Azam FC itsinze Rayon Sports igitego 1-0 mu mukino usoza ibirori by'Umunsi w'Igikundiro.

Iyi kipe yo muri Tanzania itsindiye igikombe cyateguwe na Sosiyete y’Imikino y’Amahirwe ya Choplife.

Aruna Madjaliwa ahawe ikarita y'umuhondo akiniye nabi Iddy Seleman.

Adam Adam na Nassoro basimbuye Fei Toto na Gibril Sillah.

Umusifuzi wa Kane, Ishimwe Claude yerekanye iminota itanu y'inyongera.

Abafana ba Rayon Sports bakomeje gutera imbaraga ikipe yabo ngo ibe yakwishyura.

Amakipe yombi nanganya haraterwa za penaliti.

Azam FC iri kugerageza kurya iminota mu gihe Rayon Sports iri gukinisha imbaraga ishaka kwishyura.

Abafana ba Gikundiro bacanye amatoroshi ya telefoni.

Mu 2019, Rayon Sports yatsinze Gasogi United ibitego 3-1 mu mukino wa gicuti.

Mu 2021, Rayon Sports yatsinzwe na Kiyovu Sports ibitego 2-1.

Mu 2022, Rayon Sports yatsinzwe na Vipers SC igitego 1-0.

Mu 2023, Rayon Sports yatsinzwe na Kenya Police FC igitego 1-0.

Mu 2024, Rayon Sports iri gukina na Azam FC ndetse kugeza ubu yatsinzwe igitego 1-0.

Umunya-Senegal Fall Ngagne asimbuye Iraguha Hadji wavunitse.

Iddy Selemani na Diakite basimbuye Tiesse na Adolf ku ruhande rwa Azam FC.

Yannick Bangala ahawe ikarita y'umuhondo kubera gutinza umukino ku mupira uteretse yagombaga gukina.

Omborenga Fitina arushije imbaraga Msindo wari umwiziritseho, atanga umupira kuri Rukundo Abdul Rahman uwuteye ku ruhande.


Rayon Sports ikomeje gusatira ishaka uko yakwishyura.

Rayon Sports iri gusatira cyane muri aka kanya.

Meza ahawe ikarita y'umuhondo akuruye Nsabimana Aimable wari umusize.

Omar Gning akiniye nabi Fei Toto, ikosa rihanwe na Msindo, Azam FC ntiyabyaza umusaruro ubu buryo.

Adama Bagayogo asimbuye Charles Bbaale ku ruhande rwa Rayon Sports.

PASCAL Msindo na Euer Meza basimbuye Sidibe na Akaminko James ku ruhande rwa Azam FC.

Rukundo Abdul Rahman ateye ishoti rikomeye ari iburyo, umunyezamu Mustafa awushyira muri koruneri itagize icyo itanga.

Ikipe ya Azam FC yongeye kubona uburyo bwiza ku mupira winjiranywe na Adolf Mtasingwa iburyo, unyura ku ruhande gato rw'izamu rya Gikundiro.

Azam FC ifunguye amazamu i Nyamirambo ku gitego gitsinzwe na Lusajo Mwaikenda n'umutwe.

Elenga-Kanga asimbuye Haruna Niyonzima naho Rukundo Abdul Rahman asimbura Niyonzima Olivier 'Seif'.

Amakipe yombi ari gukinira cyane mu kibuga hagati, ntagusatirana kongeye kubaho mu minota ishize.

Azam FC yinjiye mu gice cya kabiri yahinduye imyambaro ndetse yari ihise ibona igitego, umusifuzi agaragaza ko habayeho kurarira.

Iminota 45 ibanza y'umukino mpuzamahanga wa gicuti uri guhuza Rayon Sports na Azam FC, irangiye amakipe yombi anganya ubusa ku busa.

Abakinnyi bagiye kumva inama z'abatoza mu gihe cy'iminota 15, bagaruke bakina igice cya kabiri.

Abari kuri Kigali Pele Stadium bagiye gususurutswa na Sherri Silver Foundation.

Mu gihe mu kibuga nta buryo bukomeye bwongeye kuboneka kugeza ubu, abafana basa n'abakonje.

Amakipe yombi ari gusatirana ariko gutera mu izamu ni ibindi.

Bugingo Hakim ahawe ikarita y'umuhondo akoreye ikosa kuri Lusajo.

Ikosa rihanwe na Sidibe uteye umupira hejuru kure y'izamu rya Rayon Sports.

Nsabimana Aimable akiniye nabi Gibril, ikosa rihanwe n'uyu mukinnyi, umupira ugendera hasi ugonga urukuta mbere y'uko usubiranwa na Azam FC.

Azam FC igerageje kubaka isatira izamu rya Rayon Sports, umupira wa nyuma uhawe Fie Toto ujya ku ruhande.

Muhire Kevin ateye umupira uteretse, usanga Nsabimana Aimable uwushyizeho umutwe, ku bw'amahirwe make ushyirwa muri koruneri n'Umunyezamu Mohammed Mustafa wa Azam FC.

Omar Gning wa Rayon Sports, ahawe ikaritay'umuhondo ku ikosa akoreye kuri Adolf Mtasingwa wa Azam FC.

Ikosa rirarahanwe, Rayon Sports irenza umupira.

Umukino ubaye uhagaze mu gihe hari kuvurwa Franck Tiesse, rutahizamu wa Azam FC ugonganye na myugariro wa Rayon Sports yari ashatse gucenga.

Jhonier Blanco wa Azam FC, ahawe ikarita y'umuhondo kubera kurenza umupira mu gihe umusifuzi yari yasifuye ikosa.

Ikipe yo muri Tanzania yongeye guhindura umupira uturutse ibumoso, ushyirwa muri koruneri na Khadime Ndiaye.

Iraguha Hadji ahinduye umupira mwiza usanze Charles Bbaale mu rubuga rw'amahina, ashyizeho umutwe, ujya ku ruhande gato rw'izamu rya Azam FC.

Ni uburyo bwari bwabazwe.

Gibril Sillah acomekeye umupira Fie Toto uteye ishoti rikomeye rishyirwa muri koruneri na Khadime Ndiaye.

Ni uburyo bwa mbere bugana mu izamu bubonetse mu mukino.

Iminota 10 ibanza yihariwe na Rayon Sports mu gusatira nubwo nta buryo bukomeye irabona burenze umupira wahinduwe muri metero esheshatu na Haruna Niyonzima.

Azam FC irashaka gutangira umupira yitonze mu gihe Gikundiro ikina yihuta.

Niyonzima uri kunyura ibumoso, ahawe umupira acengera ku ruhande, awuhinduye mu izamu ushyirwa muri koruneri itagize icyo itanga.

Abafana ba Rayon Sports barahagurute bamuha amashyi menshi.

Muhire Kevin na Bugingo Hakim bateye umupira uteretse wa Rayon Sports, ujya hejuru y'izamu rya Azam FC.

Kigali Pele Stadium yuzuye abakunzi ba Gikundiro.

Rayon Sports iri guhererekanya neza muri iyi minota ya mbere ndetse ibonye coup-franc ku ikosa Jame akoreye kuri Iraguha Hadji.

Umusifuzi Uwikunda Samuel atangije umukino.

Umupira wa mbere utewe na Charles Bbaale wa Rayon Sports, akinana na bagenzi be.

Igikombe gitangwa na Chooplife cyazanywe n'umuntu wiyambitse nka 'robot'.

Uyu munsi ntabwo kunganya bishoboka kuko hagomba kuboneka ikipe itwara igikombe.

Mbere yo gutangira umukino, harambuwe igitambaro kinini hagati mu kibuga, cyanditseho "Umunsi w'Igikundiro".

Aba-Rayons bafatanyije kuririmba indirimbo y'ikipe yabo, banakoma amashyi ya 'huuu' cyangwa "Ama-Rayons" nk'uko bayita.

Umutoza Robertinho yahisemo kubanzamo:

Khadime Ndiaye
Muhire Kevin (c)
Omborenga Fitina
Bugingo Hakim
Nsabimana Aimablle
Gning Omar
Iraguha Hadji
Niyonzima Olivier
Charles Bbaale
Niyonzima Haruna
Aruna Madjaliwa

Abasimbura:

Ndikuriyo
Mugisha Yves
Amza Iranzi
Fabrice Nshimirimana
Serumogo
Jesus Paul
Adama Bagayogo
Kanamugire Roger
Ishimwe Fiston
Elenga-Kanga
Serieux Mbonyamahoro
Ikundabayo Justin
Hatangishaka Blaise
Nshimiyimana Emmanuel
Iradukunda Pascal
Fall Ngagne
Yousou
Mugisha Francois
Ganijuru Elie

Umutoza wa Youssouph Dabo yahisemo gukoresha:

MOHAMED MUSTAFA
LUSAJO MWAIKENDA (C)
CHEIKH SIDIBE
YEISON FUENTES
YANNICK BANGALA
ADOLF MTASINGWA
FRANCK TIESSE
JAMES AKAMINKO
JHONIER BLANCO
FEI TOTO
GIBRIL SILLAH

Abasimbura:

FOBA
SEBO
CHILAMBO
MSINDO
YORO
SAMAKE
MEZA
NADO
ADAM

Abatoza bashinzwe gutegura aho abakinnyi bishyuhiriza bageze mu kibuga.

Abakinnyi bategerejwe mu kibuga mu minota mike.

Umukino wa Rayon Sports na Azam FC uteganyijwe saa Kumi n'Ebyiri.

Perezida wa Rayon Sports, Uwayezu Jean Fidele, yahaye Ambasaderi wa Tanzania mu Rwanda impano y'umupira wa Gikundiro w'ubururu.

Yahaye kandi Umuyobozi Mukuru wa Azam FC impano y'umupira w'iyi kipe w'umweru.

Perezida w'Umuryango Rayon Sports, Uwayezu Jean Fidele, yatangiye ashimira abayobozi batandukanye n'abakunzi ba Gikundiro bitabiriye iki gikorwa, abaha ikaze.

Yashimiye Umukuru w'Igihugu "ku ruhare rwe ntagereranywa mu gushyigikira no guteza imbere umupira w'amaguru mu Rwanda, mu karere, muri Afurika no ku Isi."

Yashimiye kandi abayoboye Rayon Sports, FERWAFA, Rwanda Premier League, abayobozi b'amakipe, abayobora za Fan Clubs n'abitabiriye Rayon Day atibagiwe abafatanyabikorwa b'iyi kipe.

Muri abo harimo SKOL, Akarere ka Nyanza na Chooplife.


Yakomeje agira ati "Iyi ni intangiriro y'ubufatanye bwa Azam FC na Rayon Sports."

Umuyobozi wa Azam FC yashyikirije uwa Rayon Sports umwambaro w'iyi kipe ugenewe Perezida Paul Kagame ndetse wanditseho izina rye.

Iyi kipe yashimiye Umukuru w'Igihugu uburyo akunda akanateza imbere imikino.

Muhire Kevin azakomeza kuba Kapiteni wa Rayon Sports ndetse ashyikirijwe igitambaro na Perezida w'Ikipe, Uwayezu Jean Fidele.

Muhire yongereye amasezerano y'umwaka umwe muri Nyakanga nubwo yashoboraga gusinya imyaka ibiri iyo ahabwa miliyoni 40 Frw.

Hibazwaga uzaba Kapiteni hagati ye na Haruna Niyonzima wayigarutsemo nyuma y'imyaka 17.

Impaka ziracitse!

1. Umutoza w'Umunya-Brésil Roberto Oliveira Gonçalves do Carmo ‘Robertinho’ ni we ukurikiye Haruna mu kwakirwa.

Uyu mugabo w'imyaka 64, yinjiye mu kibuga yakenyeye bya Kinyarwanda ndetse afite inkoni 'nk'Umusaza' rwose.

2. Umutoza Wongerera Ingufu abakinnyi: Umunya-Afurika y'Epfo Ayabonga Lebitsa yakiriwe bwa kabiri.

3. Ushinzwe Ibikoresho: Nizeyimana Shaffy

4. Ushinzwe Umutekano: Mugisha Jean de Dieu

Abakinnyi:

1. Habanje kwakirwa abakinnyi batandatu bashya bazamuwe mu ikipe ya mbere ya Rayon Sports.

2. Adama Bagayogo, Umunya-Mali w'imyaka 20 na we wazamuwe mu ikipe ya mbere. Afite amasezerano y'imyaka itatu ndetse bivugwa ko ahembwa ibihumbi 300$. Yigaragaje mu mikino ya gicuti, atsinda ibitego bibiri.

3. Ndikuriyo Patient, Umunyezamu mushya w'Umurundi wavuye mu Amagaju FC.

4. Serumogo Ali, myugariro w'iburyo ugiye gukina umwaka wa kabiri nyuma yo kuva muri Kiyovu Sports.

5. Khadime Ndiaye, Umunyezamu w'Umunya-Senegal ugiye gukina umwaka wa kabiri muri Gikundiro yagezemo muri Mutarama.

6. Iradukunda Pascal, Petit Messi cyangwa Petit Skol nk'uko bamwe, umukinnyi muto wifashishwa n'ikipe ya mbere ariko akaba ari Kapiteni w'Abatarengeje imyaka 20 ba Gikundiro.

7. Bugingo Hakim, myugariro w'ibumoso ugiye gukina umwaka wa kabiri nyuma yo kuva muri Gasogi United.

8. Nsabimana Aimable, myugariro wo hagati ugiye gukina umwaka wa kabiri (wongereye amasezerano). Yavuye muri Kiyovu Sports ndetse yakiniye APR FC na Marines FC.

9. Nshimiyimana Richard, Umurundi ukina hagati waguzwe muri Muhazi United.

10. Ishimwe Ganijuru Elie, myugariro w'ibumoso uheruka kongera amasezerano nyuma y'imyaka ibiri muri Gikundiro yagezemo avuye muri Bugesera FC.

11. Fall Ngagne, rutahizamu w'Umunya-Senegal wavuye muri K Viagem P?íbram yo muri Repubulika ya Tchèque.

12. Charles Bbaale, rutahizamu w'Umunya-Uganda uri gukina umwaka wa kabiri nyuma yo kuva iwabo.

13. Kanamugire Roger, umukinnyi wo hagati

14. Ishimwe Fiston, bamwe bamwita Messi, ni umukinnyi mushya wavuye muri AS Kigali yatijwemo na APR FC yamukuye muri Marines FC.

15. Youssou Diagne,Myugariro w'Umunya-Senegal wakinaga muri Ittihad Zemmouri de Khémiss yo muri Maroc.

16. Nshimiyimana Emmanuel 'Kabange', myugariro wo hagati wari Kapiteni wa Gorilla FC.

17. Rukundo Abdul Rahman, umukinnyi wo hagati usatira izamu wavuye mu Amagaju FC.

18. Iraguha Hadji, umukinnyi wo ku ruhande rw'ibumoso ukina asatira izamu. Ari gukina umwaka wa kabiri muri Gikundiro.

19. Mugisha Francois Master, yaragiye aragaruka ariko yari mu ikipe yageze muri 1/4 cya CAF Confederation Cup mu 2018.

20. Omar Gning, myugariro wo hagati ukomoka muri Senegal.

21. Prinsse Elenga-Kanga, rutahizamu uca ku mpande wavuye muri AS Vita Club. Akomoka muri Congo Brazzaville.

22. Niyonzima Olivier 'Seif', umukinnyi wo hagati wagarutse muri iyi kipe avuye muri Kiyovu Sports. Yari mu ikipe yatwaye Shampiyona ya 2019 ndetse mu 2018 yari ahari.

23. Aruna Moussa Madjaliwa, Umurundi ukina hagati mu kibuga. Amaze umwaka umwe muri Rayon Sports nubwo atayihaye ibyo yifuzaga ndetse impande zombi zashakaga gatanya mu minsi mike ishize.

24. Omborenga Fitina, myugariro w'iburyo wishimiwe cyane nyuma yo kuva muri APR FC yamurekuye. Ni umwe mu bakinnyi bafite uburambe kuko akinira Ikipe y'Igihugu kuva mu 2013 ndetse ubu ni we ubanzamo ku mwanya we.

25. Muhire Kevin, umwana w'ikipe. Kapiteni. Yongereye amasezerano y'umwaka mu gihe yashoboraga gusinya ibiri iyo abafana buzuza miliyoni 40 Frw. Na we ari mu bageranye na Rayon Sports muri 1/4 cya CAF Confederation Cup mu 2018.

Muhire Kevin yinjiye aherekejwe na robot ndende.

Nyuma y'imyaka 17 asubiye muri Rayon Sports, Haruna Niyonzima ni we mukinnyi wa mbere wakiriwe muri Kigali Pele Stadium.

Yinjiye mu kibuga ateruwe mu ntebe nk'umwami.

Umunyamakuru Mugenzi Faustin 'Faustinho Simbigarukaho' na Wasiri ni bo baza kuyobora iki gikorwa nk'abashingwabirori.

Mugenzi yiteye umwambaro w'ubururu.

Umuhanzi Nemeye Platini wamenyekanye nka Platini P, yamaze kugera ku rubyiniro ahera ku "Icupa" asusurutsa abafana ba Rayon Sports.

Uyu muhanzi asanzwe ari umukunzi wa Gikundiro ndetse yifashishijwe mu kumurika umwambaro wayo mushya.

Umuyobozi wa Azam FC yashyikirije uwa Rayon Sports umwambaro w'iyi kipe ugenewe Perezida Paul Kagame ndetse wanditseho izina rye.

Iyi kipe yashimiye Umukuru w'Igihugu uburyo akunda akanateza imbere imikino.

Iyi kipe yo muri Tanzania igiye gukina Rayon Sports Day kuri uyu wa Gatandatu, ariko mu minsi mike izaba iri i Kigali na none kuko yatomboye APR FC muri CAF Champions League, mukeba wa Gikundiro.

Ibwe avuze ko bakunda Perezida Paul Kagame n'u Rwanda, akomerwa amashyi menshi n'abafana ba Rayon Sports.

Ikipe ya Azam FC ikina na Rayon Sports mu masaha abiri n'igice ari imbere, ni yo igiye kwerekwa abafana ba Gikundiro.

Umuvugizi wa Azam FC, Hasheem Ibwe ni we ugiye kuyobora iki gikorwa aho abanje kwerekanwa n'uwa Rayon Sports, Ngabo Robben.

Umuyobozi w'Umuryango Rayon Sports, akaba na Perezida w'amakipe yayo, Uwayezu Jean Fidèle yishimiwe cyane n'abafana yasuhuje ubwo yari amaze kwifotozanya n'Ikipe y'Abagore.

Uwayezu amaze imyaka ine ayobora iyi kipe ndetse habura amezi abiri ngo manda ye irangire.

Umuhanzi Bushali ari ku rubyiniro aho abifashijwemo na DJ Brianne bakoranye muri 'Rayon Week', ari gususurutsa abafana ba Rayon Sports i Nyamirambo binyuze mu ndirimbo zitandukanye.

Iyi kipe izakina amajonjora ya CAF Champions League, igizwe n’abakinnyi:

1. KARAMBU Monica
2. NDAKIMANA Angeline
3. UWIMANA Francine
4. UWASE Andersene
5. UWIMBABAZI Immaculée
6. KEZA Angélique
7. MUKESHIMANA Jeannette
8. MUKANTAGANIRA Joselyne
9. ABIMANA Djamilla
10. AQUILA GASPARI FRANSI
11. MARY ARONE SIYAME
12. UMUHOZA Angélique
13. GIKUNDIRO Scolastique
14. NYIRARUKUNDO UWITONZE
15. KAYITESI Alodie
16. REHEMA RAMADHANI MOHAMED
17. MUKESHIMANA Dorothée
18. UKWINKUNDA Jeannette
19. NIYONSHUTI Emelance
20. Mary Chavinda GIBI
21. MUKANDAYISENGA Jeannine
22. KALIMBA Alice (c)

‘Staff’:

Umutoza Mukuru: RWAKA Claude
Umutoza Wungirije: RUDASINGWA Fleury Iquel
Umutoza w’Abanyezamu: HABINSHUTI Fidèle
Team Manager: DUSHIMIMANA Djamila
Ushinzwe ibikoresho: MUHAYIMANA Jacqueline
Umuganga: NKURIYINGOMA Eulade
Ushinzwe kunanira imitsi: IZABAYO Aline
Ushinzwe umutekano: MUREGO Philemon

Umunsi w'Igikundiro utegurwa kuva mu 2019.

Muri uwo mwaka wa mbere, Rayon Sports yatsinze Gasogi United ibitego 3-1 mu mukino wa gicuti.

Mu 2021, Rayon Sports yatsinzwe na Kiyovu Sports ibitego 2-1.

Mu 2022, Rayon Sports yatsinzwe na Vipers SC igitego 1-0.

Mu 2023, Rayon Sports yatsinzwe na Kenya Police FC igitego 1-0.

Mu 2024, Rayon Sports irakina na Azam FC.

Rutahizamu wa Rayon Sports y'Abagore, Mukandayisenga Jeannine 'Kaboy' yishimiwe bidasanzwe n'abafana ba Gikundiro bari i Nyamirambo.

Ni umwe mu bagize uruhare rukomeye mu kuyihesha Igikombe cya Shampiyona y'Icyiciro cya Mbere n'icy'Amahoro.

Ikipe ya Rayon Sports y'Abagpre yaserutse mu mukenyero w'ubururu n'umweru, iri kwerekwa abafana, umukinnyi ku wundi aho ahamagarwa akamukirikwa.

Iyi kipe imaze imyaka ibiri ishinzwe, yahereye mu Cyiciro cya Kabiri, izamuka idatsinzwe ndetse mu mwaka wayo wa mbere mu Cyiciro cya Mbere, yahise itwara Shampiyona ku buryo yitegura guhagararira u Rwanda mu majonjora ya CAF Champions League azabera muri Ethiopia.

Imyiteguro iri ku rwego rwo hejuru muri Kigali Pelé Stadium ahari kubera ibiriro.

Harerekanwa abakinnyi b'amakipe ya Rayon Sports y'Abagore, Azam FC na Rayon Sports y'Abagabo.

Abahanzi barimo Nemeye Platini na Bushali barasusurutsa abitabiriye ibi birori.

IGIHE ibahaye ikaze kuri Stade ya Kigali yitiriwe Pelé ahari kubera ibirori byo kwizihiza Rayon Sports Day izwi nk'Umunsi w'Igikundiro.

Ni ibirori bibaye mu gihe iyi kipe yizihiza ubufatanye imazemo imyaka 10 hamwe n'uruganda rwa SKOL.

Birasozwa n'umukino mpuzamahanga ya gicuti uhuza Rayon Sports na Azam FC guhera saa Kumi n'Ebyiri aho hatangwa igikombe cyatewe inkunga na Sosiyete y’Imikino y’Amahirwe ya Chooplife.

Abafana ba Gikundiro babukereye aho batangiye akarasisi mbere ya saa Sita mu gihe hari ibirori bikomeje kubera muri Stade.