Kiyovu Sports vs Mukura Victory Sports

Kiyovu Sports 0-0 Mukura Victory Sports

Uko umukino uri kugenda

Umwanditsi

: Eric Tony Ukurikiyimfura

Amafoto

: Ntare Julius

16:55

Kiyovu Sports itakaje amanota abiri y'ingenzi

Kiyovu Sports yirangayeho, inganya na Mukura VS ubusa ku busa mu mukino w'Umunsi wa 27 wa Shampiyona waberaga i Muhanga.

Iyi kipe yambara icyatsi n'umweru ikomeje kuyobora Shampiyona n'amanota 57, irusha atatu APR FC ya kabiri, yo yanganyije na AS Kigali igitego 1-1 mu gihe hasigaye imikino itatu gusa.

Rayon Sports iri ku mwanya wa gatatu n'amanota 52.

Undi mukino wabaye ni uwo Etincelles FC yatsinzemo Police FC igitego 1-0.

Turabashimiye mwese twabanye kuri uyu mukino, tuzasubire ku Cyumweru ku mukino wa Espoir FC na Rayon Sports.

16:53

Umukino urarangiye

16:52

90+5' Gusimbuza

Muyumbu Osam na Kamanzi Ashraf basimbuye Iradukunda na Mico Justin.

16:51

90+4' Nsabimana arokoye Kiyovu SC

Habamahoro Vincent ahawe umupira mwiza mu rubuga rw'amahina, ashatse kuwukina, Nsabimana Aimable ahita awukuraho.

16:50

90+2' Coup-franc nziza ya Kiyovu Sports

Muhoza Tresor akiniye nabi Bigirimana Abedi inyuma gato hafi ku murongo w'urubuga rw'amahina.

Umusifuzi Rulisa wemeje ibi, ntiyemeranyije na benshi barimo abakinnyi ba Mukura VS bahise bamuzenguruka.

Riyaad Norodien, ateye umupira ukomeye ugonga urukuta.

16:47

90' Iminota itanu y'inyongera

Umusifuzi wa Kane, Ruzindana Nsoro, yerekanye iminota itanu y'inyongera.

Kiyovu Sports irabasha kubona igitego? Mukura VS yo?

16:47

90' Gusimbuza

Mahoro Fidel asimbuye Mukogotya Robert.

16:46

90' Mukura VS ibonye amahirwe iyatera inyoni

Mukogotya azamukanye umupira ahitamo gukinana na Mico Justin uteye ishoti rijya hejuru kure y'izamu.

16:45

88' Mukura VS irarokotse

Bigirimana Abedi ateye umupira usubijwe inyuma na Sebwato akinishije amaguru, usubizwamo na Norodien, ukurwamo na Kayumba Soter mu gihe umunyezamu yari akiri hasi.

16:42

86' Kiyovu Sports yongeye guhusha uburyo bwiza

Norodien ahinduye umupira mwiza usanze Bigirimana Abedi mu rubuga rw'amahina, awukinishije umutwe ujya ku ruhande rw'izamu.

16:41

Ku bindi bibuga


APR FC 1-1 AS Kigali
Etincelles FC 1-0 Police FC

16:38

82' Gusimbuza

Iradukunda Bertrand asimbujwe Bizimana Hamissi 'Coutinho'.

16:36

80' Gusimbuza

Nsabimana Emmanuel asimbuye Hakizimana Zubel

16:34

78' Kiyovu Sports ihushije uburyo bwabazwe

Ssekisambu ahawe umupira asigaranye n'umunyezamu Sebwato anamucaho, ariko awuhinduye mu izamu ntiwajyamo, urengera ku ruhande.

16:33

77' Mukura VS yirangayeho

Mukogotya ahinduye umupira Iradukunda na Mico Justin bananirwa kuwukina, ugeze kuri Zubel na we awugarura hagati ukurwaho n'abakinnyi ba Kiyovu Sports.

16:31

75' Imvura yatangiye gutonyanya

Mu gihe Sebwato na Bigirimana bamaze guhaguruka, imvura yageze ku butaka i Muhanga.

Abafana batari benshi bari bicaye ahadatwikiriye, bari gushaka uburyo bajya kugama ahasakaye.

16:29

73' Kiyovu Sports yongeye gukomanga

Kiyovu Sports ibonye uburyo bw'umupira uteretse utewe na Norodien, usanga Sebwato uwurwaniye na Bigirimana Abedi baragongana ndetse bombi bari kwitabwaho n'abaganga.

16:26

70' Uburyo bwa Kiyovu Sports

Bigirimana Abedi acomekewe umupira muremure yinjiranye mu rubuga rw'amahina, awuteye ku izamu habura mugenzi we uwugeraho ujya hanze.

16:20

65' Gusimbuza

Muhozi Fred asimbuwe na Riyaad Norodien.

16:17

60' Amakipe yombi aracyashaka igitego

16:16

59' Coup-franc ya Kiyovu Sports

Benedata Janvier wari wihishe inyuma ya Pitchou na Bertrand, ateye umupira ahana ikosa ryakorewe kuri Muhozi, ufatwa neza na Sebwato Nicolas.

16:15

58' Ikarita y'umuhondo

Nisingizwe Christian ahawe ikarita y'umuhondo akiniye nabi Muhozi Fred hafi y'urubuga rw'amahina.

16:10

52' Coup-franc ya Mukura VS

Benedata Janvier akiniye nabi Iradukunda Elie Tatou, ikosa rihanwe na Muhoza Tresor, umupira ukozweeho na Ngirimana Alexis n'umutwe ujya hejuru y'izamu.

16:08

51' Kiyovu Sports ibuze amahirwe akomeye

Muhozi Fred ahinduye umupira mu rubuga rw'amahina, usanga Bigirimana Abedi uwuteye yikaraze, ukubita umutambiko w'izamu uvamo.

Benshi bari bategereje kureba icyo umusifuzi Rulisa abivugaho.

16:06

49' Ubundi buryo bwa Kiyovu Sports

Nshimirimana Ismail Pitchou ahawe umupira na Iradukunda Bertrand, atera ishoti rifashwe neza na Sebwato.

16:04

47' Kiyovu Sports ihushije uburyo bwiza

Muhozi Fred ateye umupira ukuwemo na Sebwato, usanga Ssekisambu awusubizamo witambikwa na Soter, usanze Bigirimana Abedi atera ishoti rifashwe neza n'umunyezamu wa Mukura VS mu gihe Abayovu bari babaze igitego.

16:02

46' Igice cya kabiri cyatangiye

Mukura VS yongeye kugaruka iri hejuru mu mukino nubwo umupira wa mbere ntacyo utanze, ahubwo ukaruhukira mu biganza bya Kimenyi Yves.

15:48

Igice cya mbere kirarangiye

15:48

45+2' Coup-franc nziza ya Kiyovu Sports

Iradukunda Bertrand ateye umupira ukomeye ahana ikosa rikorewe kuri Ssekisambu, ukorwaho na Sebwato ukomeza hejuru muri koruneri.

Umusifuzi Rulisa ahise abwira abakinnyi ko iminota yarangiye.

15:47

45+2' Ikarita y'umuhondo

Kayumba Soter ahawe ikarita y'umuhondo akiniye nabi Ssekisambu Erisa.

15:44

45' Iminota ibiri y'inyongera

Umusifuzi wa Kane, Ruzindana Nsoro, yerekanye iminota ibiri y'inyongera.

Amakipe yombi aracyarwana no kubona izamu.

15:41

40' Uburyo bwa Kiyovu Sports

Muhozi Fred ateye umupira mu rubuga rw'amahina ashaka abarimo Iradukunda Bertrand na Nshimirimana Ismail, ariko umunyezamu Sebwato aba maso, ahita awufata neza.

15:35

34' Kiyovu Sports irarokotse

Mukogotya Robert yinjiranye umupira mu rubuga rw'amahina, atera ishoti rikomeye rinyuze kuri Kimenyi rigonga igiti cy'izamu rivamo.


Abakinnyi ba Mukura VS bahise bifata mu mutwe.

Iyi kipe yambara umuhondo n'umweru, ibonye kandi koruneri itewe, Ngirimana Alexis akinishije umutwe, umupira uca ku ruhande rw'izamu.

15:32

32' Abayovu bitereye mu bicu

Igitego AS Kigali itsinze APR FC mu wundi mukino uri kubera mu Bugesera, gihagurukije abafana ba Kiyovu Sports bari i Muhanga.

Kiyovu Sports ifite amanota 57, APR FC ifite 53 kugeza ubu.

15:28

27' Uburyo bwiza bwa Kiyovu Sports

Muhozi Fred yinjiranye umupira, asubiza hagati usanga Bigirimana Abedi uteye ishoti rica ku ruhande rw'izamu ririnzwe na Sebwato.

Gusa hagati aho, Mukura VS ntitanga agahenge.

15:27

25' Uburyo bwa Kiyovu Sports

Ssekisambu agowe na Muhoza Tresor, atanga umupira kuri Muhozi Fred uteye ishoti ridakomeye rifatwa na Sebwato Nicolas ubanje kuryama.

15:25

24' Mukura VS ikomeje gusatira

Na none ni undi mupira ugannye ku izamu rya Kiyovu!

Mukogotya ateye koruneri, Serumogo araryama akiza izamu.

15:22

21' Coup-franc ya Mukura VS

Nsabimana Aimable akiniye nabi Mukogotya Robert hagati mu rubuga rwa Kiyovu Sports.

Ikosa rihanwe n'uyu mukinnyi wa Mukura VS, umupira ukomeye wagenderaga hasi ukurwamo na Kimenyi Yves.

15:16

15' Mukura VS ibuze amahirwe

Mukura yongeye guhusha uburyo bw'umupira utewe na Habamahoro, ujya muri koruneri.

Hari nyuma y'amasegonda make Mukogotya agowe no kugumana umupira kuri contre-attaque yari akoze.

15:15

15' Gusatira kwa Kiyovu Sports

Kiyovu Sports ibonye koruneri ku mupira urengejwe na Muhoza Tresor utabyemera, utewe na Pitchou, umupira ukurwaho na Mico Justin.

15:13

11' Mukura VS ihushije uburyo bwabazwe

Hakizimana Zubel abonye umupira mwiza yinjiranye mu rubuga rw'amahina, atera ishoti rikuwemo na Kimenyi Yves akinishije amaguru.

Bwari uburyo bwabazwe.

Umupira ugarukiye Habamahoro Vincent atera ishoti rinyuze ku ruhande rw'izamu.

15:11

10' Gusatira kwa Kiyovu Sports

Iracyadukunda Eric ahinduye umupira uje mu kirere, Bigirimana Abedi awutera n'umutwe mbere y'uko Rulisa avuga ko yakiniye nabi myugariro wa Mukura VS.

15:05

6' Umukimno watangiranye imbaraga

Kiyovu Sports na Mukura VS ziri gukinana imbere nyinshi muri iyi minota ya mbere.

Abakinnyi b'amakipe yombi bakomeje gushaka uko begera izamu, cyane aba Mukura VS yamaze kubona koruneri imwe.

15:02

3' Uyu mukino ni ingenzi kuri Kiyovu Sports

Kiyovu Sports ya mbere n'amanota 56, ikeneye gutsinda kugira ngo igume kugira ikinyuranyo hagati yayo na APR FC ya kabiri ndetse na Rayon Sports iri hafi aho.

APR FC ifite amanota 53, iri gukina na AS Kigali mu Bugesera.

Rayon Sports ya gatatu n'amanota 52, izakirwa na Espoir FC ku Cyumweru.

14:59

Umukino uratangiye

Kiyovu Sports ni yo itangije umupira muri uyu mukino ugiye gusifurwa na Rulisa Patience.

Karangwa Justin na Nsabimana Evariste bari gusifura ku ruhande.

Umusifuzi wa kane ni Ruzindana Nsoro naho Hicuburundi JMV ni Komiseri w'Umukino.

14:56

Amakipe yombi yamaze kugera mu kibuga

Amakipe yombi yamaze gusohoka mu rwambariro ndetse mu minota itatu iri imbere umukino uraba utangiye.

14:56

Abakinnyi babanje mu kibuga ku ruhande rwa Mukura VS

Umutoza Afahamia Lotfi yitabaje:

Sebwato Nicolas
Kayumba Soter
Ngirimana Alexis
Kubwimana Cedric
Muhoza Tresor
Habamahoro Vincent
Nisingizwe Christian
Muco Justin
Hakizimana Zubel
Iradukunda Elie Tatou
Robert Mukogotya.

14:53

Abakinnyi ba Kiyovu Sports babanje mu kibuga

Umutoza Alain Andre Landeut yahisemo gukoresha:

Kimenyi Yves
Serumogo Ali
Iracyadukunda Eric
Ndayishimiye Thierry
Nsabimana Aimable
Benedata Janvier
Muhozi Fred
Nshimirimana Ismail
Erisa Ssekisambu
Bigirimana Abedi
Iradukunda Bertrand

14:45

Ikaze kuri Stade ya Muhanga

IGIHE ibahaye ikaze kuri Stade ya Muhanga ahagiye kubera umukino w'Umunsi wa 27 wa Shampiyona hagati ya Kiyovu Sports na Mukura VS,

Kiyovu Sports ya mbere n'amanota 56, yakiriye Mukura VS ya karindwi n'amanota 37.