Rwanda vs Libya

Rwanda 0-1 Libya

Uko umukino uri kugenda

Umwanditsi

: Eric Tony Ukurikiyimfura & Jah D'eau Dukuze

Amafoto

: Kwizera Hervé & Kwizera Remy Moses

20:07

Reba ibyaranze umukino u Rwanda rwatsinzwemo na Libya


20:00

Amahirwe y'u Rwanda yo kujya muri CAN aragabanutse nubwo atarangiye

Ikipe y'u Rwanda 'Amavubi' itsindiwe mu rugo n'iya Libya igitego 1-0, bigabanya amahirwe yayo yo kujya mu Gikombe cya Afurika kizaba mu 2025.

Mu Itsinda D, Amavubi agumye ku mwanya wa gatatu n'amanota atanu, inyuma ya Nigeria ifite amanota 10 mu gihe Benin ifite amanota atandatu ku mwanya wa kabiri.

Libya igize amanota ane ku mwanya wa kane.

Kuri uyu wa Kane saa Tatu z'ijoro, Benin irakira Nigeria mu wundi mukino.

U Rwanda ruzasoza imikino yarwo rwakirwa na Nigeria ku wa Mbere, tariki ya 18 Ugushyingo mu gihe Libya izakira Benin.

Amahirwe y'u Rwanda yo kujya mu Gikombe cya Afurika ni uko Benin yatsindwa imikino ibiri isigaje, rwo rukazatsinda Nigeria.

19:58

Umukino urarangiye

19:57

90+4' Gusimbuza

Bader Hassan asimbuwe na Muhanad Mustafa.

19:54

90+3' Gusimbuza

Bizimana Djihad asimbuwe na Rubanguka Steve.

19:54

90+2' Ikarita y'umuhondo

Issa wa Libya ahawe ikarita y'umuhondo akiniye nabi Muzungu.

19:52

90' Iminota itanu y'inyongera

Umusufuzi wa kane yerekanye iminota itanu y'inyongera.

19:51

88' Amavubi ari gushaka igitego cyo kwishyura

Abakinnyi bose b'Amavubi bazamutse ndetse bari gusatira Libya bashaka igitego cyo kwishyura.

19:48

85' Abafana batangiye gutaha

Bamwe mu bafana b'Amavubi batangiye gusohoka muri stade bataha.

Gutsindwa uyu mukino bivuze ko amahirwe yo kujya mu Gikombe cya Afurika araba agabanyutse cyane.

19:46

83' Igitego cya Libya

Libya ifunguye amazamu yo muri Stade Amahoro ku gitego cyinjijwe na Fahid Mohamed.

19:43

80' Gusimbuza



Mugisha Gilbert asimbuwe na Iraguha Hadji ku ruhande rw'Amavubi.

19:41

78' Gusimbuza


Fahid Mouhamed na Ossamah Mahmdoud binjiye mu kibuga ku ruhande rwa Libya ikoze impinduka ebyiri.

Abakinnyi ba Libya batangiye gushaka uko barya iminota.

19:38

75' Ikarita y'umuhondo

Manzi Thierry ahawe ikarita y'umuhondo akiniye nabi Nouradin Elgaib.

19:36

73' Coup-franc nziza y'Amavubi


Issa akiniye nabi Bizimana Djihad inyuma y'urubuga rw'amahina, hafi y'uruziga.

19:35

72' Amavubi yari yitsinze


Fadel Hamad yinjiranye Mangwende mu rubuga rw'amahina, ahindura umupira ukozweho na Manzi Thierry ujya muri koruneri, ariko ukaba werekezaga mu izamu.

19:33

70' Uburyo bwa Libya


Osama Mukhtar ashatse gutungura Ntwari Fiacre, atera ishoti rikomeye, uyu munyezamu w'Amavubi ahoza umupira mbere yo kuwufata neza.

19:32

69' Ikarita y'umuhondo



Ahmed Saleh ahawe ikarita y'umuhondo ku ikosa akoreye kuri Mangwende hafi y'urubuga rw'amahina.

Ikosa rihanwe na Bizimana Djihad, Nshuti Innocent ashyizeho umutwe, umupira ujya hejuru y'izamu.

19:31

68' Abafana b'Amavubi batangiye amasengesho



Bamwe mu bafana b'Amavubi bari kuririmba bati "Iyo Mana dusenga irakomeye".

Ni nyuma y'uko Amavubi ari gukora byose ariko amahirwe akaba ikibazo.

19:28

65' Coup-franc y'Amavubi

Imanishimwe Emmanuel akiniwe nabi na Ahmed Saleh inyuma y'urubuga rw'amahina mu ruhande.

Ikosa rihanwe na Muhire Kevin, Libya ibyitwaramo neza, ikiza izamu ryayo mbere y'uko Nshuti Innocent atera umupira ugiye ku ruhande.

19:22

59' Ikarita y'umuhondo



Umunyezamu wa Libya, Murad Abu Bakr, ahawe ikarita y'umuhondo kubera gutinda gutangiza umukino.

19:21

59' Ubundi buryo bw'Amavubi buvuyemo


Mugisha Gilbert ahinduye umupira mu rubuga rw'amahina, usanga Manzi Thierry uwukinnye, ku bw'amahirwe make ujya hejuru y'izamu rya Libya.

19:21

Abafana b'Amavubi icyizere kiracyari cyose

Muri Stade Amahoro abakunzi b'Amavubi bakomeje kuzamura amajwi bashyigikira ikipe y'igihugu.

Abaganiriye na IGIHE bagaragaje icyizere cyo kwitwara neza kuri uyu mukino.

19:20

56' Amavubi ahushije igitego cyabazwe

Omborenga Fitina ahinduye umupira mwiza mu rubuga rw'amahina, Nshuti Innocent awufungira Muhire Kevin uwuteye ku ruhande rw'izamu.

Bwari uburyo bwabazwe.

19:12

49' Amavubi yirangayeho

Nshuti Innocent yinjiranye umupira mu rubuga rw'amahina ari wenyine, abonye ko Ali Youssuf agiye kumugeraho, atera ishoti ryo hasi rigiye hanze.

19:10

47' Amavubi yari akinnye neza


Nshuti Innocent ananiwe kugera ku mupira yari acomekewe na Djihad Bizimana nyuma yo gukina neza kw'Amavubi, ufatwa n'umunyezamu Murad Abu.

19:07

Igice cya kabiri kiratangiye


Libya itangiranye umupira mu gice cya kabiri, Elmarremi akinana na bagenzi be.

19:05

Gusimbuza


U Rwanda rukoze impinduka za mbere, Dushimimana Olivier 'Muzungu' asimbuye Kwizera Jojea naho Muhire Kevin asimbura Samuel Gueulette.

18:58

DJ Marnaud na we yasusurukije abitabiriye umukino

DJ Marnaud n'ababyinnye be bazengurutse igice cya stade hasi, babyina.

Ni mu gihe DJ Brianne ari we uri gucuranga.

18:56

Amavubi ari gushyushya abakinnyi babiri



Umutoza wongerera imbaraga abakinnyi b'Amavubi, Mwambari Serge, ari gushyushya Muhire Kevin na Dushimimana Olivier 'Muzungu'.

Samuel Gueulette na Kwizera Jojea ni bo bashobora gusimburwa.

18:50

Riderman yageze ku rubyiniro



Umuhanzi Gatsinzi Emery 'Riderman' yageze ku rubyiniro aho ari gususuruta abitabiriye umukino.

Hari abakinnyi yitwaje bari kumufasha hasi ku ruhande rw'ikibuga.

18:48

Igice cya mbere kirarangiye


Iminota 45 y'umukino irangiye u Rwanda runganya na Libya ubusa ku busa.

Amavubi yagerageje gusatira, ariko kubona izamu byagoranye.

Hari utuntu duto Umutoza Spittler n'abakinnyi be bakosora mu minota 45 isigaye.

18:46

45' Iminota ibiri y'inyongera

Umusifuzi wa Kane, Wilson Muiange, yerekanye iminota ibiri y'inyongera.

Amavubi aracyasatira.

18:44

43' Amavubi yongeye gusatira ariko ntacyo bitanze


Djihad ahaye umupira Mangwende uguye ku murongo w'urubuga rw'amahina, ariko umupira ujya muri koruneri.

Djihad ateye koruneri, Mutsinzi ashyiraho umutwe, ariko Libya ikura umupira ku murongo.

Umusifuzi agaragaje ko hari habayeho ikosa.

18:40

Amwe mu mafoto y'umukino

Amavubi yatangiranye imbaraga asatira cyane ariko uko iminota iri kugenda ni ko amashagaga ari kugabanuka.

18:37

35' Ntwari Fiacre ahawe amashyi menshi


Fadel Hamad acomekewe umupira muremure ndetse yari yasize Imanishimwe Emmanuel, ariko Ntwari Fiacre arasohoka arenza umupira ukoresheje umutwe.

Abafana bamuhaye amashyi menshi.

18:33

31' Umukino wakomeje

Imanishimwe Emmanuel agize uruhare muri koruneri u Rwanda rubonye.

Umupira usubijwe mu kibuga na Samuel Gueulette, ushyizweho umutwe na Nshuti Innocent ujya hanze.

18:32

29' Umukino uhagaze gato

Imanishimwe Emmanuel ateye umupira n'umutwe agongana na rutahizamu wa Libya, Fadel Hamad, bombi bahita baryama mu kibuga.

Umusifuzi Clesio ahamagaje abaganga ku mpande zombi.

18:29

27' Coup-franc y'Amavubi

Bizimana Djijhad akiniwe nabi na Ali Youssuf, ikosa rihanwe na Kwizera Jojea, habura umukinnyi w'Amavubi ukurikira umupira ngo awushyire mu izamu, ujya hanze.

18:27

26' Umurindi w'abafana uri hejuru

Mu gihe Amavubi abonye koruneri, abafana b'Amavubi bateruriye hamwe bagira ngo bashyire igitutu kuri Libya ariko ntibimaze akanya.

18:26

25' Mangwende yababaye


Issa Absahmin ateye koruneri ya Libya, umupira ukinwa na mugenzi we ukiniye nabi Imanishimwe Emmanuel 'Mangwende'.

Myugariro w'Amavubi ari kwikanda agaragaza ko yababaye nubwo yahagurutse.

18:22

21' Ubundi buryo bw'Amavubi

Omborenga arenguye umupira, awuha Bizimana Djihad uwuhinduye mu rubuga rw'amahina, Nshuti Innocent awukinnye ujya ku ruhande aho yari hamwe na Ali Youssuf wa Libya.

18:19

18' Amavubi ahushije uburyo bwiza


Kwizera Jojea ahaye umupira Omborenga Fitina, na we ahita akinana na Bizimana Djihad uhinduye umupira ukomeye imbere y'izamu, Nshuti Innocent ananirwa kuwukozaho ikirenge ngo ujye mu nshundura.

Bwari uburyo bwiza.

18:17

17' Umukino wagabanyije umuvuduko



Amavubi ntakiri gusatirana ingoga ndetse na Libya yasubiye inyuma ica umurongo kugira ngo u Rwanda rutagera ku rubuga rw'amahina rwayo.

Imikinire yatangiye kuzamo imibare myinshi.

18:15

13' Amavubi ari gukoresha uruhande rw'ibumoso



Kugeza ubu, muri iyi minota ibanza, urabona ko Amavubi ashaka gukoresha uruhande rw'ibumoso ruriho Mangwende na Mugisha Gilbert.

Iburyo hari guca imipira mike irimo utewe Omborenga Fitina, ushyizweho umutwe na Samuel Gueulette ujya ku ruhande.

18:10

8' Uburyo bwa Libya

Subhi Aldhawi ahawe umupira hagati mu rubuga rw'Amavubi, yegera imbere gato, atera ishoti rikomeye rinyuze ku ruhande rw'izamu ririnzwe na Ntwari Fiacre.

18:09

8' Hari icyizere ko Stade Amahoro yuzura


Kugeza ubu, igice cyo hasi cyose cya Stade Amahoro cyamaze kuzura.

Igice cyo hejuru kirimo abafana nka 1/3.

Hanze ya Stade haracyari abantu benshi bategereje kwinjira.

18:07

5' Uburyo bwiza bw'Amavubi

Bizimana Djihad ahinduye umupira mwiza, usanga Mugisha Gilbert uteye ishoti rikomeye, rikurwamo n'umunyezamu wa Libya.

Amavubi atangiye asatira.

18:02

1' Djihad yihanangirijwe ku munota wa mbere



Amavubi atangiye asatira, Djihad Bizimana akinira nabi myugariro wa Libya ndetse yihanangirijwe bikomeye n'umusifuzi w'Umunya-Mozambique Celso Alvacao.

18:01

Umukino uratangiye

Ikipe y'Igihugu 'Amavubi' ni yo itangiranye umupira, Nshuti Innocent akinana na Djihad ukinanye n'abandi.

Abafana bari bategereje uyu munota.

17:59

Hafashwe umunota wo kwibuka no guha icyubahiro Anne Mbonimpa


Mbere y'uko umukino utangira, abari muri Stade Amahoro babanje gufata umunota wo kwibuka Anne Mbonimpa wari umukozi muri FERWAFA.

Mbonimpa wari ushinzwe umupira w'abagore, yitabye Imana ku wa 9 Ugushyingo 2024 mu gihe yashyinguwe ku wa Gatatu.

CAF yemeye ko mbere y'umukino ahabwa icyubahiro kubera uruhare yagize mu guteza imbere ruhago by'umwihariko iy'abagore.


17:56

Haririmbwe indirimbo zubahiriza ibihugu byombi


Indirimbo yubahiriza Libya ni yo ibanje kuririmbwa muri Stade Amahoro, hakurikiraho Rwanda Nziza yishimiwe cyane n'abafana benshi bari hano.

17:55

Indirimbo ya CAF ibanje kuba ikibazo


Mbere y'uko umukino nk'uyu utangira, hacurangwa indirimbo ya CAF, amakipe akayinjiriramo.

Kuri Stade Amahoro si uko byagenze ubwo abana binjiranaga amabendera y'ibihugu byombi.

Bisabye ko Jules Karangwa wo muri FERWAFA ahamagara aba-DJ kugira ngo bayicurange, abakinnyi babona gusohokana n'abasifuzi.

17:52

Andi mafoto y'amakipe yombi yishyushya

17:44

Amavubi arasabwa iki muri uru rugendo rugana muri CAN?

Umunyamakuru wa B&B FM Kigali, Samir Sylvestre, yavuze ku mukino u Rwanda rugiye guhuramo na Libya n'icyo abona Amavubi asabwa kugira ngo azajye muri Maroc mu mwaka utaha.

17:38

Amakipe yombi asoje kwishyushya


Abakinnyi b'u Rwanda n'aba Libya basubiye mu rwambariro nyuma yo kwishyushya.

Umukino uratangira mu minota 22 iri imbere.

17:27

Phanuel Kavita ari mu babanje ku ntebe ku ruhande rw'Amavubi

Abasimbura Umutoza Frank Spittler yatoranyije uyu munsi ni:

2 Nshimiyimana Yunusu
7 Ruboneka Jean Bosco
9 Iraguha Hadji
10 Byiringiro Jean Gilbert
11 Muhire Kevin
16 Dushimimana Olivier
18 Muhawenayo Gad
20 Niyomugabo Claude
21 Kavita Phanuel Mabaya
23 Buhake Clement Twizere
24 Rubanguka Steve
25 Mbonyumwami Taiba

17:23

Abakinnyi ba Libya babanje mu kibuga

Umutoza wa Libya, Nasir Alhuthayri, yahisemo gukinisha:

12 Murad Abu Bakr Alwuheeshi (C)
4 Ali Yousuf Abraheem Almusrati
5 Ahmed Saleh
8 Nouradin Elgelaib
13 Elbahlul Issa Abusahmin
15 Subhi Aldhawi
17 Fadel Hamad Slamah Mansour
19 Ezzeddin Elmaremi
20 Osama Mukhtar Elsharimi
23 Bader Hasan Ahmed
24 Abdullah Elmeehoub

Abasimbura:

1 Ahmed Ahmoudah
3 Motasem Masoud Mohamed Sabbou
6 Suhib Shafshuf
7 Faraj Ghaydhan
9 Fahd Mohamed
10 Osamah Mahmoud Alshareef
11 Elmahdi Elkout
14 Muhanad Mustafa Almabrouk Madeen
16 Abdulmuyassir Boushibah
18 Faisal Saleh
21 Sanad Bin Ali
22 Mohamed Darebi

17:18

Amakipe yombi yabanje gusura ikibuga nyuma yo kugera kuri Stade Amahoro

17:13

Abasifuzi bo muri Mozambique bariteguye



Uyu mukino ugiye kuyoborwa n'abasifuzi b'Abanya-Mozambique bayobowe na Celso Armindo Alvacao.

17:11

Abafana bakomeje kugera kuri Stade Amahoro

17:07

Abakinnyi b'Amavubi babanje mu kibuga


Umutoza w'Amavubi, Frank Spittler Torsten, yakoze impinduka imwe ugereranyije n'ikipe yabanjemo ku mukino wa Benin uheruka.

Manzi Thierry yasubiranye umwanya we, asimbura Niyigena Clement ufite amakarita abiri y'umuhondo.

Ababanjemo:

Ntwari Fiacre
Omborenga Fitina
Imanishimwe Emmanuel
Mutsinzi Ange
Manzi Thierry
Mugisha Bonheur
Bizimana Djihad (c)
Samuel Gueulette
Mugisha Gilbert
Kwizera Jojea
Nshuti Innocent.

17:03

Morale ni yose ku bafana b'Amavubi


Abafana benshi bari mu mihanda igana i Remera, abandi bamaze kugera muri Stade Amahoro.

Ubarebye ndetse ukurikije ibyo batangaza, icyizere cyo gutsinda ni cyose.

16:24

Ikaze kuri Stade Amahoro i Remera



IGIHE ibahaye ikaze kuri Stade Amahoro i Remera ahagiye kubera umukino w'Umunsi wa Gatanu wo mu Itsinda D ryo gushaka itike y'Igikombe cya Afurika cya 2025 kizabera muri Maroc.

U Rwanda rwakiriye uyu mukino rusabwa gutsinda kugira ngo rwiyongerere amahirwe yo kuzakina Igikombe cya Afurika ruherukamo mu myaka 20.

Umukino nyirizina uratangira saa Kumi n'Ebyiri.