Rutsiro FC vs Rayon Sports

Rutsiro FC 0-1 Rayon Sports

Uko umukino uri kugenda

Umwanditsi

: Jahdeau Dukuze

Amafoto

: Kasiro Claude

18:09

Uko amakipe akurikirana nyuma y'umunsi wa Gatanu wa Shampiyona

Intsinzi ya Rayon Sports yatumye ijya ku mwanya wa Kane ku rutonde rw'agateganyo.

Dore uko imikino y'umunsi wa Gatanu yagenze n'urutonde rw'uko amakipe akurikirana.

18:06

Amwe mu mafoto yaranze umukino w'uyu munsi

17:00

Umukino urarangiye

Ikipe ya Rayon Sports itsinze Rutsiro FC igitego 1-0 mu mukino w'umunsi wa Gatanu wa Shampiyona waberaga i Rubavu.

Igitego cya Iraguha Hadji ku munota wa 49 w'umukino ni cyo cyabaye itandukaniro ku makipe yombi.



16:58

90+4 Rutsiro ihushije igitego kidahushwa

Nyuma yo kubaka uburyo bwo gutsinda nkuko yakomeje kubikora, umupira usanze Bwira Olivier ari wenyine imbere y'izamu gusa ateye umupira ujya hejuru y'izamu rya Khadime.

16:56

90+2 Umukinnyi wa Rayon Sports araryamye

Bugingo Hakim aryamye hasi avuga ko yakubiswe n'umukinnyi wa Rutsiro ariko umusifuzi Celestin amusabye guhaguruka umukino ugakomeza

16:53

90' Iminota itanu y'inyongera

16:52

86. Rayon Sports iri kugana ku ntsinzi yayo ya kabiri

Iminota iri kugenda ivaho umwe ku wundi biha amahirwe ikipe y'i Nyanza kwegukana amanota yose atatu.

Ni byo ko Rutsiro yashyize imbaraga mu kwishyura ariko Rayon Sports yakoze urukuta rutuma izamu ryaryo ririnzwe neza.

16:49

84' Gusimbuza ku ruhande rwa Rayon Sports

Rukundo Abdulrahim na Ganijuru Elie basimbuye Iraguha Hadji na Charles Baale

16:48

82' Rutsiro yakambitse ku izamu rya Rayon Sports

Iyi kipe iracyashaka igitego cyo kwishyura aho ikibuga yagiciyemo kabiri. Aba bari kuguma guhanahana neza imbere y'izamu rya Rayon Sports nubwo kugeza ubu nta musaruro byari byabaha.

16:46

80' Umunyezamu wa Rayon Sports ahagaritse umukino

Umunyezamu Khadime aryamye hasi ari kwitabwaho n'abaganga. Umukino ubaye uhagaze.

16:45

80' Rutsiro ihushije igitego.

Abakinnyi ba Gatera Mussa nubwo batsinzwe ariko bari kwerekana ko ari imwe mu makipe akina umupira usukuye.

Aha, umupira umaze amasegonda 30 bawuhanahana imbere y'izamu rya Rayon Sports, birangira Ndikumana Christian abonye uburyo bwo kuwutera ariko ujya hanze y'izamu yashakaga kuwushyiramo.

16:43

77' Gusimbuza ku ruhande rwa Rutsiro

Habyarimana Eugene wari umaze umaze iminota ine avurirwa hanze ahaye umwanya Kwizera Emilien

16:41

75' Rutsiro ikoze agateroshuma

Nkubito Amza wagiye mu kibuga asimbuye ashatse gutungura umunyezamu wa Rayon Sports ariko ishoti rikomeye yateye rigana hanze y'izamu.

16:37

73' Rayon Sports ihushije igitego

Adama Bagayogo ugitegerejwe n'aba-Rayon Sports agejeje umupira mu rubuga rw'amahina, birangira ashoboye kuwuha neza Fitina Omborenga na we uwuhinduye kwa Hadji Iraguha ariko agiye kuwutera mu izamu Eugene aritanga akiza izamu.

16:36

70' Coup Franc ya Rutsiro

Yves akorewe ikosa na Bugingo Hakim.

Abakinnyi ba Rutsiro bahise bawukina bihuse ariko umupira birangira ubarenganye.

16:34

68' Omborenga yari afashe icyemezo

Myugariro wa Rayon Sports ateye umupira ukomye inyuma y'urubuga rw'amahina ariko usanga umunyezamu Matumele Monzobo ahagaze neza umupira awushyira muri Corner.

Iyi nta kintu ivuyemo nyuma yo guterwa na Kevin

16:31

64' Rayon Sports ihushije igitego

Charles Baale yongeye guhusha cya kenshi. Byatangije Hadji azamukanye umupira kuri Contre atatque,ageze mu rubuga rw'amahina ubwugarizi bwa Rutsiro bushyire umupira muri Corner.

Iyi yatewe neza na Kevin wahaye umupira Hadji awugeza ku mutwe wa Baale wari wenyine ariko uyu ntiyawushyira mu izamu ujya hanze

16:28

62' Rutsiro yakambitse ku izamu rya Rayon Sports

Ikipe ya Gatera Mussa nyuma yo gutsindwa igitego irimo gukora ibishoboka ngo yishyure nubwo nta buryo budasanzwe yari yahusha.

Imipira myinshi iri kuzamukanwa ku mpande iri kuruhukira mu maboko y'umunyezamu wa Rayon Sports.

Iyi kipe ya Gikundiro ikaba kuri ubu iri gukoresha za "Contre attaques".

16:26

62 Gusimbuza ku ruhande rwa Rutsiro

Uwambajimana Leon ahaye umwanya Ndikumana Christian

16:23

60' Gusimbuza ku ruhande rwa Rayon Sports

Adama Bagayogo asimbuye Aziz Bassane

16:22

57' Ikarita y'umuhondo

Aziz Bassane wa Rayon Sports akoreye ikosa myugariro wa Rutsiro umusifuzi amwibutsa ko ari irya kabiri ryikurikiranya amuha umuhondo.

16:20

56' Rutsiro ihushije igitego

Umupira uvuye muri Corner abakinnyi ba Rutsiro bahanahanye, Mumbere ashyize umupira mwiza mu izamu rya Rayon Sports ariko Omar Gning atabara ikipe arongera arawurenza.

16:18

54' Rayon Sports irifuza gushimangira intsinzi

Iraguha Hadji ahinduriye umupira Bassane ushatse kuwutera adahagaritse ariko ujya hanze.

16:17

53' Gusimbuza ku ruhande rwa Rutsiro

Nkubito Hamza afashe umwanya wa Nizeyimana Claude Rutsiro.

16:16

51' Coup Franc ya Rayon Sports

Charles Baale akorewe ikosa hafi y'urubuga rw'amahina.

Bugingo Hakim na Kevin bayihagazeho. Bugingo aba ari we uyitera ariko umupira ujya hanze.

16:14

49' Rayon Sports ifunguye amazamu

Iraguha Hadji atsindiye igitego hanze y'urubuga rw'amahina, asaba imbabazi ikipe yahozemo.

16:13

48' Rutsiro iti na none twibwe Penaliti

Ikipe ya Rutsiro yongeye kutishimira imisifurire ya Celestin ubwo Yves yagezaga umupira mu rubuga rw'amahina, myugariro Yussuf wa Rayon akawukoraho n'akaboko yicaye gusa umusifuzi akavuga ko ntacyabaye

16:12

47' Rutsiro yongeye guhusha igitego

Iyi kipe mu minota ibiri ikoze ibyananiye amakipe yombi mu minota 50 yakinwe mu gice cya mbere.

Habimana Yves yari atumye umunyezamu wa Rayon Sports akuramo umupira ukomeye ariko umusifuzi wo ku ruhande avuga ko habayemo kurarira

16:10

Igice cya kabiri kiratangiye

Rutsiro itangije umupira ihita irema uburyo bwo gutsinda.

Nyuma yo guhanahana amasegonda 30, Mumbere Jeremie ashyize umupira mu izamu rya Khadim, awufashe arawurekura gusa ahita yongera kuwufata neza.

16:07

Gusimbuza ku ruhande rwa Rayon Sports

Kanamugire Roger afashe umwanya wa Niyonzima Olivier Seif

15:52

Igice cya mbere kirarangiye

Amakipe yombi agiye kuruhuka anganya 0-0 aho nta kipe n'imwe yari yatera mu izamu (Shot on Target).

15:51

45+2 Umukino wongeye guhagarara gato

Rutahizamu wa Musanze Mumbere aryamye hasi arimo kwitabwaho n'umunyezamu wa Rayon Sports.

Celestin ahagaritse umukino ngo ajye kureba icyo uyu yabaye.

15:49

45+1 Rayon Sports iracyashakisha

Iyi kipe ya Robertinho iri kureba ko yasoza igice cya mbere iyoboye umukino.

Umupira wakomeje gucaracara mu rubuga rw'amahina rwa Rutsiro, Muhire Kevin awufashe neza atera ishoti rikomeye ariko umupira ujya hanze.

15:48

45' Iminota 5 y'inyongera

15:47

44' Rutsiro yari yigize Messi biranga

Nizeyimana Claude yungukiye ku mupira wari utakajwe na Yussuf, maze awukura mu rubuga rwe awugeza mu rwa Rayon Sports aciye mu bakinnyi batatu. Gusa uyu birangira wutanze nabi wifatirwa na Omborenga Fitina

15:45

42' Coup Franc nziza ya Rayon Sports

Abakinnyi ba Rutsiro ntibumva na none impamvu Nsabimana Celestin atanze iri kosa.

Madjaliwa ahaye umupira mwiza Bassane, uwuzamukanye ibumoso awugarura mu kuguru kwe asatira urubuga rw'amahina ariko aza kuwuhuriraho na Eugene Habyarimana birangira uzamutse ukora ku maboko ya bombi, gusa umusifuzi yemeza ko wabanje kuri myugariro wa Rayon Sports.

Muhire Kevin ateye uyu mupira wari ahantu heza gusa uca hanze gato y'izamu

15:42

40' Gusimbuza ku ruhande rwa Rayon Sportss

Nsabimana Aiamable udashoboye gukomeza umukino asimbuwe na Yussuf Diagne ugiye gukinana mu bwugarizi na mwene wabo Omar.

15:40

37' Ikarita y'umuhondo

Kwizera Eric wa Rutsiro ahawe ikarita kubera kutemeranya n'imisifurire ya Celestin.

15:39

35' Umukino ubaye uhagaze gato

Abakinnyi babiri ba Rayon Sports Nsabimana Aimable na Aruna Mussa baryamye hasi aho bahagaritse umukino ngo bavurwe.

15:37

34 Rayon Sports yari itanze indi mpano

Nyumayo kutumvikana neza hagati ya Aimable na Gning, Rutsiro yifatiye umupira, awugeza kwa Mumbere wari mu rubuga rw'amahina ariko Aruna Mussa aratabara akiza izamu.

15:36

32' Ikarita y'umuhondo

Aruna Mussa Madjaliwa akoreye ikosa Nizeyimana Claude uzwi nka Rutsiro ubwo uyu yajyaga ku izamu.

Celestin ni we wa mbere ahaye ikarita muri uyu mukino

15:35

31' Corner ya Rayon Sports

Muhire Kevin usa nk'uwarambiwe guha imipira bagenzi be bakayipfusha ubusa, yifatiye icyemezo cyo gucenga ikipe yose akitsindira, agerageza kuri babiri uwa gatatu aba Alexis washyize umupira muri Corner.

Iyi itewe nabi kuko ubwugarizi bwa Rutsiro buhise bukuraho umupira butangiza Contre- Attaque.

15:33

30' Rutsiro 0-0 Rayon Sports. Abanyezamu bombi baracyategereje guterwa amashoti

Nubwo buri kipe yagize ibihe byo kurema amahirwe yo gutsinda, nta kipe n'imwe yari yatera umunyezamu dore ko imipira myinshi iri guterwa hanze indi igajyanwa muri Corner itaragera mu izamu.

15:31

20' Rayon Sports yongeye kurema amahirwe yo gutsinda

Bassane wahinduye umwanya akaza ibumoso yari azamukanye umupira asiga Eugene Habyarimana wagowe n'umunsi, awuha Kevin Muhire ariko ushatse kuwushyira mu rubuga rw'amahina ukurwaho n'ubwugarizi bwa Rutsiro.

15:30

18' Niyonzima Sefu yari ahaye Rutsiro impano

Umukinnyi wo hagati wa Rayon Sports atakaje umupira ahantu habi, ufatwa na Mumbele Jeremie, uwinjirije neza Mumbere Jonas ariko uyu wari usigaye wenyine mu rubuga rw'amahina ateye umupira uba muremure.

15:21

16' Rutsiro iti ni Penaliti, Rayon Sports iti batwimye ikosa

Amakipe yombi ntabwo yemeranyije n'imisifurire ya Celestin kuri iki gikorwa.

Nizeyimana Jean Claude Rutsiro ahuriye mu kirere na Nsabimana Aimable birangira uyu myugariro wa Rayon Sports asigaye ryamye maze Rutsiro arikomereza. Uyu yajyanye umupira awugeza mu rubuga rw'amahina gusa aza kugongana n'ab'inyuma ba Rayon Sports ariko umusifuzi avuga ko nta cyabaye.

Ubwo Rutsiro yavugaga ko yimwe penaliti, Rayon Sports yatangazaga ko Aimable yari yakorewe ikosa.

15:18

14 Muhire Kevin ntarimo gusobanukirwa ibya Charles Baale

Uyu Kapiteni wa Rayon Sports ahawe umupira muremure na Aruna Madjaliwa, ariruka awugeraho, awutereka na we mu rubuga rw'amahina usanga Charles Baale wari wenyine ariko uyu rutahizamu ateye n'imoso yamurura inyoni.

15:16

12' Rutsiro ihise isubiza neza

Mumbere Jeremie wagoye cyane ubwugarizi bwa Rayon Sports, acenze abakinnyi batatu b'inyuma b'iyi kipe agaruye umupira ngo bagenzi be batsinde, Aimable aritambika arawurenza.

Aha, Corner yavuyemo na yo byarangiye abasore ba Rutsiro bashyize umupira hanze.

15:14

10' Rayon Sports yongeye kurema uburyo bwo gutsinda

Nyuma yo guhanahana neza mu kibuga hagati, Iraguha Hadji ahaye umupira Bugingo Hakim, na we uwushyikirije kapiteni we Muhire Kevin, uyu awuha neza Bassane ariko ubwugarizi bwa Rutsiro bushyira umupira muri Corner.

Corner ivuyemo yabyaye iyindi ariko birangira Rutsiro yirwanyeho ku izamu ryayo ntihagira ikivamo.

15:11

08' Rutsiro nta bwoba iri kugaragaza kuri Rayon Sports

Iyi kipe yo mu ntara y'Uburangerazuba kugeza ubu nta gihunga iri kugaragaza mu kibuga.

Nubwo nta kipe n'imwe irarema uburyo bukomeye cyane ariko no mu kibuga hagati amakipe yombi ari kunganya kwiharira umupira.

15:10

06' Rayon Sports yatangiye kwibona mu mukino

Muhire Kevin akorewe ikosa na Kawunga, ahita akinana umupira byihuse na Bugingo Hakim ushyize umupira mu rubuga rw'amahina rwarimo Charles Baale ariko uyu Mugande yongera gushyira hanze umupira ateye n'umutwe.

15:09

05' Rayon Sports iremye amahirwe akomeye yo gutsinda

Bassane azamukanye umupira anyuze ku ruhande rw'iburyo acenga abakinnyi babiri ba Rutsiro ariko Ngirimana Alexis awushyira hanze.

Corner yatewe neza na Muhire Kevin Charles Baale awuteye n'umutwe ujya hanze.

15:06

03' Corner ya mbere ya Rutsiro

Umupira muremure utewe n'umunyezamu Matumele Monzobo ubwugarizi bwa Rayon Sports buhisemo kuwushyira muri Corner.

Iyi abakinnyi ba Rutsiro bayihananye gusa birangira Mumbere Jeremie ateye umupira nabi ugarurwa byoroshye na Gning.

15:04

02' Hadji yari yiherewe impano ntiyayakira neza

Myugariro wa Rutsiro Eugene Habyarimana afunze umupira nabi wifatirwa na Hadji Iraguha wari hafi y'urubuga rw'amahina awuhinduye umunyezamu awufata neza.

15:03

02' Rutsiro yari iremye amahirwe ya mbere y'umukino

Uwambajimana Leon Kawunga wahoze muri Rayon Sports azamukanye umupira mu kibuga hagati awuterekera Mumbere ariko uyu rutahizamu ntiyashobora guhindukira neza umupira wifatirwa na Nsabimana Aimable.

15:01

Umukino uratangiye

Nsabimana Celestin nyuma yo kuvugana n'abatoza b'amakipe yombi ahaye uburenganzira Rayon Sports itangiza umukino nubwo ihise itakaza umupira.

14:56

Amakipe yombi agarutse mu kibuga

Barangajwe imbere n'abasifuzi bane b'umunsi, Rayon Sports na Rutsiro zinjiye mu kibuga aho zigiye gukina umukino w'umunsi wa Gatanu wa Shampiyona.

Rayon Sports yambaye ya myenda yayo y'ubururu amakabutura n'imipira ndetse n'amasogisi.

Rutsiro yambaye imipira y'umweru n'amakabutura yera amasogisi yo ni umukara.

14:53

Abari i Kigali batunguwe no kubura umukino kuri Televiziyo

Shampiyona y'Icyiciro cya mbere ifite umuterankunga usanzwe anerekana Imikino itandukanye gusa amakuru ari hano Rubavu ni uko yaba umukino w'uyu munsi hagati ya Rayon Sports na Rutsiro ndetse n'uw'ejo hagati ya APR FC yatwaye Shampiyona na Etincelles ikunzwe i Rubavu, nta n'umwe uzerekanwa kuri Televiziyo.

Ni inkuru abasigaye i Kigali batakiriye neza gusa bashobora gukurikira buri kimwe cyose hano kuri IGIHE.

14:45

I Rubavu abafana bagerageje kwitabira

Nubwo Stade Umuganda itakubise ngo yuzure, arko abafana benshi ba Rayon Sports bari kugaragara kuri iki kibuga aho ahasigaye hose aba bihariye imiryango ibiri mu gihe undi muryango urimo abakunzi ba Rutsiro bambaye imyenda yabo y'umutuku.

Rayon Sports mbere y'uno mukino yabanje kwerekana imyenda yayo ndetse iranayigurisha ku bakunzi bayo bari i Rubavu.

14:42

Amakipe yombi yasoje kwishyushya asubiye mu rwambariro

Mu kanya katarambiranye umukino uri bube utangiye, aho yaba abatoza baba abasifuzi ndetse n'abakinnyi by'umwihariko bose basubiye mu rwambariro gushyira utudomo kuri za i maze bagahatana mu minota 90

14:40

Abasifuzi b'umunsi basanzwe bamenyerewe mu mupira w'u Rwanda

Nsabimana Celestin usanzwe ari umusifuzi ukomeye mu Rwanda ni we uri bube ayobora umukino.

Mutuyimana Dieudonne Dodos ari bube ari Umusifuzi wa mbere wungirije

Nsabimana Patrick ni umusifuzi wa kabiri wungirije

14:38

Rayon Sports ntabwo yahinduye ikipe itsinda

Robertinho yahisemo gukoresha XI bamuhaye intsinzi kuri Gasogi

42 Khadime Ndiaye (GK)
13 Fitina Omborenga
24 Bugingo Hakim
4 Nsabimana Aimable
54 Gning
21 Niyonzima Olivier Seif
10 Aruna Madjaliwa
11 Muhire Kevin
14 Charles Baale
18 Bassane
99 Iraguha Hadji

14:34

Abakinnyi Rutsiro yagiriye icyizere uyu munsi

Umutoza Gatera Musa ukunda kugora Rayon Sports agiye gukinisha abakinnyi bakurikira

30 Matumele Monzobo (GK)
2 Habyarimana Eugene
16 Bwira Bandu Olivier
23 Shyaka Philbert
15 Ngilimana Alexis
6 Uwambazimana Leon
7 Nizeyimana Jean Claude
22 Kwizera Eric
18 Mumbere Jeremie
20 Habimana Yves
10 Mumbere M. Jonas

14:23

IKAZE KURI STADE UMUGANDA

Igihe turi i Rubavu ahagiye kubera umukino w'umunsi wa Gatanu wa Shampiyona hagati ya Rayon Sports na Rutsiro yakirira kuri iki kibuga.

Ni umukino amakipe yombi agiye gukina ari mu bihe bitandukanye.

Rayon Sports imaze gutsinda umukino umwe muri Shampiyona, aho iheruka gutsinda Gasogi United igitego 1-0 kuri Stade Amahoro. Rutsiro yo yatsinze imikino ibiri nyuma yo kuzamuka mu cyiciro cya Mbere uyu mwaka.

Amakipe yombi amaze gukina imikino itatu n'ikirarane kimwe cya APR FC.

Umukino yaherukaga guhuriramo kuri iki kibuga, Rayon Sports yari yahatsindiye ibitego 2-0 muri Gashyantare 2023