Etoile de l'Est vs Bugesera FC

Etoile de l'Est 0-3 Bugesera FC

Uko umukino uri kugenda

Umwanditsi

: Jahdeau Dukuze

Amafoto

: Ntare Julius

16:49

90+5 Umukino urarangiye

Nkuko byagenze mu mwaka wa shampiyona ushize, Bugesera yongeye kurokoka ku munsi wanyuma wa shampiyona, ikaba isoreje ku mwanya wa 13 n'amanota 32. Sunrise na Etoile de L'est zimanutse mu cyiciro cya kabiri

16:49

90+3 Ikarita ya mbere y'umukino

Sadick Sulley yeretswe ikarita y'umuhondo nyuma yo kwigusha mu rubuga rw'amahina ashaka Penaliti

16:46

90+1 Bugesera yari ishyizemo agashinguracumu

Faruk Ruhinda wagoye Etoile yari ashatse kurema amahirwe y'igitego ariko baza gusifura ko habayeho kurarira

16:45

90' Mukansanga Salima amanitse ko umukino ushigaje iminota 4

16:43

89' Etoile ikomeje gushaka impozamarira- Abafana babujijwe gutaha

Abafana b'ikipe ya Etoile bari kubona ko umukino bawutakaje. Aha ariko abari gushaka gutaha bari kugarurwa byihuse ngo barangize umukino

16:42

Sunrise ibonye icya 2!

Ikipe y'i Nyagatare itsinze Marines igitego cya kabiri. Ibitego 15 byonyine ni byo ibura ngo ice kuri Etincelles

16:40

85' Etoile de L'Est iri kubyina amataha

Coup Franc ya Etioile de L'Est ntakintu itanze nanone

16:36

80' Coup Franc ya Etoile de L'Est ku ikosa rikorewe Kwizera

Coup Franc nziza igeze mu rubuga rw'amahina rwa Bugesera ariko habura ushyira mu nshundura

16:35

78' Etoile yongeye kurema akantu

Sadick Sulley ahinduye umupira ku ruhande rw'ubusatirizi rw'iburyo usanga Mumbere ku ruhande rw'ibumoso awugaruye imbere y'izamu ab'inyuma ba Bugesera bakiza izamu

16:33

77' Etoile yongeye gutera mu izamu

Sunday Akang yongeye gutera mu izamu ariko umupira uca hirya gato y'izamu

16:31

76' Gusimbuza ku ruhande rwa Bugesera

Kaneza Augustin na Hitimana Placide basimbuye Niyomukiza na Gakwaya Leonard

16:30

75' Umukino watuje, amakipe yombi yakiriye uko bigiye kurangira

16:27

Impinduka i Nyagatare

Ikipe ya Marines isonze uwarimo asamba yishyura igitego kimwe. Ubu Sunrise irasabwa ibitego 16 ngo igume mu cyiciro cya mbere

16:26

70' Gusimbuza ku ruhande rwa Etoile de L'Est

Muhoza Daniel ahaye umwanya Irankunda Abdoul

16:25

68' Etoile ibonye amahirwe ya mbere akomeye y'umukino

Sunday wagiye mu kibuga asimbuye yisanze asigaranye n'umunyezamu Patience ariko ishoti rikomeye ateye rikurwamo n'uyu urinze izamu rya Bugesera

16:23

67' Amafoto y'igitego cya Ruhinda yatuma usesa urumeza

16:20

64' Gusimbuza ku ruhande rwa Bugesera

Dushimimana Olivier wari wananiwe ahaye umwanya Gakiza Aime

16:15

58' Bugesera yari yongeye kwibonera amahirwe

Biragaragara ko ubwugarizi bwa Etoile butari mu mukino. Nka hano Dushimimana yari yongeye kwisanga ari wenyine imbere y'izamu ariko ateye umupira ntiwafata ikirenge neza

16:12

55' Shaolin ahise ahagurutsa abafana

Umupira wa mbere ufashwe n'uyu munyezamu winjiye mu kibuga asimbuye, utumye stade imwenyuraho gato nyuma yo gucenga ba rutahizamu ba Bugesera nubwo umupira atanze nta kivuyemo

16:11

53' Gusimbuza kuri Etoile de L'Est. Bitatu birahagije umunyezamu avuyemo

Umunyezamu Fils Habineza watsinzwe ibitego bitatu ahaye umwanya Nsabimana Jean de Dieu Shaolin. Ikibazo ni we se?

16:09

51' Etoile de L'Est igerageje kugabanya ikinyuranyo

Umupira utewe neza na Daniel Rukundo ntabwo Patience ashoboye kuwufata gusa awurutse ubura usongamo

16:06

Amahirwe ya Etoile de L'Est yose arayoyotse!

16:06

49' Goooaaaaaaaal Bugesera iteye mpaga

Sentongo Faruk Ruhinda atsinze igitego cyiza cy'umutwe nyuma yo kwisanga mu ruuga rw'amahina wenyine asigaranye n'izamua

16:03

47' Amakipe yombi atangiye asatirana

Buri ruhande ruremye uburyo bwo gutsinda mu minota ibiri ya mbere y'igice cya kabiri ariko nta na hamwe bitanze umusaruro

16:00

Igice cya kabiri kiratangiye

Bugesera ni yo itangije igice cya kabiri

16:00

Uko indi mikino ihagaze kugeza iyi saha

Amakipe agiye mu karuhuko mu gice cya mbere ku bibuga bine mu Rwanda

Sunrise 1-0 Marines(Robert Mukongotya)
Kiyovu Sports 0-0 Rayon Sports
Etoile de L'Est 0-2 Bugesera

Umukino warangiye

Gorilla 2-1 Mukura

Uko bihagaze ku makipe yari mu mazi abira

13. Bugesera 32 +1
14. Etincelles 32 -9
15. Sunrise 32 -16
16. Etoile de L'Est 31. -18

15:48

HALF TIME Etoile de L'Est 0-2 Bugesera

Ikipe ya Bugesera ishoje igice cya mbere yizigamiye ibitego bibiri

15:47

45+2 Etoile de L'Est yari igerageje kugabanya ikinyuranyo

Ku mupira uzamukanywe neza n'abakinnyi ba Etoile, usanze Sadick Sulley ariko ateye ishoti umupira Patience awufata awusuzuguye

15:46

45' Iminota ibiri y'inyongera

15:43

42' Gusimbuza ku ruhande rwa Etoile de L'Est

Umutoza Imama ntabwo ategereje ko igice cya mbere kirangira. Niyonshuti Yusufu ahaye umwanya Sunday Akang

15:42

Amwe mu mafoto kugeza ubu y'igice cya mbere

Kuva ibitego bibonetse i Ngoma reka Ntare Julius aduhe amafoto y'umukino

15:40

39' Goooooooaaaal Bugesera itsinze igitego cya kabiri i Ngoma

Mu gihe Etoile de L'Est yari igitanga ishaka ko yakwishyura Bugesera ibyungukiyemo izamukana umupira mu ruhande rw'ibumoso maze Ruhinda Faruk aterekera Dukundane Pacifique umupira utsinze igitego kuri "2eme potau" atsinda ikipe yahozemo.

15:37

36' Gooooooal Bugesera ifunguye amazamu i Ngoma

Coup Franc iterewe kure nko muri metero 35 iruhukiye mu nshundura z'izamu rya Etoile de l'Est. Kugeza ubu Bugesera ni yo iri mu cyiciro cya mbere

15:36

32' Bugesera ishatse gutera agateroshuma

Amahirwe Bugesera iremye mu by'ukuri ntakintu atanze

15:32

31' Ruhinda Faruk yari ashatse kwifatira icyemezo

Uyu rutahizamu wahoze muri APR FC anyuze mu bakinnyi batatu ba Etoile agiye kugera mu rubuga rw'amahina akorerwa ikosa na Alexis Olulu ariko umusifuzi Nsoro avuga ko ntacyabaye.

15:30

30' Etoile de L'Est 0-0 Bugesera

Iminota ibiri ishize Etoile yari ibaye nkaho ikangutse ariko nta kinini yashoboye kurema imbere y'izamu

15:29

28' Etoile yari yungukiye mu makosa ya Bugesera

Umupira utakajwe na Nisingizwe Rodrigue wa Bugesera usanze Muhoza Daniel, ateye mu izamu Patience awufata nta kibazo agize

15:27

Umukino uhagazeho gato ngo Nsoro atunganye inkweto

Mu by'ukuri umukino wa none kugeza ubu nturyoheye amaso ku buryo na godiyo z'umusifuzi Nsoro zabibonye. Uyu bibaye ngombwa ko ahagarika umukino ngo abanze azitunganye neza

15:25

23' Ruzungu ni we ukomeje kwigaragaza i Ngoma

Uyu Rutahizamu wa Bugesera Dushimimana Olivier bita Ruzungu yongeye gukora akantu i Ngoma ubwo yabonaga umupira mu rubuga rw'amahina akawutera atareba izamu bimwe ita kwiboronya ariko ugaca gato hirya y'izamu ririnzwe na Habineza Fils

15:23

21' Bugesera ibonye ishoti rya kabiri ry'umukino

Ikipe ya Haringingo Francis ibizi ko igomba gutsinda uko byagenda kosa, yongeye kurema uburyo bwo gutsinda ubwo umupira uvuye kwa Rodrigue usanze Olivier mu rubuga rw'amahina maze uyu musore wahamagawe mu ikipe y'igihugu Amavubi awuteye ujya hanze

15:21

19' Ndayishimiye Celestin akorewe ikosa

Myugariro wa Etoile ashatse gutangiza ubusatirizi ariko akorerwa ikosa na Niyomukiza. Coup Franc ivuyemo ntacyo itanze

15:19

19' Umukino kuri ubu ubihiye amaso

Amakipe yombi yakaniranye ku buryo bukomeye byatumye kurema amahirwe mu mukino biba iyanga

15:18

14' Coup Franc ya Bugesera ntacyo itanze

Isingizwe Rodrigue ahannye ikosa ryari rikorewe Faruk Ruhinda gusa umupira awuteye usanga uyu rutahizamu w'umugande yaraririye

15:16

12' Etoile de L'Est yari igerageje guhita itsinda

Iyi kipe y'umutoza Imama Kwanko yongeye kurema amahirwe yo gutsinda ariko basanga Sadick Sulley yaraririye

15:12

10' Kugeza ubu aya makipe yombi ari kubarizwa mu cyiciro cya kabiri

Mu gihe amakipe yombi akomeje kwigana i Ngoma, ikipe ya Sunrise i Nyagatare imaze gufungura amazamu kuri uyu munota aho igitego cya Mukongotya gitumye urutonde rwa shampiyona ruhinduka.

14. Sunrise 32
15. Etoile de L'Est 32
16. Bugesera 30

15:09

9' Etoile igerageje kurema uburyo burangira nabi

Nyuma yo guhanahana neza ku bakinnyi ba Etoile, Mumbere Jeremie aterekeye umupira mwiza Daniel ariko basana uyu musore muto yaraririye.

15:07

7' Etoile yari itanze amahirwe

Ishoti rya mbere ry'umukino ritewe na Bugesera aho Gakwaya Leonard yungukiye mu burangare bw'abinyuma ba Etoile batakaje umupira, gusa ateye umupira ujya hanze

15:06

5' Umukino wagumye mu kibuga hagati

Nyuma y'amashagaga yo mu ntangiriro z'umukino, ubu noneho amakipe yombi yashyize umupira hasi ari kwigana

15:04

3' Bugesera yongeye kurema amahirwe yo gutsinda

Ku ikosa ryari rikorewe Dushimimana wa Bugesera Coup Franc ivuyemo igeze mu rubuga rw'amahina rwa Etoile ba myugariro b'iyi kipe babanza guhuzagurika ariko biranira umupira utageze kuri Ruhinda Faruk wari buhite afungura amazamu

15:03

2' Etoile na yo igerageje gusubiza

Abakinnyi ba Etoile bafite umurindi w'abafana inyuma yabo bahanahanye neza gusa Nshimirimana David wa Bugesera arahagoboka akiza izamu rye

15:02

1' Bugesera itangiye isatira

Ikipe ya Bugesera itangiye ishaka igitego aho Dukundane Pacifique yari ateye umupia muremure ashaka Dushimimana ariko ubwugarizi bwa Etoile bwihagararaho

15:00

Umukino uratangiye

Ikipe ya Etoile de L'Est ni yo itangije umukino

14:59

Hafashwe umunota umwe wo Kwibuka Abatutsi bazize Jenoside mu mwaka w'1994

Nkuko byagiye biba ku bibuga byose muri iyi minsi 100 yo Kwibuka Abacu bazize Jenoside yakorewe Abatutsi, n'uyu munsi habanje gufatwa umunota wo Kwibuka.

14:57

Ba Kapiteni bombi bari kugerageza amahirwe yabo bwa nyuma

Umusifuzi Nsoro ahamagaye aba kapiteni babiri b'aya makipe, David ku ruhande rwa Bugesera na Mumbere Mbussa Jeremie ku ruhande rwa Etoile de l'Est batomboye ibibuga birangira Bugesera isaba ko ibibuga biguranwa.

14:53

Amakipe yombi yinjiye mu kibuga

Arangajwe imbere n'umusifuzi mpuzamahanga Ruzindana Nsoro, amakipe yombi yinjiye mu kibuga aho mu kanya ruri bube rwambikanye maze mu masaha abiri ari imbere tuze kumenya uzakina icyiciro cya kabiri umwaka utaha

14:50

Abakinnyi batangiye kuva mu rwambariro

Abasimbura b'amakipe yombi barimo gusohoka mu rwambariro.

Imvura yari iguye ku bwinshi birangiye na yo itamaze umwanya.

Abafana bari kubwirwa gusubira ahadatwikiriye ariko nta n'umwe ushaka kwerekezayo

14:48

Hari indi mikino iteganyijwe ku munsi wa nyuma wa shampiyona

Kugeza ubu hamaze gukinwa imikino ibiri y'umunsi wa 30. Iyindi ine iri bukinwe kuri uyu munsi mu gihe indi ibiri yanyuma izakinwa ku munsi w'ejo.

Umunsi wa 30 wa shampiyona

As Kigali 1-0 Muhazi FC
Gasogi United 1-0 Etincelles

Kuwa gatandatu tariki 11 Gicurasi 2024

Sunrise vs Marines
Etoile de L'Est vs Bugesera
Kiyovu vs Rayon Sports
Gorilla vs Mukura

Ku cyumweru tariki ya 12 Gicurasi 2024

APR FC vs Amagaju
Musanze vs Police FC

14:44

... Ya mvura birangiye ibaye imvura

Mbere y'uko umukino utangira hari kugwa imvura nyinshi cyane itumye abafana bose birundira mu gace gatwikiriye. Nta n'aho wabona uhumekera. Hatagerejwe kureba niba amasaha y'umukino ari bugere yahise, ndetse niba n'ikibuga kiri bube kimeze neza ku buryo cyakinirwaho

14:40

Imvura itamaze umwanya iguye mu Gisaka- Ab'i Ngoma bati ni umu... gisha!

Ubwo amakipe yombi yarimo yishyushya ku kibuga cya Ngoma haguye imvura imaze iminota itatu. Abakinnyi ba Etoile de L'Est bahise bigendera mu kibuga hasigaramo aba Bugesera gusa

14:33

Amakipe yombi arabura abakinnyi ngenderwaho

Nkuko bigaragara, buri kipe iri buze gukina idafite rutahizamu wayo yagenderagaho muri uyu mwaka. Ani Elijah wavuzwe mu ikipe y'igihugu ku ruhande rwa Bugesera ntabwo ahari mu gihe ku rundi ruhande Etoile na yo idafite Gabriel Godspower.

14:25

Abakinnyi XI babanjemo ku ruhande rwa Bugesera FC

Niyongira Patience
Nshimirimana David
Niyomukiza Faustin
Isingizwe Rodrigue
Dukundane Pacifique
Byiringiro David
Ntakirutimana Theotime
Gakwaya Leonard
Tuyihimbaze Gilbert
Dushimimana Olivier
Sentongo Farouk

14:20

Abakinnyi babanje mu kibuga ku ruhande rwa Etoile de L'Est

Habineza Fils Francis
Mumbere Jeremie
Turatsinze John
Alex Olulu
Ndayishimiye Celestin
Batagatifu Yves
Saddick Sulley
Gihozo Irene
Fatal Abdullahi
Muhoza Daniel
Niyonshuti Yusufu

14:14

Muri stade abafana batangiye kwinjira ku bwinshi

Abafana ba Bugesera, aba Etoile de L'est, abasportif barimo abatoza na bamwe mu bakinnyi tutibagiwe n'itangazamakuru, ni bamwe bageze muri stade hakiri kare ngo birebere uko impaka zigiye gicika kuri stade ya Ngoma!

14:07

Ikaze mu Gisaka ahagiye kugaragara uwigiza nkana

Ubu turi kuri Stade ya Ngoma ahagiye kubera umukino uhuza amakipe yo mu ntara y'Uburasirazuba aho imwe muri zo cyangwa se zombi zishobora kwisanga mu cyiciro cya kabirii.

Kugeza ubu ikipe ya Etoile de L'est ni yo yanyuma mu zitamanuka aho iza ku mwanya wa 14 n'amanota 31 mu mikino 29, harimo 12 yakuye mu mikino itanu iheruka.

Bugesera FC yo irayikurikira ku mwanya wa 15 n'amanota 29 mu mikino 29.

Bugesera irasaba gutsinda uno mukino kugira ngo igume mu cyiciro cya mbere ari na cyo ikipe ya Etoile de L'Est isabwa.

Mu gihe amakipe yombi yanganya maze Sunrise igatsindira Marines i Nyagatare, ikipe zombi zamanuka mu cyiciro cya kabiri. Etoile de L'est inganyije ariko Sunrise ntitsinde, iyi kipe iri mu rugo ni yo yazakina muri Rwanda Premier League umwaka utaha