Rayon Sports vs Vital'O FC

Rayon Sports 2-2 Vital'O FC

Uko umukino uri kugenda

Umwanditsi

: Ukurikiyimfura Eric Tony

Amafoto

: Ntare Julius

21:42

VIDEO: Ibyaranze umukino

18:00

Rayon Sports yanganyije na Vital'O FC ibitego 2-2

Rayon Sports inganyije na Vital'O FC yo mu Burundi ibitego 2-2 mu mukino wa gicuti waberaga kuri Kigali Pele Stadium.

Iyi kipe yambara ubururu n'umweru yakinnye uyu mukino yitegura undi izakina kuri Rayon Sports Day ku wa 5 Kanama 2023.

Nyuma yaho, izakina na APR FC kuri Super Coupe izaba tariki ya 12 Kanama mu gihe Shampiyona izatangira nyuma y'icyumweru kimwe.

17:58

Umukino urarangiye

17:57

90+3' Coup-franc nziza ya Rayon Sports

Joackiam Ojera akiniwe nabi inyuma y'urubuga rw'amahina, ikosa rihanwe na Tuyisenge Arsene uteye umupira uca hejuru gato y'izamu rya Vital'O FC.

17:55

90+1' Abafana ba Rayon Sports bacanye amatoroshi

Nk'uko bimaze kumenyerwa ku mikino yabo, mu minota ya nyuma, abafana ba Rayon Sports bacanye amatoroshi ya telefoni mu rwego rwo gutiza umurindi ikipe yabo ishaka igitego cy'intsinzi.

17:53

90' Iminota itanu y'inyongera

Umusifuzi wa kane, Nsabimana Celestin, yerekanye iminota itanu y'inyongera.

Amakipe yombi akomeje gushaka igitego gikora ikinyuranyo.

17:53

88' Coup-franc ya Rayon Sports

Rayon Sports ihushije uburyo bwiza ku mupira utewe hejuru na Youssef nyuma y'ikosa ryari ryakorewe kuri Iradukunda Pascal rigahanwa na Tuyisenge Arsene.

17:49

84' Gusimbuza

Iradukunda Pascal asimbuye Ndekwe Felix.

17:48

82' Rayon Sports irarokotse

Hategekimana Bonheur akuyemo umupira ukomeye mbere y'uko Mitima Isaac yitambika ku bundi buryo bwari busubijwemo n'abakinnyi ba Vital'O FC.

17:42

78' Youssef ntiyumva uburyo akinana na Esenu

Youssef Rharb akoze akantu, acenga myugariro wa Vital'O FC, atanze umupira usanga Musa Esenu ari wenyine, ananirwa kuwushyira mu izamu.

Uyu Munya-Maroc arahindukiye areba uyu Munya-Uganda, undi amusaba imbabazi.

17:40

71' Uburyo bwa Rayon Sports

Ndekwe Felix acomeye umupira Mucyo Didier Junior uwuhinduye mu rubuga rw'amahina, uca imbere y'izamu gato ujya hanze.

17:36

69' Rayon Sports irarokotse

Youssef yambuwe umupira, asigara aryamye hasi, Amissi Leon wari usigaranye n'umunyezamu Hategekimana Bonheur atera ishoti arikuramo mbere y'uko Ngendahimana Eric akuraho umupira.

17:32

66' Abafana ba Rayon Sports baryohewe

Abakunzi ba Rayon Sports bitabiriye uyu mukino i Nyamirambo, bishimiye kongera kubona amacenga y'Umunya-Maroc Youssef Rharb wagarutse muri iyi kipe mu minsi ishize.

17:28

62' Uburyo bwa Rayon Sports

Tuyisenge Arsene agerageje ishoti rikomeye atereye inyuma y'urubuga rw'amahina, umupira uca hirya gato y'izamu rya Vital'O FC.

17:25

61' Gusimbuza

Hategekimana Bonheur, Tuyisenge Arsene, Mucyo Didier na Mitima Isaac basimbuye Simon Tamale, Bugingo Hakim, Serumogo Ali na Rwatubyaye Abdul.

17:23

60' Igitego cya kabiri cya Rayon Sports

Youssef Rharb acomekeye umupira mwiza Musa Esenu utsinze igitego cya kabiri cya Rayon Sports.

Vital'O FC yari imaze akanya ikina ineza, itakaje umupira ikosorwa na Rayon Sports.

17:22

58' Ikarita y'umuhondo

Musa Esenu ahawe ikarita y'umuhondo akiniye nabi myugariro Ndavyutse.

17:18

54' Igitego cya kabiri cya Vital'O FC

Vital'O FC ibonye igitego cya kabiri cyinjijwe na Issa Hubert ku makosa y'umunyezamu Simon Tamale wari ukinishije amaguru akawutanga nabi.

17:16

52' Rayon Sports igize amahirwe

Rwatubyaye Abdul yari atakaje umupira, atabarwa na mugenzi we, Aruna Madjaliwa uhise uwumbura rutahizamu wa Vital'O FC wari winjiye mu rubuga rw'amahina.

17:14

51' Gusimbuza

Jonathan Ifunga Ifasso asimbuwe na Kanamugire Roger.

17:12

48' Gusatira kwa Rayon Sports gusubijwe inyuma

Joackiam Ojera ahinduye umupira mwiza mu rubuga rw'amahina, ugeze kuri Esenu akinisha umutwe, ariko umusifuzi wo ku ruhande yerekana ko habayeho kurarira.

17:09

46' Igice cya kabiri cyatangiye

17:08

Gusimbuza

Musa Esenu, Joackiam Ojera, Aruna Madjaliwa na Youssef Rharb basimbuye Nsabimana Aimable, Iraguha Hadji, Mbirizi Eric na Rudasingwa Prince.

16:51

Igice cya mbere kirarangiye

16:48

Abakinnyi Rayon Sports yabanje mu kibuga bavugishije benshi

Ikipe ya Rayon Sports ikimara gushyira hanze urutonde rw'abakinnyi 11 bagiye kubanza mu kibuga, abafana n'abakunzi bayo batanze ibitekerezo bigaragaza uko babyakiriye.

Benshi bagushije ku kwerekana ko batunguwe n'uko ab'amazina akomeye batabanjemo.













16:47

44' Igitego cyo kwishyura cya Vital'O FC

Ndayisenga Eliphat yishuriye Vital'O FC ku mupira umusanze mu rubuga rw'amahina nyuma yo guhindurwa na Harerimana.

16:43

40' Rayon Sports ihushije uburyo bwiza

Mbirizi Eric wari kumwe na Ifasso, ahushije uburyo bw'igitego cya kabiri ari mu rubuga rw'amahina, atera ishoti rigiye hejuru y'izamu.

16:40

39' Igitego cya Rayon Sports

Rayon Sports ifunguye amazamu ku gitego cyinjijwe na Rudasingwa Prince n'umutwe nyuma yo gusumba abakinnyi ba Vital FC no gusohoka nabi k'umunyezamu ubwo Serumogo yari ahinduye umupira.

16:40

38' Vital'O FC ihushije igitego cyabazwe

Harerimana Amissi ahinduye umupira usanze Ndayisenga Eliphat atera ishoti adahagaritse, umupira ujya ku ruhande rw'izamu.

16:34

31' Ikarita y'umuhondo

Ndikumana Chris ahawe ikarita y'umuhondo akiniye nabi Ifunga Ifasso Jonathan wa Rayon Sports.

16:31

28' Uburyo bubiri kuri Rayon Sports

Rayon Sports yinjiranye umupira uhawe Ndekwe Felix uhise utera mu izamu, ufatwa neza n'umunyezamu Irambona Valley.

Gikundiro ibonye kandi uburyo bw'umupira uhinduwe na Serumogo Ally, ushyizweho ikirenge na Rudasingwa Prince ujya hejuru y'izamu.

16:26

22' Ubundi buryo bwa Vital'O FC

Ndayisenga Eliphat acomekewe umupira mwiza, atikisha Serumogo Ally aramuhindukirana, ateye ishoti rikomeye rica ku ruhande gato rw'izamu.

16:24

21' Rayon Sports yirangayeho

Ifunga Ifasso akinanye neza na Ndekwe Felix uteye ishoti rikomeye adahagaritse, umupira uzamuka hejuru y'izamu.

Bwari uburyo bwiza bwashoboraga gukora ikinyuranyo.

16:23

18' Abarundi bari kwigaragaza neza i Nyamirambo

Vital'O FC ifite abakinnyi beza barimo Nimubona Kessy Jordan uri gukina ku ruhande rw'iburyo asatira izamu.

Uyu mukinnyi acenze Bugingo Hakim na Ngendahimana Eric, ariko ashatse gutera mu izamu, umupira ukubita ku kuguru k'umukinnyi wa Rayon Sports usubira inyuma.

16:21

17' Uburyo bwa Vital'O FC

Irakoze Amissi Leon ahawe umupira mwiza mu rubuga rw'amahina, ashatse gutsinda ku giti cy'izamu cya kabiri, umupira uramutenguha ujya ku ruhande.

Yari aherejwe neza na Niyonizeye Fred.

16:17

12' Vital'O FC ni yo kipe nziza kugeza ubu

Vital'O FC iri gukina neza muri iyi minota ibanza y'umukino.

Rayon Sports ntirabasha guhuza neza, cyane hagati no mu busatirizi.

Abafana bitabiriye uyu mukino nubwo atari benshi ahatwikiriye bitewe n'ibiciro byawo.

16:14

Abakinnyi ba Vital'O FC babanje mu kibuga

Umutoza Sahabo Paris yifashishije:

30.Irambona Valley (GK)
4.Niyonizeye Fred (C)
3. Ndavyutse Amedii
24.Bigirimana Alfoni
2. Ndikumana Chris
13.Hubert Issa
15.Harerimana Amissi
19. Ndayisenga Eliphat
17.Irakoze Amissi Leon
11.Mpitabakana Aristide
7. Nimbona Kessy Jordan

Abasimbura:

22. Niyontima Salim
14. Kwizera Hussein
20. Gakori Djuma
5. Harerimana Didier
6. Djuma Issa
16. Uwimana Yakubu
12. Irakoze Karim
10. Nzeyimana Jean
26. Ramadhani Abdul Karim
8. Ntahobari Asman
9. Sadiki Faray

16:11

Abakinnyi Rayon Sports yabanje mu kibuga

Umutoza Yamen Zelfani yahisemo gukoresha:

Simon Tamale
Serumogo Ally
Bugingo Hakim
Rwatubyaye Abdul (c)
Nsabimana Aimable
Ngendahimana Eric
Mbirizi Eric
Ndekwe Felix
Iraguha Hadji
Ifunga Ifasso Jonathan
Rudasingwa Prince

16:07

3' Coup-franc ya Rayon Sports

Jonathan Ifunga Ifasso ashatse kwinjira umupira mu rubuga rw'amahina, ukorwa na myugariro wa Vital'O FC ku murongo w'urubuga rw'amahina.

Ikosa rihanwe na Mbirizi Eric, atera umupira mu rukuta usubira inyuma.

16:04

Umukino uratangiye

Umukino uyobowe n'umusifuzi Rulisa Patience ndetse abasifuzi bose ni Abanyarwanda.

Rayon Sports yambaye imyenda yayo isanganywe, yari ifite mu mwaka ushize w'imikino aho kuba imishya iheruka kwerekana.

Birashoboka ko iyindi yabikiwe Rayon Sports Day.

Vital'O FC na yo yambaye ibara ryayo 'move'.

16:03

Amakipe yombi yishyushya

16:02

Ikaze kuri Kigali Pelé Stadium

IGIHE ibahaye ikaze kuri Kigali Pelé Stadium ku mukino wa gicuti uri guhuza Rayon Sports na Vital'O FC yo mu Burundi.

Amakipe yombi ari kwitegura umwaka w'imikino mushya wa 2023/24.