Kiyovu Sports ifashe umwanya wa mbere nyuma yo kunganya na Gasogi United ubusa ku busa mu mukino w'Umunsi wa 16 wa Shampiyona waberaga mu Bugesera.

Urucaca rugize amanota 31 ku mwanya wa mbere, rurusha inota rimwe AS Kigali izakira Marines FC ku wa Gatandatu.

Turabashimiye mwese twabanye kuri uyu mukino, tuzasubire ku mukino uzahuza AS Kigali na Marines FC.

Ku nshuro ya gatanu yikurikiyanya, Kiyovu Sports inaniwe gutsinda Gasogi United muri Shampiyona.

Mu mikino ine iheruka, Gasogi United yatsinze imikino ibiri iheruka, indi ibiri ibanza zari zanganyije.

Ravel Maxwell Djoumekou asimbuwe na Nizigiyimana Abdukarim 'Mackenzi'.

Bizimana Hamiss ahinduye umupira mwiza mu rubuga rw'amahina, Iradukunda Bertrand awukinishije umutwe ujya ku ruhande rw'izamu.

Umusifuzi wa kane Mulindangabo Moise yerekanye iminota itatu y'inyongera nyuma yo kubibwirwa na Mukansanga Salima uri gusifura hagati.

Bugingo Hakim ateye ishoti rikomeye ahana ikosa ryakozwe na Mbonyingabo, umupira ufatwa neza na Nzeyurwanda Djihad.

Mbonyingabo Regis wambaye igitambaro cya Kapiteni wa Kiyovu Sports, ahawe ikarita y'umuhondo akiniye nabi Niyitegeka Idrissa hafi n'urubuga rw'amahina.

Bizimana Hamiss 'Coutinho' asimbuye Muhozi Fred ku ruhande rwa Kiyovu Sports.

Rugangazi Prosper asimbuye Ishimwe Kevin ku ruhande rwa Gasogi United.

Bigirimana Abeddy asimbuwe na Benedata Janvier ku ruhande rwa Kiyovu Sports ikoze impinduka za mbere mu mukino.

Bugingo Hakim ahawe ikarita y'umuhondo akiniye nabi Iradukunda Bertrand.

Abafana ba Kiyovu Sports bavugirije induru umusifuzi Mukansanga Salima, baririmba bati "Warakecuye".

Ni nyuma yo guha ikarita y'umuhondo Tuyisenge Hakim bo batemera.

Tuyisenge Hakim wa Kiyovu Sports ahawe ikarita y'umuhondo kubera ibyo abwiye Mukansanga Salima [twe tutumvise].

Biturutse ku ikosa uyu musifuzi avuze ko Bigirimana Abeddy yakorewe na Djoumekou.

Gusa, na Abeddy ntiyishimiye ko umusifuzi yasifuye kandi yari afite umupira ku buryo bashobora gukora contre-attaque.

Hakizimana Felicien arokoye Kiyovu Sports ku mupira wari uhawe Maxwell Djoumekou. Steve Joly na we ahinduye umupira imbere y'izamu, ariko Tuyisenge Hakim awukuraho bigoranye.

Simo Kayo Joly Steve asimbuye Godwin Blessing ku ruhande rwa Gasogi United ikoze impinduka za mbere mu mukino.

Kiyovu Sports ikomeje kwisirisimba imbere y'izamu, ibonye ubundi buryo ku ishoti ritewe na Erissa Ssekisambu, umupira ukurwamo na Cuzuzo Aime Gael.

Mu bisa n'akavuyo mu izamu, Kiyovu Sports iteye umupira uvamo ariko abakinnyi barimo Bigirimana Abeddy berekana ko myugariro wa Gasogi United yawugaruriye inyuma y'umurongo.

Mu gihe ibyo byabaga, umukinnyi wa Gasogi United, Maxwell, akoze umupira mu rubuga rw'amahina, umusifuzi Mukansanga arabyihorera.

Bugingo Hakim akiniye nabi Nshimiyimana Ismael Pitchou, ikosa rihanwa Mugiraneza Frodouard uteye umupira ugahita usubizwa inyuma na myugariro wa Gasogi United.

Iradukunda Bertrand yinjiranye umupira mu rubuga rw'amahina, areba uko mugenzi we, Muhozi Fred ahagaze, arawumuhereza. Uyu wa nyuma ateye ishoti arebana n'izamu, umupira ujya hejuru.

Kiyovu Sports ni yo itangije igice cya kabiri ndetse itangiye isatira bikomeye Gasogi United.

Iminota 45 n'undi umwe w'inyongera irarangiye hano kuri Stade ya Bugesera.

Muhozi Fred akiniye nabi Ishimwe Kevin hafi n'urubuga rw'amahina. Ikosa rihanwe na Bugingo Hakim, umupira uhita ukurwaho na Ndayishimiye Thierry n'umutwe.

Maxwell Djoumekou Ravel ahushije igitego cyabazwe ku mupira acomekewe asiga ba myugariro ba Kiyovu Sports, ashatse kuroba umunyezamu Nzeyurwanda Djihad wari wasohotse awukora ujya muri koruneri.

Godwin Blessing azamutse wenyine ku ruhande rw'iburyo, aho gutera mu izamu atera umupira asa n'uwuhindura urarenga.

Bwari uburyo benshi bari bamaze kubaramo igitego ku ruhande rwa Gasogi United.

Erissa Ssekisambu ahushije uburyo bwiza ari wenyine imbere y'izamu, umupira awutera hanze.

Yari awubonye nyuma yi guhushwa na myugariro wa Gasogi United ubwo wari utewe na Hakizimana Felicien.

Hakizimana Felicien yinjiye mu rubuga rw'amahina rwa Gasogi United, ahindura umupira usanze Iradukunda Bertrand, ateye ishoti ryitambikwa na Kazindu Bahati Guy.

Yifashishije uruhande ruriho Hakizimana Felicien wa Kiyovu Sports, Blessing Godwin akomeje gushaka uburyo afungura amazamu nubwo kugeza none bitaramukundira.

Bigirimana Abeddy agushije Hakim Hamiss inyuma gato y'urubuga rw'amahina mu ruhande. Ikosa rihanwe na Bugingo Hakim uteye umupira unyuze hejuru gato y'izamu ririnzwe na Nzeyurwanda Djihad.

Maxwell Djoumekou ahushije igitego cyabazwe ku mupira yinjiranye mu rubuga rw'amahina, ateye ishoti rikomeye rikurwamo na Nzeyurwanda Djihad utabawe na mugenzi we ushyize umupira muri koruneri.

Muhozi Fred akiniwe nabi na Blessing Godwin, ikosa rihanwa na Hakizimana Felicien. Umupira ushyizweho umutwe na Ndayishimiye Thierry, ujya hanze.

Kiyovu Sports ihawe umupira uteretse utewe na Hakizimana Felicien, ugeze kuri Iradukunda Bertrand akinisha umutwe, ariko ku bw'amahirwe make ye ufatwa neza na Cuzuzo Aime Gael.

Iradukunda Bertrand ahinduye umupira ahagana inyuma y'urubuga rw'amahina, ugeze kuri Bigirimana Abeddy arawuhusha. Muhozi agerageje gutera ishoti rijya ku ruhande rw'izamu rya Gasogi United.

Hakizimana Abdulkarim azamukanye umupira mu ruhande rw'iburyo, awuhinduye mu rubuga rw'amahina ukurwaho na Tuyisenge Hakim uwushyize muri koruneri,

Kiyovu Sports ibonye umupira uteretse ahagana muri metero nka 30 uvuye ku izamu, ishoti ritewe na Nshimiyimana Ismael Pitchou rijya hejuru kure y'izamu.

Amakipe yombi akomeje gukina asa n'ayigana muri iyi minota ya mbere.

Umupira uri gukinirwa cyane hagati mu kibuga nubwo Kiyovu Sports isa n'iyabyize Gasogi United yabaye nk'isubira inyuma gato.

Mukansanga Salima atangije uyu mukino w'Umunsi wa 16 wa Shampiyona hagati ya Gasogi United na Kiyovu Sports.


Gasogi United yakiriye uyu mukino, yambaye amabara yayo ya Orange n'Umukara.

Kiyovu Sports yambaye umweru de ufite umurongo w'icyatsi imbere na nimero zandikishije icyatsi.

Umusifuzi mpuzamahanga Mukansanga Salima ni we wagiriwe icyizere cyo kuyobora uyu mukino.

Mukansanga aherutse gusifura Igikombe cy'Isi cy'Abagabo cyabereye muri Qatar.

Azasifura kandi Igikombe cy'Isi cy'Abagore kizabera muri uyu mwaka.

Umutoza Kiwanuka Paul yahisemo gukoresha:

Cuzuzo Aime Gael
Kazindu Bahati Guy (c)
Bugingo Hakim
Hakuzimana Abdul Karim
Kwizera Aimable
Kaneza Augustin
Niyitegeka Idrissa
Ishimwe Kevin
Maxwell Djoumekou
Blessing Godwin
Hamissi Hakim

Umutoza Mateso Jean de Dieu wasigaranye Kiyovu Sports yifashishije:

Nzeyurwanda Djihad
Mbonyingabo Regis
Hakizimana Felicien
Tuyisenge Hakim
Ndayishimiye Thierry
Nshimiyimana Ismael Pitchou
Bigirimana Abeddy
Mugiraneza Frodouard
Iradukunda Bertrand
Erissa Ssekisambu
Muhozi Fred.

Graphic: Perezida wa Kiyovu Sports Ltd, Mvukiyehe Juvénal, yakoresheje ijambo rikakaye mu gusubiza KNC wigambye ko ari bumutsinde.#SiporoHejuruCyane pic.twitter.com/fXswyhQgp9

— IGIHE Sports (@IGIHESports) January 20, 2023

Kakoza Nkuriza Charles- KNC uyobora Gasogi United yavuze ko yongera gutsinda Kiyovu Sports nk’uko yabikoze mu mukino ubanza, warangiye ku bitego 3-1.

Bimaze kumenyerwa ko umukino uhuza Gasogi United na Kiyovu Sports utaba woroshye. Gukomera kwawo ntigushingiye ahanini ku bakinnyi b’ibitangaza cyangwa abatoza badasanzwe ahubwo ni amagambo y’abayobozi b’aya makipe buri gihe awubanziriza.

Hari n'abafana ba Kiyovu Sports kugeza uyu munsi batiyumvisha uburyo batsindwa n'iyi kipe, bagashinja abayobozi babo kugurisha umukino bahuramo na yo.

Ni ku nshuro ya cyenda amakipe yombi agiye guhura muri Shampiyona.

Gasogi United yatsinzwe inshuro imwe gusa muri iyi mikino yayihuje na Kiyovu Sports. Ni mu mukino wabaye muri Gicurasi 2021 mu mikino y'amatsinda, urangira ari ibitego 4-1.

Iyi kipe yazamutse mu Cyiciro cya Mbere muri Nzeri 2019, yatsinze indi mikino itanu irimo ibiri iheruka ku bitego 2-0 na 3-1.

Mu mukino wagombaga kuyorohera, Police FC yatsinze bigoranye Gorilla FC ibitego 3-2 mu mukino wabanjirije iyindi yose yo kwishyura kuri uyu wa Gatanu.

Uyu mukino na wo wabereye hano mu Bugesera.

Police FC y'umutoza Mashami Vincent yabanje gutsindirwa ibitego bitatu na Hakizimana Muhadjiri, Mugisha Didier na Ntwari Evode.

Mu minota 15 ya nyuma ni bwo Gorilla FC yatsinze ibitego bibiri byinjijwe na Bobo Camara ndetse Iradukunda Simeon.

Igicamunsi cyiza! IGIHE ibahaye ikaze kuri Stade y'Akarere ka Bugesera. Hagiye kubera umukino w'Umunsi wa 16 wa Shampiyona hagati ya Gasogi United na Kiyovu Sports.

Turi ku munsi wa mbere w'imikino yo kwishyura muri Shampiyona y'umupira w'amaguru.

Gasogi United yari isanzwe yakirira kuri Stade ya Kigali, yahisemo ko imikino yayo izajya ibera mu Bugesera kubera ko ikibuga cy'i Nyamirambo kiri kuvugururwa.

Umukino nyir'izina ni mukanya saa Cyenda n'Igice.