Musanze FC vs Rayon Sports

Musanze FC 1-0 Rayon Sports

Uko umukino uri kugenda

Umwanditsi

: Byiringiro OSee

Amafoto

: Ntare Julius

05:09

Ibyaranze umukino wa Musanze FC na Rayon Sports



17:11

Musanze FC yisubije umwanya wa mbere itsinze Rayon Sports

Musanze FC itsinze Rayon Sports igitego 1-0 cya Peter Agblevor, igira amanota 16 ku mwanya wa mbere, irusha abiri APR FC ya kabiri.

Gikundiro igumanye amanota icyenda mu mikino itandatu imaze gukina, aho ifite ikirarane izahuramo na Police FC.

Mu yindi mikino yabaye, Police FC yatsinze AS Kigali igitego 1-0, igira amanota 10 ku mwanya wa gatanu naho Muhazi United igira amanota atandatu itsinze Etoile de l'Est igitego 1-0.

17:05

Umukino urarangiye



17:05

98’ Rayon Sports yirangayeho


Musa Esenu ahushije igitego asigaranye n’umunyezamu Muhawenimana Gad bonyine.

17:01

94’ Gusimbuza kwa Musanze FC


Tuyisenge Pacifique asimbuwe na Munyurangabo Leonidas.

16:59

90+2' Rayon Sports iri gusatira


Rayon Sports ikomeje gusatira ari nako Musanze Fc ikiza izamu, ireba uko iguma kuryama ku gitego cyayo.

16:58

Iminota 10 y’inyongera


Umusifuzi wa kane ashyizeho iminota 10 y’inyongera, abafana ba Musanze bavuza induru.

16:57

Police FC na Muhazi United zabonye intsinzi

Police FC yatsinze AS Kigali igitego 1-0 naho Muhazi United itsinda Etoile de l'Est 1-0 mu yindi mikino yabaga kuri iki Cyumweru.

16:54

Police FC ifunguye amazamu

Bigirimana Abedi atsindiye Police FC igitego cya mbere mu minota y'inyongera y'umukino uri kuyihuza na AS Kigali i Nyamirambo.

Arahabwa ikarita y'umuhondo kuko yakuyemo umupira.

16:53

85’ Migi abatangarije hakiri kare?


Umutoza wungirije wa Musanze FC, Mugiraneza Jean Baptiste ‘Migi’ ari kwereka abafana ba Rayon Sports ko batari buve kuri iki kibuga.

16:52

84’ Musanze yageze mu byo yibonamo kurusha ibindi

Abakinnyi ba Musanze FC ntibakiri gufunga umupira ahubwo bari gukina imiremire gusa ku buryo byagoye Rayon Sports kwisanga kuri iki kibuga nubwo umukino uri kugana ku musozo.

16:51

83’ Gusimbuza kwa Musanze

Tinyimana Elissa asimbuye Solomon Adeyinka usohotse mu kibuga yikanda mu mbavu.

16:49

81' Abafana ba Musanze FC bishimiye imvura iguye

Imvura iraguye, abafana ba Musanze FC bakoma amashyi bigaragara ko bizeye intsinzi bari bufashwemo n’ikibuga kibi.

16:45

77’ Gusimbuza kwa Musanze FC


Suley Mohammed asimbuye Peter Agblevor wagize imvune y’ukuboko.

16:44

76' Igitego Rayon Sports yari itsinze cyanzwe

Nyuma y’imvururu nyinshi cyane, Umusifuzi Rulisa Patience yisubiyeho, igitego aracyanga avuga ko Prince atsinze umupira umunyezamu yari yawufashe.

Umusifuzi wo ku ruhande yahagaze ku ijambo rye, agaragaza ko igitego kitari cyo.

16:41

74’ Rayon Sports yari ibonye igitego

Rudasingwa Prince atsinze igitego cya mbere cya Rayon Sports ku mupira Bugingo Hakim ateye agashyiraho umutwe.

16:38

70’ Gusimbuza kwa Rayon Sports


Bugingo Hakim asimbuye Ganijuru Elie, Rudasingwa Prince asimbura Mugisha François.

16:37

70' Rayon Sports ikomeje kwirangaraho

Rayon Sports ibonye koruneri enye zikurikiranya ariko igitego cyabuze.

16:34

67' Ikarita y'umuhondo

Nduwayo Valeur ahawe ikarita y’umuhondo ku ikosa akoreye Musa Esenu wari umucitse akamukurura.

16:33

66’ Rayon Sports iri kunyuzamo igasatira


Rayon Sports yongeye gusubira imbere y’izamu rya Musanze FC ariko koruneri iri kubona ntabwo zirabyara umusaruro.

16:29

62’ Musanze FC yongeye guhusha igitego


Peter Agblevor ahindukiye neza, atera ishoti umunyezamu Tamale arikuramo, ugarukira Nduwayo asongamo Mitima Isaac akiza izamu.

16:27

60’ Uburyo bwa Rayon Sports


Charles Baale ahinduye umupira imbere y’izamu, Muhawenimana Gad arawusuzugura uridunda, awushyira muri koruneri.

16:26

58’ Gusimbuza


Rayon Sports ikoze impinduka ya kabiri, Kalisa Rachid asimbura Iraguha Hadji.

16:22

55’ Musanze FC iri gusatira bikomeye


Solomon azamukanye umupira acenga Ganijuru amusiga aryamye, ahinduye umupira imbere y’izamu Tamale awufata neza.

16:16

50’ Igitego cya Musanze FC


Peter Agblevor atsinze igitego cya mbere cya Musanze FC ku mupira atereye mu kavuyo kari imbere y’izamu, Simon Tamale ntiyamenya aho unyuze.

16:11

46' Igice cya kabiri cyatangiye


Amakipe yombi yinjiye mu minota 45 ya nyuma itangijwe na Musanze FC iri gukinira mu rugo, imbere y'abafana buzuye Stade Ubworoherane.

16:10

Gusimbuza

Charles Baale asimbuye Tuyisenge Arsène ku ruhande rwa Rayon Sports.

15:55

Igice cya Mbere kirarangiye

Igice cya Mbere cyarangiye amakipe yombi anganya ubusa ku busa.

Abatoza bafite iminota 15 yo kuganiriza abakinnyi babo.

15:53

Akaruhuko i Nyamirambo n'i Ngoma

Igice cya Mbere cyarangiye ari ubusa ku busa hagati ya AS Kigali na Police FC mu gihe Etoile de l'Est yatsinzwe na Muhazi United igitego 1-0.

15:52

45+1’ Abafana ba Rayon Sports ntibanyuzwe


Luvumbu azamukanye umupira, Shafik araryama awumukuraho, umusifuzi avuga ko nta kosa ririmo, abafana ba Rayon Sports bagaragaza kutishimira icyo cyemezo.

15:49

45' Iminota itanu y’inyongera

Umusifuzi wa Kane yerekanye iminota itanu y’inyongera kugira ngo igice cya mbere kirangire.

15:48

42' Uburyo bwa Rayon Sports

Luvumbu afashe icyemezo azamukana umupira, atera ishoti rikomeye cyane, umunyezamu Muhawenimana ashyira umupira muri koruneri.

15:45

40' Umukino wagabanyije umuvuduko

Umukino watuje, amakipe yombi akomeje kugorwa n’ikibuga bityo imipira myinshi iri gukinirwa hejuru.

15:45

I Ngoma bafunguye amazamu

Muhazi United yatsinze igitego cya mbere ku munota wa 41 w'umukino uri kuyihuza na Etoile de l'Est.

15:40

35' Ikarita y'umuhondo

Musa Esenu ahawe ikarita y’umuhondo nyuma yo gukorera ikosa Muhire Anicet.

15:39

Ku bindi bibuga

34' AS Kigali 0-0 Police FC
35' Etoile de l'Est 0-0 Muhazi United

15:36

30’ Rayon Sports ihushije uburyo bwiza



Rwatubyaye ateye ‘coup franc’, umupira usanga Ngendahimana Eric uteye ishoti barikuramo.

15:30

23' Musanze FC ihushije igitego


Tuyisenge Pacifique ahushije igitego ku mupira wari uvuye muri koruneri, agerageze kuwutera yigaramye uca hanze gato y’izamu.

15:27

21' Umukino wakomeje

Rwatubyaye yasubiye mu kibuga nyuma yo kurushaho kuzirika ukuguru kwe kw'iburyo.

Amakipe yombi ari gukina imipira miremire.

15:24

18' Umukino uhagaze gato

Rwatubyaye Abdul ari kwitabwaho n'abaganga nyuma yo kugira imvune ku kuguru kw'iburyo n'ubundi kaziritse.

15:23

17' Gusatira kwa Musanze FC

Musanze FC yongeye gusatira bikomeye, Peter Agblevor ahinduye umupira imbere y'izamu, Simon Tamale awufata neza.

15:22

18' I Nyamirambo nta kipe irabona izamu

Ku mukino uri guhuza AS Kigali na Police FC i Nyamirambo, zombi zikomeje gushaka uko zafungura amazamu.

15:20

14' Uburyo bwiza bwa Rayon Sports

Ganijuru Elie ahinduye umupira imbere y'izamu, Umunyezamu Muhawenayo Gad awushyira muri koruneri itagize icyo itanga.

15:19

11' Rayon Sports yakangutse

Rayon Sports itangiye kwinjira mu mukino ariko yagerageza guhanahana bikagorana kubera ikibuga kinyerera cyane.

15:18

6' Ubundi buryo bwa Musanze FC

Musanze FC ikomeje gusatira ari na ko ba myugariro ba Rayon Sports, Rwatubyaye Abdul na Mugisha Francois wasubiye inyuma, bakiza izamu.

15:17

3' Musanze FC itangiye isatira

Musanze FC itangiranye imbaraga, ihushije igitego cyari cyabazwe ku mupira utewe neza na Matahana Kethago, Umunyezamu Simon Tamale awushyira muri koruneri.

15:13

Umukino uratangiye

Saa Cyenda n'iminota ibiri ni bwo umukino utangiye i Musanze, umupira wa mbere uterwa na Luvumbu ku ruhande rwa Rayon Sports.

15:12

Habanje gufatwa umunota wo kwibuka Perezida wa AS Muhanga

Mbere yo gutangira umukino hafashwe umunota kwibuka Ndayisaba Jean Damascène wahoze ari Perezida wa AS Muhanga uheruka kwitaba Imana.

15:11

Ababanje mu kibuga ku ruhande rwa Musanze FC

Umutoza Habimana Sostene yahisemo gukoresha:

Muhawenimana Gad
Ntijyinama Patrick
Kwizera Tresor
Muhire Anicet
Bakami Shafik
Nduwayo Valeur
Tuyisenge Pacifique
Nkurunziza Felecien
Peter Agblevor
Mathana Lethago
Solomon Adeyinka

15:11

Abakinnyi ba Rayon Sports babanje mu kibuga

Simon Tamale
Rwatubyaye Abdul
Mitima Isaac
Ganijuru Elie
Mugisha François
Ngendahimana Eric
Aruna Mussa Madjaliwa
Luvumbu Héritier
Musa Esenu
Iraguha Hadji
Tuyisenge Arsène

15:10

Ikaze ku Munsi wa Karindwi wa Shampiyona

IGIHE iri i Musanze ahari kubera umukino wa Musanze FC na Rayon Sports ndetse n'i Nyamirambo ahari kubera umukino wa AS Kigali na Police FC.

Undi mukino uri kuba kuri iki Cyumweru uri guhuza Etoile de l'Est na Muhazi United zihuriye ku kibuga cy'i Ngoma.