APR FC 2-0 AS Kigali
Uko umukino uri kugenda
Umwanditsi |
: Eric Tony Ukurikiyimfura |
Amafoto |
: Kasiro Claude & Umwari Sandrine |
23:41
Abakinnyi bashya ba APR FC bitwaye gute?
20:46
Abafana ba APR FC baririmbye Denis Omedi
20:44
AMASHUSHO: Reba ibyaranze umukino APR FC yatsinzemo AS Kigali
16:54
APR FC igeze ku mukino wa nyuma w'Igikombe cy'Intwari
Ibitego bya Denis Omedi na Niyibizi Ramadhan bifashije APR FC kugera ku mukino wa nyuma w'Igikombe cy'Intwari itsinze AS Kigali 2-0.
Ikipe y'Ingabo z'Igihugu izahura n'ikomeza hagati ya Rayon Sports na Police FC zikina guhera Saa Kumi n'Ebyiri.
Umukino wa nyuma uteganyijwe ku wa Gatandatu, tariki ya 1 Gashyantare 2025.
16:52
Umukino urarangiye
16:50
90' APR FC yari igiye gusimbuza ariko yisubiyeho
Taddeo Lwanga na Nshimirimana Ismael Pitchou bamaze iminota ine bategereje kujya mu kibuga ndetse bagaragaje ko batishimiye uburyo Umutoni Aline yabigenzemo gake.
Umutoza Darko Novic abonye hasigaye iminota itatu, ababwira ko bajya kwicara.
16:49
90' Iminota itatu y'inyongera
Umusifuzi wa Kane, Umutoni Aline, yerekanye iminota itatu y'inyongera.
16:46
85' AS Kigali yibuze
APR FC iri gusatira cyane muri iyi minota, AS Kigali isa n'iyananiwe cyangwa yamaze gutakaza icyizere.
16:44
84' APR FC ihushije igitego cyabazwe
Dushimimana Olivier ahinduye umupira mwiza mu rubuga rw'amahina, usanga Tuyisenge Arsene uwuserebetse, ku bw'amahirwe ye make uhura n'Umunyezamu Cuzuzo Aime Gael uvamo.
16:43
82' Abafana ba APR FC batangiye kujya mu bicu
Mu gihe umukino uri kugana mu minota ya nyuma, abafana ba APR FC bamaze kwizera kugera ku mukino wa nyuma ndetse kuri ubu bari kubyina bishimira ibitego bibiri ikipe yabo yamaze gutsinda.
16:40
79' Igitego cya kabiri cya APR FC
Dushimimana Olivier 'Muzungu' akiniwe nabi na Benedata Janvier hafi y'urubuga rw'amahina mu ruhande.
Ikosa rihanwe na Niyibizi Ramadhan, umupira ugwa neza mu izamu, mu nguni ya kabiri hejuru.
Ikosa rihanwe na Niyibizi Ramadhan, umupira ugwa neza mu izamu, mu nguni ya kabiri hejuru.
16:36
76' Gusimbuza
Denis Omedi, Hakim Kiwanuka na Mamadou Lamine Bah basimbuwe na Tuyisenge Arsene, Dushimimana Olivier 'Muzungu' na Niyibizi Ramadhan ku ruhande rwa APR FC.
16:34
Abakinnyi ba APR FC bishimira igitego cya Denis Omedi
16:33
73' Gusimbuza
Ndayishimiye Didier asimbuye Shaban Hussein Tchabalala ku ruhande rwa AS Kigali.
16:31
72' Uburyo bwa AS Kigali
Haruna Niyonzima ateye umupira mwiza mu izamu, ashaka gutsinda ariko Dauda Yussif awukozaho umutwe uvamo.
16:27
67' Gusimbuza
Abouba Saidi asimbuye Nkubana Marc naho Rucogoza Eriassa asimburwa na Gilbert ku ruhande rwa AS Kigali.
16:23
65' Amwe mu mafoto y'umukino
16:22
62' Ikarita y'umuhondo
Franklin Onyeabor ahawe ikarita y'umuhondo akiniye nabi Ruboneka Jean Bosco.
16:20
60' Coup-franc ya APR FC
Niyomugabo Claude akiniwe nabi na Nkubana Marc mu ruhande ahagana muri koruneri, umusifuzi yemeza ko ari ikosa rihanwe, AS Kigali ikuraho neza umupira.
16:17
58' Igitego cya APR FC
Denis Omedi afunguye konti y'ibitego muri APR FC, atera penaliti iburyo bwa Gael wagiye ibumoso.
APR FC 1-0 AS Kigali.
16:16
56' Ikarita y'umuhondo
Akayezu Jean Bosco ahawe ikarita y'umuhondo ku ikosa yakoze rikavamo penaliti.
16:15
55' Penaliti ya APR FC
Mugisha Gilbert ahinduye umupira usanga Lamine Bah uwuteye mu izamu uvamo, awusubijemo ujya hejuru, ariko ahuriza hamwe n'umusifuzi ko myugariro wa AS Kigali yawukuyemo n'ukuboko, hatangwa penaliti.
16:11
50' Uburyo bwa APR FC
Mugisha Gilbert acenze Nkubana Marc yinjira hagana inyuma y'urubuga rw'amahina, atera ishoti rinyuze hejuru y'izamu rya AS Kigali ririnzwe na Cuzuzo.
16:09
48' Imvura yongeye kuba nyinshi i Nyamirambo
Ubwo amakipe yombi yajyaga kuruhuka, imvura yari nke, ariko ubu yongeye kuba nyinshi.
Hari abafana bahisemo kuyigumamo.
16:04
46' Igice cya kabiri cyatangiye
AS Kigali itangiranye umupira mu gice cya kabiri, ariko ntiyawutindana urarenga.
15:50
Imvura yongeye kwimura abafana i Nyamirambo
Imvura yatangiye kugwa kuri Stade, yatumye abafana bari mu myanya idatwikiriye birukankira aho bashobora kugama.
Abashinzwe umutekano banze ko aba bafana buzura imyanya yose itwikiriye kandi atari yo bishyuye.
Mu minota ya mbere y'umukino, na bwo hari abandi bagiye ahatwikiriye kandi atari ho bishyuye.
Uwaguze itike uyu munsi, yemerewe kureba imikino yombi (hamwe n'uwa Rayon Sports na Police FC).
15:48
Igice cya mbere kirarangiye
Iminota 45 ibanza y'umukino wa mbere wa 1/2 hagati ya AS Kigali na APR FC irangiye ari ubusa ku busa.
15:46
45' Iminota itatu y'inyongera
Umusifuzi wa Kane, Umutoni Aline, yerekanye iminota itatu y'inyongera.
Amakipe yombi akomeje gushaka igitego.
15:45
44' Ubwugarizi bwa AS Kigali buhagaze neza
APR FC ikomeje guhindura imipira myinshi mu rubuga rw'amahina, ariko ubwugarizi bwa AS Kigali buhagaze neza ku buryo buri guhita buyikuraho.
15:43
42' Gusatira kwa APR FC
Dauda Yussif ahaye umupira Mugisha Gilbert uwusunikiye Lamine Bah atera ishoti rifashwe na Cuzuzo nubwo umupira wari kujya hanze.
15:41
39' Uburyo bwa APR FC busubijwe inyuma
Hakim Kiwanuka ahinduye umupira mwiza mu rubuga rw'amahina rwa AS Kigali, Mugisha Gilbert, Denis Omedi na Ruboneka bagorwa no kuwutsinda, umusifuzi wo ku ruhande agaragaza ko hari habayeho kurarira.
15:37
35' AS Kigali yahinduye umukino
Muri iyi minota, AS Kigali ni yo iri gusatira cyane kurusha APR FC yihariye iminota 20 ibanza.
Umupira uri gukinirwa cyane hagati mu kibuga.
15:35
33' Ntirushwa Aime yababaye
Ntirushwa Aime ukina hagati muri AS Kigali, avuye mu kibuga yigenza ariko ari hamwe n'abaganga nyuma yo kugirira ikibazo imbere y'izamu rya APR FC ubwo AS Kigali yari isatiriye.
Uko bigaragara arasubira mu kibuga.
15:31
30' Ikarita y'umuhondo
Rucogoza Eriassa ahawe ikarita y'umuhondo akubise umugeri Ruboneka Jean Bosco ubanje kwitabwaho n'abaganga mbere y'uko umukino ukomeza.
APR FC ni yo yari yakoze ikosa mbere.
15:30
28' Umukino watangiye kugaragaramo amakosa menshi
Byibuze buri masegonda 30 umukino uri guhagarara kubera amakosa ari kubera mu kibuga.
Amakipe yombi ari gukinirana nabi.
Amakipe yombi ari gukinirana nabi.
15:25
24' APR FC irarokotse
Haruna Niyonzima ahaye umupira Ntirushwa Aime uteye ishoti rikomeye, rikurwamo na Pavelh Ndzila mbere y'uko APR FC ishyira umupira muri koruneri kuko Tchabalala yashakaga gutsinda.
15:23
21' Coup-franc ya APR FC
Ruboneka Jean Bosco akiniwe nabi na Rucogoza Ilias inyuma y'urubuga rw'amahina mu ruhande, ikosa ahannye ashaka Omedi ku mutwe, umupira ukurwaho na myugariro wa AS Kigali.
15:21
20' Ubundi buryo bwa AS KIgali
AS Kigali yongeye gusatira, ishoti ritewe na Tchabalala rijya hino hejuru y'izamu rya APR FC.
15:21
19' Coup-franc nziza ya AS Kigali
Haruna Niyonzima ahannye ikosa Lamine Bah yakoreye kuri Benedata Janvier, umupira ateye ukorwaho na Onyeabor ujya hejuru y'izamu.
15:19
18' Haruna Niyonzima aracyarimo
Haruna uri gukinira AS Kigali ku nshuro ya gatandatu, nyuma y'amezi ane atandukanye na Rayon Sports, ni umwe mu bakinnyi bahagaze neza mu kibuga kugeza kuri uyu munota.
15:17
15' Gusatira kwa AS Kigali
Lamine Bah atakaje umupira ufashwe na Haruna Niyonzima, akinana na Ntirushwa Aime uteye ishoti ryitambikwa n'ubwugarizi bwa APR FC mbere y'uko Niyomugabo Claude ashyira umupira muri koruneri itagize icyo itanga.
15:11
10' APR FC ihushije uburyo bwabazwe
Mu minota 10 ya mbere, APR FC ni yo kipe nziza kugeza ubu kuko iri gusatira cyane AS Kigali nubwo gutera mu izamu bikomeje kugorana.
Mugisha Gilbert ahinduriwe umupira mwiza mu rubuga rw'amahina, ateye ishoti ryitambikwa na Frank Onyeabor, umupira ujya muri koruneri itagize icyo itanga.
Mugisha Gilbert ahinduriwe umupira mwiza mu rubuga rw'amahina, ateye ishoti ryitambikwa na Frank Onyeabor, umupira ujya muri koruneri itagize icyo itanga.
15:09
7' Uburyo bwa APR FC
Yussif Dauda ahaye umupira Mugisha Gilbert uwumusubije, awuhinduye mu rubuga rw'amahina unyura kuri Denis Omedi mbere y'uko ukorwaho na Akayezu ugafatwa na Cuzuzo Aime Gael.
15:07
5' Imvura yimuye abafana bari ahadatwikiriye
Imvura yatangiye kugwa mu nkengero za Kigali Pele Stadium itumye abafana batari bake bari mu myanya idakwikiriye, bose birukira ahatwikiriye ngo bugame hakiri kare.
15:04
Uko amakipe yombi yaserutse kuri uyu wa Kabiri
15:04
3' Gusatira kwa APR FC
Denis Omedi ahaye umupira Mugisha Gilbert uwuhinduye, ujya muri koruner itewe, Tchabalala akinirwa nabi imbere y'izamu rya AS Kigali.
15:01
1' Uburyo bwa AS Kigali
Dauda Yussif atwawe umupira na Emmanuel Okwi wigiye imbere, atera ishoti rikomeye ashaka gutungura Pavelh Ndzila, umupira ujya ku ruhande gato.
15:00
Umukino uratangiye
Umusifuzi Ngabonziza Jean Paul atangije umukino. Umupira wa mbere utewe na Denis Omedi wa APR FC.
Ikipe y'Ingabo z'Igihugu yambaye imipira n'amasogisi by'umweru n'amakabutura y'umukara mu gihe AS Kigali yambaye Orange.
14:50
Umukino urayoborwa na Ngabonziza Jean Paul
Umusifuzi Ngabonziza Jean Paul ni we ugiye kuyobora umukino wa mbere wa 1/2.
Abasifuzi bo ku ruhande ni Mutuyimana Dieudonné (Dodos) na Mugabo Eric mu gihe Umusifuzi wa Kane ari Umutoni Aline.
14:44
Amakipe yombi yasoje kwishyushya
Abakinnyi b'amakipe yombi basubiye mu rwambariro nyuma yo kwishyushya.
Umukino uratangira mu minota mike iri imbere.
14:34
Abakinnyi ba AS Kigali babanje mu kibuga
Umutoza wa AS Kigali, Mbarushimana Shabani, yahisemo gukinisha:
Cuzuzo Aime Gael
Nkubana Marc
Akayezu Jean Bosco
Rucogoza Ilias
Ntirushwa Aime
Franlin Onyeabor
Haruna Niyonzima
Benedata Janvier
Ishimwe Saleh
Emmanuel Okwi
Shabani Hussein Tchabalala
14:16
Denis Omedi na Kiwanuka babanje mu kibuga ku ruhande rwa APR FC
Umutoza wa APR FC, Darko Novic, yahisemo gukinisha bamwe mu bakinnyi bashya iyi kipe iheruka kongeramo.
Ababanje mu kibuga ni:
Pavelh Ndzila
Ndayishimiye Dieudonne
Niyomugabo Claude (c)
Aliou Souane
Niyigena Clement
Dauda Yussif
Ruboneka Bosco
Lamine Bah
Denis Omedi
Hakim Kiwanuka
Mugisha Gilbert
14:12
AS Kigali yagarutse mu makipe akina Irushanwa ry'Intwari
Igikombe cy'Intwari mu mupira w'amaguru gitegurwa na FERWAFA ku bufatanye n'Urwego rushinzwe Intwari z’Igihugu, Imidali n’Impeta by’Ishimwe (CHENO), gihuza amakipe ane ya mbere aho Shampiyona iba igeze mu mpera za Mutarama.
AS Kigali ntiyaherukaga muri iri rushanwa nyuma yo kugira ibihe bibi byatumaga itaboneka muri iyo myanya.
Kuri iyi nshuro, imikino ibanza ya Shampiyona yarangiye iri ku mwanya wa gatatu.
Mu mwaka ushize, Musanze FC ni yo yakinnye iri rushanwa riheruka kwegukanwa na Police FC.
14:05
APR FC irimo abakinnyi bashya na yo yageze i Nyamirambo
14:02
AS Kigali igera kuri Stade ya Kigali i Nyamirambo
Haruna Niyonzima uheruka gusubira muri AS Kigali ku nshuro ya gatatu, ni umwe mu bakinnyi bayo bitabajwe kuri uyu wa Kabiri, ku mukino iyi kipe igiye guhuramo na APR FC yakiniye.
13:48
Ikaze kuri Kigali Pele Stadium
IGIHE ibahaye ikaze kuri Kigali Pele Stadium ahagiye kubera imikino ya 1/2 cy'Igikombe cy'Intwari ibanzirizwa n'ugiye guhuza APR FC na AS Kigali guhera Saa Cyenda.
Undi mukino urahuza Rayon Sports na Police FC guhera Saa Kumi n'Ebyiri.
Iri rushanwa rigamije kwizihiza Umunsi w'Intwari z'Igihugu uteganyijwe tariki ya 1 Gashyantare 2025, ari na bwo hazakinwa umukino wa nyuma.