinduka aho Victor Omondi Ogondo yasimbuwe na Nyandwi Saddam. Umutoza Frank Ouna asa n'ushaka kugarira kugira ngo yinjire muri penaliti.

21:15

Musanze FC ikomeje gukora amakosa menshi

83' Abakinnyi b'inyuma ba Musanze FC bakomeje gukora amakosa menshi mu bwugarizi ku buryo ashobora kuza kubaviramo gutsindwa igitego. Ikosa ryakorewe kuri Onana ryahanwe na Ndekwe Bavakure ariko umupira yateye kuri coup franc uca hejuru y'izamu.

21:13

Ikarita y'umuhondo kuri Musanze FC

81' Onana Léandre Willy Essomba yazamukanye umupira acika ab'inyuma ba Musanze FC ariko Harerimana Obed ahita amurambika hasi umusifuzi Nsabimana Celestin ahita amuha ikarita y'umuhondo.

21:11

Hakizimana Adolphe arokoye Rayon Sports

79' Umunyezamu wa Rayon Sports, Hakizimana Adolphe yakijije izamu rye afata umupira wari utewe na Ben Ocen. Yabanje kuryama hasi nk'uwavunitse ariko ahita abyuka akomeza gukina.

21:09

Mucyo Didier Junior ni uwo guhangwa amaso

77' Myugariro wa Rayon Sports, Mucyo Didier Junior, yageze imbere y'izamu ririnzwe na Muhawenayo Gad ateye ishoti rikomeye arikuramo, biba koruneri itatanze umusaruro.

21:07

Musanze FC na yo iri maso

76' Abakinnyi ba Musanze FC barimo Ben Ocen bari kugerageza kubaka uburyo bwabyara igitego ariko ntabwo bari guhirwa.

21:05

Rayon Sports ikomeje kwisirisita imbere y'izamu rya Musanze FC

71' Mbirizi Eric wa Rayon Sports yazamukanye umupira agerageza gucenga ba myugariro ba Musanze FC ariko umupira umubana muremure urarenga.

21:00

Gusimbuza kwa Rayon Sports

62' Rayon Sports yakoze impinduka ebyiri icyarimwe aho Paul Were na Tuyisenge Arsène basimbuwe na Bavakure Ndekwe Félix na Rudasingwa Prince.

20:58

Rayon Sports iri guhererekanya neza

60' Abakinnyi ba Rayon Sport bari guhererekanya neza umupira hagati mu kibuga bagerageza kurema uburyo bw'igitego ariko ntabwo barashobora gutobora ngo barenge ubwugarizi bwa Musanze FC.

20:55

Gusimbuza kwa Musanze FC

59' Nshimiyimana Amran yinjiye mu kibuga asimbuye Erick Kanza Angua.

20:53

Rayon Sports yabuze andi mahirwe

54' Onana Léandre Willy Essomba yabonye umupira mwiza imbere y'izamu rya Musanze FC ashatse kuwuhagarika ngo awuboneze mu rushundura, umunyezamu w'iyi kipe yo mu Majyaruguru arawumutanga akiza izamu rye.

20:48

Musanze FC yabuze uburyo bwabazwe

52' Victor Omondi yazamukanye umupira wenyine imbere y'izamu ariko ashatse kuroba umunyezamu Hakizimana Adolphe, umupira ahita awufata.

20:38

Igice cya kabiri kigiye gutangira

45' Igice cya kabiri cy'umukino wa Rayon Sports na Musanze FC kiratangiye.

20:20

IGICE CYA MBERE KIRARANGIYE

48+3' Igice cya mbere cy'umukino wa Rayon Sports na Musanze FC cyarangiye amakipe yombi anganye ubusa ku busa. Agiye kuruhuka mbere y'uko agaruka mu gice cya kabiri.

20:19

Koruneri ya Musanze FC

46' Abakinnyi ba Musanze FC bari gusatirana ingoga izamu ririnzwe na Hakizimana Adolphe. Koruneri yabonye mu minota ya nyuma nta cyo yabyaye.

20:16

Iminota y'inyongera

45' Umusifuzi wa Kane, Dushimimana Eric yazamuye iminota itatu y'inyongera mbere y'uko igice cya mbere cy'umukino kirangira.

20:09

Umukino uratuje

39' Kuri ubu abakinnyi bari gukinira hagati mu kibuga bacungana ku mpande zombi. Rayon Sports na Musanze FC nta kipe irareba mu izamu ry'indi.

20:06

Rayon Sports iracyagerageza kubaka igitego

35' Onana Léandre Willy Essomba yazamukanye umupira acenga ba myugariro ba Musanze FC ariko umupira bawushyira muri koruneri yatewe na Paul Were ariko ntiyatanga umusaruro.

20:03

Ikarita y'umuhondo kuri Rayon Sports

31' Onana Léandre Willy Essomba yahawe ikarita y'umuhondo nyuma yo guterana amagambo n'umusifuzi avuga ko ikipe ye ya Rayon Sports yibwe.

20:02

Rayon Sports yabuze amahirwe yabazwe

30' Abakinnyi ba Rayon Sports bazamukanye umupira, Mucyo Didier awuteye Muhawenayo Gad arawufata uramucika ariko Muhire Annicet ‘Gasongo’ awukuzamo ukuboko. Umusifuzi wo ku ruhande Maniragaba Valery yahise avuga ko Mucyo yateye umupira wari warenze.

19:59

Gusimbuza kwa Rayon Sports

26' Ndizeye Samuel wagize imvune yasimbuwe na Ngendahimana Eric ukirutse imvune vuba.

19:58

Imvune ya Ndizeye Samuel yakomeye

23' Ndizeye Samuel wagize imvune yaje gukomererwa ndetse asohorwa mu kibuga ajya kwitabwaho n'abaganga.

19:55

Rayon Sports iracyakomanga

20' Abakinnyi ba Rayon Sports bakomeje gukoresha imbaraga nyinshi mu gusatira izamu rya Musanze FC mu gushaka ko babona igitego cy'intsinzi.

19:54

Ndizeye Samuel yagize imvune yoroheje

13' Ndizeye Samuel yagize ikibazo cy'imvune asohoka afashe urutugu nk'uri kubabara. Nyuma yo kwitabwaho n'abaganga yasubiye mu kibuga.

19:37

Rayon Sports yatangiye isatira

6' Paul Were uri kugaragaza amashagaga muri uyu mukino yazamukanye umupira awucomekera Arsene Tuyisenge, ateye ishoti rikomeye umupira unyura hanze y'izamu ririnzwe na Muhawenayo Gad.

19:35

Paul Were yakoreweho ikosa

2' Ku munota wa kabiri gusaw'umukino, Rutahizamu wa Rayon Sports, Paul Were yakoreweho ikosa abanza kwicara yitabwaho n'abaganga ariko arongera asubira mu kibuga nyuma yo kuvurwa.

19:33

UMUKINO URATANGIYE

1' Nsabimana Celestin yatangije umukino wa Rayon Sports na Musanze FC.

19:32

Abakinnyi babanjemo ku ruhande rwa Rayon Sports

Abakinnyi babanjemo ku ruhande rwa Rayon Sports: Hakizimana Adolphe, Mucyo Junior Didier, Muvandimwe Jean Marie Vianney, Ndizeye Samuel, Mitima Isaac, Mbirizi Eric, Raphael Osalue Olise, Paul Were, Tuyisenge Arsène, Boubacar Traoré na Onana Léandre Willy Essomba.

Abasimbura: Hategekimana Bonheur, Nkurunziza Felicien, Iradukunda Pascal, Iraguha Hadji, Kanamugire Roger, Bavakure Ndekwe Félix, Mugisha François Master, Ngendahimana Eric na Rudasingwa Prince

Umutoza: Haringingo Christian Francis

19:32

Abakinnyi babanjemo ku ruhande rwa Musanze FC

Abakinnyi babanjemo ku ruhande rwa Musanze FC: Muhawenayo Gad, Niyonshuti Gad, Harerimana Obed, Rulihoshi François Hertier, Muhire Annicet ‘Gasongo’, Nduwayo Valeur, Ntijyinama Patrick, Ben Ocen, Victor Omondi Ogondo na Erick Kanza Angua.

Abasimbura: Ntaribi Steven, Nyandwi Sadam, Dusabe Jean Claude, Manzi Aimable, Nshimiyimana Clement, Nshimiyimana Amran, Nduwayezu Jean Paul, Dufitumufasha Pierre na Nsengiyumva Isaac.

Umutoza: Frank Ouna

19:25

Abafana batangiye kwiyongera

Bitandukanye n'umukino wa mbere wahuje Kiyovu Sports na Mukura VS, abafana batangiye kuba benshi mu bice bitandukanye bya Stade ya Kigali. Abiganjemo aba-Rayon benshi batangiye gukoma ingoma no kuvuza induru mu kwereka abakinnyi babo ko babari inyuma.

19:24

Amakipe yombi yamaze kwishyushya

Abakinnyi ba Rayon Sports na Musanze FC bamaze kwishyushya mbere y'uko binjira mu kibuga aho bagiye guhatanira itike yo gukomeza ku mukino wa nyuma wa Made in Rwanda Cup 2022. Ikipe itsinda hagati y'izi zombi izahura na Kiyovu Sports yasezereye Mukura VS iyitsinze igitego 1-0.

Umukino wa nyuma ndetse n'uw'umwanya wa gatatu izakinwa ku Cyumweru, tariki ya 9 Ukwakira 2022.

19:19

Ikaze i Nyamirambo

Twongeye kubaha ikaze kuri Stade ya Kigali i Nyamirambo ahagiye kubera umukino wa kabiri mu Irushanwa rya Made in Rwanda Cup 2022, uhuza Rayon Sports na Musanze FC.