Rayon Sports vs Muhazi United

Rayon Sports 2-0 Muhazi United

Uko umukino uri kugenda

Umwanditsi

: Ukurikiyimfura Eric Tony

Amafoto

: Ntare Julius

08:35

Reba hano ibyaranze umukino

19:52

Rayon Sports ifashe umwanya wa kabiri, irushwa inota rimwe na APR FC


Rayon Sports itsinze Muhazi United ibitego 2-0, igira amanota 26 ku mwanya wa kabiri, irushwa inota rimwe na APR FC ya mbere nyuma y'imikino 13 imaze gukinwa.

Muhazi United igumye ku mwanya wa 11 n'amanota 14.

Mu yindi mikino yabaye kuri uyu wa Gatatu, Mukura VS yatsinze Kiyovu Sports ibitego 4-1 naho Etincellles FC itsinda AS Kigali ibitego 4-2.

Turabashimiye mwese twabanye kuri uyu mukino, tuzasubire ku wa Gatanu ku mukino APR FC izakiramo Gorilla FC.

19:51

Umukino urarangiye

19:47

90' Iminota ine y'inyongera

Umusifuzi wa Kane, Nsabimana Celestin, yerekanye iminota ine y'inyongera.

Amakipe yombi ari gusatirana muri iyi minota ya nyuma.

19:46

90' Gusimbuza

Musa Esenu asimbuwe na Charles Bbaale.

19:42

86' Rayon Sports yirangayeho

Ojera ananiwe gutsinda, umupira ukurwamo n'Umunyezamu Ebini, ugarukiye Arsene awushota Esenu uhise uwutsinda, umusifuzi agaragaza ko habayeho ikosa.

19:40

84' Serumogo abuze kwigirira icyizere

Serumogo Ali acenze myugariro wa Muhazi United yinjira mu rubuga rw'amahina, aho kwiterera mu izamu ashaka guha bagenzi be, abo mu Burasirazuba birwanaho.

19:36

80' Umukino winjiye mu minota 10 ya nyuma

19:34

78' Rayon Sports ibuze amahirwe

Ojera ananiwe gutsinda umupira ahawe na Luvumbu, awukurwaho n'Umunyezamu Ebini, ugarukiye uyu Munye-Congo atera ishoti rigiye ku ruhande rw'izamu.

19:32

76' Tamale atabaye Rayon Sports

Joseph Sackey ahannye ikosa ryakozwe na Rachid Kalisa, umupira uteretse ateye ukurwamo na Tamale, ujya muri koruneri.

19:31

75' Umutoza wa Rayon Sports yanze kwicara

Mohamed Wade yakomeje guhagarara kuva umukino utangiye kugeza na n'ubu.

19:28

72' Igitego cya kabiri cya Rayon Sports

Tuyisenge Arsene ahinduye umupira mwiza mu rubuga rw'amahina, Musa Esenu awutsinda yitonze nyuma yo gukinisha umutwe.

19:24

69' Gusimbuza

Tuyisenge Arsene asimbuye Youssef Rharb

19:23

67' Coup-franc nziza ya Rayon Sports

Luvumbu akiniwe nabi na Joseph Sackey inyuma gato y'urubuga rw'amahina.

Ikosa rihanwe n'uyu Munye-Cngo, atera umupira hejuru kure y'izamu.

19:21

65' Umukino uhagaze gato

Kalisa Rachid yicaye hasi nyuma yo gukinirwa nabi na Ndayishimiye Richard.

19:15

60' Gusimbuza

Kalanga Alphonse asimbuye Mbanza Caleb.

19:14

59' Ikarita y'umuhondo

Mutesasira Adam ahawe ikarita y'umuhondo akiniye nabi Muhire Kevin.

19:09

54' Rayon Sports ibuze amahirwe

Ojera ahaye umupira Luvumbu na we awucomekera Esenu uwuhinduye ashaka Youssef, myugariro wa Muhazi United awukuraho nabi ariko uyu Munya-Maroc yamaze kujya imbere.

19:07

51' Coup-franc ya Muhazi United

Muhamedi Kyune akiniwe na Ngendahimana Eric inyuma y'urubuga rw'amahina.

Ikosa rihanwe na Joseph Sackey, atera umupira mu rukuta.

19:04

49' Ikarita y'umuhondo

Marcel Kouathe ahawe ikarita y'umuhondo nyuma yo gusunika Youssef Rharb akamukubita hasi.

19:02

47' Rayon Sports yasabaga penaliti

Ojera akurikiye umupira agongana n'Umunyezamu Ebini Iniace agwa hasi, ariko abasifuzi barabyihorera mu gihe Rayon Sports yasabaga penaliti.

19:01

46' Igice cya Kabiri cyatangiye

Luvumbu atangije igice cya kabiri, akinana na Rachid uhise uhereza Kevin, na we asubiza inyuma kugira ngo Rayon Sports yubake.

18:47

Igice cya Mbere kirarangiye

Iminota 45 ibanza y'umukino uri guhuza amakipe yombi irangiye Rayon Sports ifite igitego 1-0.

18:46

45' Iminota ibiri y'inyongera

Umusifuzi wa Kane, Nsabimana Celestin, yerekanye iminota ibiri y'inyongera.

Muhazi United yari isatiriye ishaka kwishyura, Onesime agorwa no gukina umupira yinjiranye mu rubuga rw'amahina, urarenga.

18:41

41' Youssef yababaye

Youssef Rharb aryamye mu kibuga hagati ndetse ahamagarijwe abaganga kugira ngo bamwiteho nyuma yo gukandagirwa.

18:39

38' Muhazi United iri gukina neza

Nyuma yo gutsindwa igitego, kuri ubu Muhazi United ni yo kipe iri gukina neza mu minota ine ishize ndetse iri mu kibuga cya Rayon Sports.

18:34

33' Igitego cya Rayon Sports

Ojera agushijwe na Kouathe ku ikosa ritavugwaho rumwe, ku murongo w'urubuga rw'amahina.


Ikosa rihanwe na Muhire Kevin uteye umupira unyuze mu rukuta, uruhukira mu izamu nyuma yo gukora ku mukinnyi.

18:29

28' Rayon Sports iracyakomanga

Muhire Kevin ahaye umupira Nzinga Luvumbu witambitse, atera ishori ry'imoso rigendera hasi, ariko rinyura ku ruhande gato rw'izamu.

18:27

27' Ubundi buryo bwa Rayon Sports

Bugingo Hakim ahawe umupira ari inyuma y'urubuga rw'amahina, akaraga ishoti rinyuze ku ruhande rw'izamu rya Muhazi United.

18:27

26' Rayon Sports ihushije uburyo bwiza

Kalisa Rachid ahaye umupira Muhire Kevin, na we awuha Bugingo Hakim uwuhinduye mu rubuga rw'amahina, Ojera awukinnye n'agatsitsino uhura n'umunyezamu, ariko umusifuzi wo ku ruhande agaragaza ko habayeho kurarira.

18:23

21' Coup-franc nziza ya Rayon Sports

Rayon Sports ibonye umupira mwiza uteretse inyuma y'urubuga rw'amahina, utewe na Kalisa Rachid, usubizwa inyuma n'urukuta mbere y'uko Luvumbu awusubizamo ugafatwa n'umunyezamu Iniace.

18:21

20' Coup-franc ya Muhazi United

Kyune ahannye ikosa akinanan na Ndayishimiye Richard uhinduye umupira usanga Marcel Kouathe ushyizeho umutwe, ujya ku ruhande.

18:19

19' Uburyo amakipe yombi yambaye kuri uyu mugoroba

18:14

13' Uburyo bwa Rayon Sports

Joseph Sackey atakaje umupira ugeze kuri Youssef Rharb awuhindura mu izamu, ukurwamo na Iniace Ebini mbere y'uko mugenzi we awukuraho.

18:12

11' Gusatira kwa Rayon Sports

Luvumbu ahaye umupira Youssef ukozeho gato ahereza Ojera uhubutse, atera umupira ku ruhande.

18:09

8' Coup-franc ya Muhazi United

Mutijima Janvier akiniwe nabi na Kalisa Rachid, ikosa rihanwe, umupira usanga Onesme Twizerimana, ashyizeho umutwe ujya hejuru y'izamu.

18:07

6' Ojera akinnye neza, ariko agorwa no gukora igikenewe

Joackiam Ojera acitse Mutijima na Adam mu kibuga hagati, yinjirana umupira mu rubuga rw'amahina, ariko Mutijima aragenda awumukuraho atarawuhindura ndetse urenzwa n'uyu mukinnyi wa Rayon Sports.

18:05

4' Gusatira kwa Rayon Sports

Rayon Sports izamukanye umupira iburyo, Ojera uwinjiranye arawuhindura, ufatwa n'Umunyezamu Ebeni Iniace/

Rachid na we ateye ishoti rifashwe n'uyu munyezamu.

18:04

3' Rayon Sports yaciriye akarongo Muhazi United

Nubwo biri mu minota ya mbere ndetse na yo ikaba itarabona uburyo bugana mu izamu, Rayon Sports iri gusatira cyane Muhazi United, igakinira mu kibuga cyayp.

18:00

Umukino uratangiye

Muhazi United itangije umukino uyobowe n'Umusifuzi Ngaboyisonga Patrick.

17:48

Amakipe yombi ategerejwe mu kibuga

Muhazi United yishyuhije iminota itageze kuri 20 nyuma yo gutinda gusohoka mu rwambariro kuko yo n'abasifuzi bageze mu kibuga saa Kumi n'Imwe n'iminota 26.

Rayon Sports yo yari yatangiye kwishyushya guhera saa Kumi n'imwe n'iminota ibiri.

Umukino uratangira mu minota 12 iri imbere.

17:47

Abakinnyi ba Muhazi United babanje mu kibuga

Umutoza Ruremesha Emmanuel yahisemo gukoresha:

Iniace Nzana Ebini
Mutijima Janvier (c)
Mbanza Caleb
Uwumukiza Obed
Muyombo Osamu
Ndayishimiye Richard
Joseph Sackey
Muhamed Kyune
Twizerimana Onesme
Yvan Marcel Kouate
Muteesasira Adam

17:29

Abakinnyi ba Rayon Sports babanje mu kibuga

Umutoza Mohamed Wade yahisemo gukoresha:

Simon Tamale
Rwatubyaye Abdul (c)
Ngendahimana Eric
Bugingo Hakim
Serumogo Ali
Kalisa Rachid
Muhire Kevin
Luvumbu Nzinga
Musa Esenu
Youssef Rharb
Ojera Joackiam

17:16

Imikino yabanje kuri uyu wa Gatatu

Mukura VS 4-1 Kiyovu Sports
Etincellles FC 4-2 AS Kigali

17:15

Ikaze kuri Kigali Pele Stadium

IGIHE ibahaye ikaze kuri Stade ya Kigali yitiriwe Pele ahagiye kubera umukino usoza iy'Umunsi wa 13 wa Shampiyona hagati ya Rayon Sports na Muhazi United.

Rayon Sports iri ku mwanya wa kane n'amanota 23, irushwa ane na APR FC ya mbere mu gihe Muhazi United iri ku mwanya wa 11 n'amanota 14.

Umukino uratangira saa Kumi n'ebyiri.