Rwanda vs Nigeria

Rwanda 0-2 Nigeria

Uko umukino uri kugenda

Umwanditsi

: Eric Tony Ukurikiyimfura & Jah D'eau Dukuze

Amafoto

: Kasiro Claude & Umwari Sandrine

20:10

Amavubi yatakaje umwanya wa mbere, afite akazi gakomeye ko kuwisubiza

Nyuma y'igihe kitari gito ayoboye Itsinda C, Amavubi kuri ubu ni aya gatatu n'amanota arindwi aho irushwa na Afurika y'Epfo ya mbere amanota atatu. Benin iza ku mwanya wa kabiri n'amanota umunani aho ibi bihugu byombi bizahura ku munsi ukurikira, ubwo u Rwanda ruzaba rwakiriye Lesotho kuri Stade Amahoro.

20:07

Reba ibihe by'ingenzi byaranze umukino w'u Rwanda na Nigeria

Victor Osimhen umaze iminsi witwara neza muri Galatasaray yongeye kwigaragaza kuri Stade Amahoro. Ibitego bye bibiri byabaye itandukaniro mu mukino wo kuri uyu wa Gatanu.

20:07

Perezida Kagame na Madamu Jeannette Kagame bari bitabiriye uyu mukino


Perezida Paul Kagame na Madamu Jeannette Kagame bitabiriye umukino u Rwanda rwahuyemo na Nigeria muri Stade Amahoro kuri uyu wa Gatanu.

20:02

Amavubi atsindiwe mu rugo na Nigeria

Ikipe y'Igihugu 'Amavubi itsinzwe na Super Eagles ya Nigeria ibitego 2-0 mu mukino w'Umunsi wa Gatanu wo mu Itsinda C ryo gushaka itike y'Igikombe cy'Isi cya 2026.

U Rwanda ruhise rujya ku mwanya wa gatatu n'amanota arindwi mu gihe Nigeria igize amanota atandatu ku mwanya wa kane.

Afurika y'Epfo yayoboye itsinda n'amanota 10 nyuma yo gutsinda Lesotho ibitego 2-0.

Amavubi azasubira mu kibuga ku wa Kabiri, tariki ya 25 Werurwe 2025, ahura na Lesotho hano muri Stade Amahoro.

19:59

Umukino urarangiye

19:57

90+2' Ikarita y'umuhondo

Arokodare Emmanuel ahawe ikarita y'umuhondo akiniye nabi Mutsinzi Ange.

19:55

90' Iminota itanu y'inyongera

Umusifuzi wa Kane, Kech Chaf Mustapha, yerekanye iminota itanu y'inyongera.

Amavubi ari gusatira ashaka kugabanya ikinyuranyo cy'ibitego yatsinzwe.

19:54

88' Ikarita y'umuhondo

Alex Iwobi ahawe ikarita y'umuhondo akiniye nabi Bizimana Djihad,

19:53

86' Amavubi yari afunguye amazamu, umusifuzi aritambika


Muhire Kevin ateye ishoti rifunzwe na Habimana Yves.

Rutahizamu w'Amavubi acenze umunyezamu Nwabali, ashyira umupira mu rubuga rw'amahina, ariko umusifuzi wo ku ruhande agaragaza ko habayeho kurarira.

19:51

85' Abafana bacitse intege

Abafana b'Amavubi ntibakiri gufana nk'uko byari bimeze mu mnota yatambutse.

Amavubi arahererekanya neza, ariko nyuma yo kurenga ikibuga cyayo agahita atakaza umupira.

19:46

80' Coup-franc y'Amavubi

Mugisha Gilbert akiniwe nabi mu ruhande rw'ibumoso, Muhire Kevin ahannye ikosa, umupira wo hasi ukuwaho na Troost-Ekong n'umutwe.

19:45

79' Gusimbuza

Nshuti Innocent na Kwizera Jojea basimbuwe na Habimana Yves na Ruboneka Bosco ku ruhande rw'Amavubi asoje gukora impinduka.

19:41

75' Gusimbuza

Victor Osimhen na Osayi Samuel basimbujwe Arokodare Emmanuel na Alhassan Yussuf ku ruhande rwa Nigeria.

19:37

72' Amavubi ari gukina neza ariko bidatanga umusaruro

Ikipe y'Igihugu 'Amavubi' yatangiye kwiharira umupira, ariko ikinira inyuma mu kibuga cyayo.

Abakinnyi ba Nigeria basatira bagabanyije imbaraga ndetse basa n'abatangiye gutekereza umukino wa Zimbabwe bazakurikizaho.

19:31

66' Nigeria yatuje


Nigeria irasa n'iyamaze kwizera intsinzi ndetse yagabanyije imbaraga.

Biragoye ko hari umukinnyi wa Nigeria ujya kurwanira umupira inshuro ebyiri.

Amavubi ari gukina neza muri iyi minota, ariko guhuza mu busatirizi byagoranye.

19:30

65' Gusimbuza

Onyeamechi Bruno na Raphael Onyedika basimbuye Ola Aina na Samuel Chukwueze ku ruhande rwa Nigeria.

19:21

57' Gusimbuza

Muhire Kevin asimbuye Hakim Sahabo ku ruhande rw'Amavubi akoze impinduka ya kabiri.

19:21

55' Ntwari atabaye Amavubi


Ademola Lookman ateye umupira uteretse, Ntwari Fiacre asohoka neza awukubita ibipfunsi.

19:19

Amavubi ari kubonana neza kurusha mu gice cya mbere

Nubwo ikipe ya Adel Amrouche ikiri inyuma ho ibitego 2-0, mu kibuga hagati iri kugerageza kubonana ngo irebe ko yagabanura ikinyuranyo cy'ibitego yatsinzwe.

19:19

55' Coup-franc ya Nigeria

Mugisha Bonheur akiniye nabi Samuel Chukwueze nyuma y'umupira wari utakajwe na Niyomugabo Claude wanze gukinana na Hakim Sahabo.

19:16

51' Gusatira kw'Amavubi

Mugisha Gilbert ashatse kwiharira, atera umupira ugaruwe n'ubwugarizi bwa Nigeria, usanga Niyomugabo Claude uwuhinduye mu rubuga rw'amahina, ushyirwa muri koruneri na Troost-Ekong.

Hakim Sahabo awusubije mu kibuga, Bizimana Djihad ntiyawugeraho.

19:14

50' Gusatira kwa Nigeria

Osayi Samuel ateye umupira ukomeye ari mu rubuga rw'amahina, ushyirwa muri koruneri na Ntwari Fiacre.

19:12

48' Ikarita y'umuhondo

Ola Aina ahawe ikarita y'umuhondo akiniye nabi Mugisha Gilbert.

19:11

47' Coup-franc ya Nigeria

Ademola Lookman ateye coup-franc ya Nigeria, umupira ukorwaho na Nshuti Innocent ujya muri koruneri.

19:10

46' Ikarita y'umuhondo

Kapiteni w'Amavubi, Bizimana Djihad, ahawe ikarita y'umuhondo akiniye nabi Victor Osimhen yari atwaye umupira hafi y'urubuga rw'amahina rw'u Rwanda.

19:09

46' Igice cya kabiri cyatangiye

19:08

Abakinnyi b'Amavubi batinze gusohoka mu rwambariro

Ikipe y'Igihugu ya Nigeria yamaze iminota itatu mu kibuga itegereje abakinnyi b'Amavubi batinze gusohoka, uretse Umunyezamu Ntwari Fiacre.

19:05

Riderman yasusurukije abitabiriye umukino

Umuraperi Gatsinzi Emery ukunzwe mu muziki Nyarwanda nka Riderman, yasusurukije abitabiriye umukino w'u Rwanda na Nigeria ubwo igice cya mbere cyari kirangiye.

Riderman yaririmbye nyinshi mu ndirimbo ze zakunzwe zirimo izakunzwe n'Abanyarwanda mu myaka ishize.

18:56

Amavubi yagowe no kwibona mu rugo


Ubwugarizi bw'Amavubi bwagowe no guhagarika abakinnyi ba Nigeria barimo Ademola Lookman.

Uburyo Umutoza Adel Amrouche yapanzemo ikipe, aho Nshuti Innocent yatangiye ari mu ruhande rw'iburyo, Jojea yasubiye inyuma, byagaragaje ubwoba mu mikinire.

Mu minota ya mbere, byasaga n'aho Hakim Sahabo ari we uri gusatira naho Samuel Gueulette agaca iburyo.

Habura iminota irindwi ni bwo Gueulette yasimbuwe na Mugisha Gilbert.

Muhire Kevin ashobora guhita asimbura igice cya kabiri kigitangira, agafata umwanya wa Sahabo cyangwa Jojea.

18:52

Igice cya mbere kirarangiye


Iminota 45 ibanza y'umukino w'Umunsi wa Gatanu wo mu Itsinda C ryo gushaka itike y'Igikombe cy'Isi cya 2026, irangiye Nigeria yatsinze Amavubi ibitego 2-0, byombi byinjijwe na Victor Osimhen.

18:50

45+2' Igitego cya kabiri cya Nigeria

Victor Osimhen atsinze igitego cya kabiri cya Nigeria ku mupira yinjiranye wenyine yasize abakinnyi b'Amavubi barimo Manzi Thierry, aroba umunyezamu Ntwari Fiacre wari wasohotse.

18:48

45' Iminota itatu y'inyongera

Umusifuzi wa Kane, Kech Chaf Mustapha, yerekanye iminota itatu y'inyongera.

Amavubi ari gukina ashaka kwishyura.

18:46

Perezida Kagame na Madamu Jeannette Kagame bitabiriye uyu mukino

Perezida Paul Kagame na Madamu Jeannette Kagame bageze muri Stade Amahoro aho Amavubi ari gukinira na Super Eagles ya Nigeria.

18:45

43' Gusatira kw'Amavubi

Niyomugabo Claude ahinduye umupira mu rubuga rw'amahina, Ola Aina awushyiraho umutwe ujya muri koruneri.

Abafana bose b'Amavubi bahagarutse.

18:43

40' Muhire Kevin ari kwishyushya

Umutoza w'Amavubi, Adel Amrouche, ntiyishimiye uko ikipe ye iri gukina.

Yahagurukije Muhire Kevin kugira ngo yishyushye.

18:41

38' Uburyo bwa mbere bw'Amavubi

Bizimana Djihad akinanye na Hakim Sahabo uhaye umupira Mugisha Gilbert, atera ishoti rifashwe na Nwabali.

18:40

37' Gusimbuza

Samuel Gueulette asimbuwe na Mugisha Gilbert ku ruhande rw'Amavubi.

18:38

35' Nigeria yasubiye hasi

Nyuma yo kubona igitego, Nigeri ntikiri gukina cyane nk'uko byari bimeze mu minota ya mbere.

Amavubi ari kunyuzamo akabona umupira, agahererenya inshuro ebyiri cyangwa eshatu.

18:35

33' Djihad yabababaye

Kapiteni w'Amavubi, Bizimana Djihad, yicaye hasi mu kibuga nyuma yo kugerageza gukina umupira mu kirere akawuhusha, akawutangwa n'umukinnyi wa Nigeria.

Hahamagajwe abaganga bo bamwiteho.

18:33

30' Abanyarwanda baranyotewe

Buri uko Amavubi ari gufata umupira asatiriye, abafana b'Amavubi bari guhaguruka bakayashyigikira ariko guhuza mu busatirizi bikagorana.

18:31

28' Amavubi ararokotse

Simon Moses ahinduye umupira mwiza mu rubuga rw'amahina, ukurwaho na Manzi Thierry washoboraga kwitsinda, awushyira muri koruneri.

18:27

Umukino uri gukinirwa muri Stade Amahoro yuzuye abafana

18:26

24' Ntwari atabaye Amavubi

Ntwari Fiacre akuyemo umupira ukomeye utewe na Moses Simon, awushyira muri koruneri.

Wari umupira mwiza utanzwe na Ademola Lookman mu rubuga rw'amahina.

18:25

22' Abafana b'Amavubi ntibishimiye imisifurire

Umunya-Maroc Jayed Jalal avuze ko umukinnyi wa Nigeria akiniwe nabi, avugirizwa induru n'abafana b'Amavubi ndetse n'abakinnyi bamwereka ko ikosa asifuye ritabaye.

18:22

20' Amavubi yatangiye gushyushya abasimbura

Habimana Yves na Mugisha Gilbert batangiye kwishyushya ku ruhande rw'Amavubi asa n'ayibuze kugeza ubu.

18:19

16' Hafashwe akanya ko gusoma ku mazi

Kubera ko hari abakinnyi bari mu gisibo cya Ramadhan, abasifuzi batanze akanya ko gusoma amazi mbere y'uko umukino ukomeza.

18:18

15' Coup-franc ya Nigeria

Samuel Gueulette akiniye nabi Ola Aina, ikosa rihanwe na Lookman, umupira usanga William Troost-Ekong, awukozeho ujya ku ruhande rw'izamu.

18:15

12' Mutsinzi yari yitsinze


Victor Osimhen ahinduye umupira mwiza mu rubuga rw'amahina ubwo yari asatiriwe na Manzi Thierry, uhura Mutsinzi Ange uwushyize muri koruneri ku buryo yashoboraga kwitsinda.

18:13

10' Igitego cya Nigeria

Mugisha Bonheur akiniye nabi Simon Moses inyuma y'urubuga rw'amahina, mu ruhande, nko muri metero 22 uvuye ku izamu.

Ikosa rihanwe na Ademola Lookman, Victor Osimhen wari winjiriye ku rundi ruhande ahita afungura amazamu n'ikirenge.

18:08

6' Nigeria iri kubanza kubakira inyuma

Abakinnyi ba Nigeria barimo Alex Iwobi basubiye inyuma kugira ngo bakurure ab'Amavubi.

Nigeria iri kubanza kubaka, igatera imipira miremire imbere ishaka abarimo Osimhen.

18:06

3' Coup-franc ya Nigeria

Nshuti Innocent akiniye nabi myugariro wa Nigeria wari usatiriye Amavubi.

Ikosa ryahanwe na Lookman, Bassey Calvin ananirwa gukina umupira mu rubuga rw'amahina urarenga.

18:03

1' Umukino wahagaze gato


Victor Osimhen asitaye kuri Bizimana Djihad ubwo yari akurikiye umupira, agwa hasi ndetse akomeza kuryama.

Umusifuzi yahise ahagarika umukino, uyu mukinnyi wa Galatasaray muri Turikiya abanza kwitabwaho n'abaganga mbere y'uko umukino ukomeza.

18:02

Umukino uratangiye


Umusifuzi w'Umunya-Maroc, Jayed Jalal, atangije umukino.

Umupira wa mbere watewe na Nshuti Innocent, akinana na bagenzi be barimo Mugisha Bonheur.

Amavubi yambaye umuhondo hejuru, amakabutura y'ubururu n'amasogisi y'icyatsi.

Nigeria yambaye umweru hoe, urimo uturongo tw'icyatsi mu mpande.

17:58

Haririmbwe indirimbo zubahiriza ibihugu byombi

Mbere y'uko umukino utangira, haririmbwe indirimbo zubahiriza ibihugu byombi haherewe kuri "Nigeria, We Hail Thee".

Hakurikiyeho Rwanda Nziza, ibihumbi by'Abanyarwanda bari muri Stade Amahoro bafatanya n'Amavubi kuririmba.

17:53

Umufana wa Arsenal, Dr. Kelechi Anyikude, uri mu baherekeje Nigeria yaganiriye na IGIHE

17:49

Nigeria yakoresheje ikipe isatira, Amavubi afungira hagati



Umutoza w'Amavubi, Adel Amrouche, yapanze ikipe yari isanzwe ikinishwa na Torsten, ariko we akuramo Mugisha Gilbert, yinjizamo Hakim Sahabo ukina mu kibuga hagati.

Ibyo bivuze ko Sahabo aza gufatanya na Mugisha Bonheur na Bizimana Djihad, naho Samuel Gueulette agakina anyura ku ruhande, urundi ruriho Kwizera Jojea mu gihe ubusatirizi buyobowe na Nshuti Innocent.

Ku ruhande rwa Nigeria, Eric Sekou Chelle yatoranyije abakinnyi 11 barimo ba rutahizamu beza bane ari bo Victor Osimhen, Samuel Chukwueze, Moses Simon na Ademola Lookman.

Mu kibuga hagati na ho yongeyemo amazina akomeye nka Alex Iwobi wajyaga abanza hanze.

Ni ubwa mbere Osimhen agiye gukinira Nigeria mu mikino yo gushaka itike y'Igikombe cy'Isi cya 2026. Ni we wari warabuze?

Ni byo tugiye kureba mu minota 90 iri imbere.

17:44

Amakipe yombi yasoje kwishyushya

Amavubi na Super Eagles zasubiye mu rwambariro kumva inama za nyuma z'abatoza. Ubwatsi bwa Stade Amahoro burimo kuhirwa mu gihe mu minota mike umukino uri buze kuba utangiye.

17:43

Eric Chelle agiye gutoza Nigeria bwa mbere


Uyu mukino ni wo wa mbere ku Munya-Mali Eric Sekou Chelle wahawe gutoza Super Eagles ya Nigeria muri Mutarama.

Chelle yatoje Mali mbere yo kujya muri MC Oran yo muri Algeria.

17:39

Amakipe yombi yishyushya

17:27

Ubwo Amavubi yinjiraga mu kibuga agiye kwishyushya

17:25

Adel Amrouche agiye gutoza u Rwanda umukino wa mbere


Umunya-Algeria Adel Amrouche agiye gutoza Amavubi umukino wa mbere nyuma yo gusimbura Umudage Frank Spittler Torsten.

Amrouche yatoje Tanzania mbere yo kubona akazi mu Rwanda.

17:20

Amakipe yombi ari kwishyushya

Ikipe y'Igihugu y'u Rwanda 'Amavubi' na Super Eagles ya Nigeria, zombi zamaze kugera mu kibuga aho zirishyushya.

Amavubi ari mu kibuga cyo mu ruhande rwo mu Migina mu gihe Nigeria iri mu kibuga cyo ku ruhande rw'i Kanomba cyangwa kuri Zigama.

17:14

Uko Nigeria yitwaye mu mikino itanu iheruka gukina

17:11

Stade Amahoro yuzuye 100%

Mu gihe habura iminota 50 ngo umukino utangire, abafana bamaze kuzura Stade Amahoro ifite ubushobozi bwo kwakira abantu ibihumbi 45 bicaye neza.

Imyanya mike ikigaragara ni itageze kuri 50 yabitswe n'indi iri inyuma y'agace gato cyane kicawemo n'Abanya-Nigeria.

Ibyo ntibikuraho ko hari aho abafana bahagaze mu gice cyo hejuru.

17:11

Super Eagles na yo irashyigikiwe

Nubwo ari agatonyanga mu nyanja, muri Stade Amahoro hari kugaragaramo abafana bake bambaye ibirango bya Super Eagles.Aba benshi bakaba basanzwe babarizwa mu gihugu cy'u Rwanda aho bakora imiromo itandukanye.

17:06

Uko Amavubi yitwaye mu mikino itanu aheruka gukina

17:04

Abanya-Maroc ni bo basifura umukino

Abasifuzi bakomoka muri Maroc barangajwe imbere na Jayed Jalal ni bo basifura uyu mukino.

Jayed Jalal uba uri mu kibuga hagati, arungirizwa na Mostafa Akarkad na Hamza Nassiri basifura ku ruhande, bombi bari i Kigali ku mukino u Rwanda rwanganyijemo na Nigeria 0-0 mu mwaka ushize.

Kech Chaf Mustapha ni umusifuzi wa kane nk’uko byari bimeze muri Nigeria ubwo u Rwanda rwahakuraga intsinzi y’ibitego 2-1. Uyu yanasifuriye APR FC mu mukino yasezereyemo AZAM FC muri CAF Champions League.

17:01

AMASHUSHO: Reba uko Amavubi yageze kuri Stade Amahoro

17:00

Abakinnyi ba Nigeria babanje mu kibuga

Umutoza wa Super Eagles ya Nigeria, Eric Chelle, yahisemo gukinisha:

Nwabali Stanley Bobo
Aina Temitayo
Wilfried Ndidi
Paul William Ekong (C)
Ademola Lookman
Victor Osimhen
Samuel Chukwueze
Samuel Bright Osayi
Moses Simon
Alex Iwobi
Bassey Calvin

16:57

Abakinnyi 11 b'Amavubi babanje mu kibuga


Umutoza w'Amavubi, Adel Amrouche, yahisemo gukoresha:

Ntwari Fiacre
Omborenga Fitina
Niyomugabo Claude
Manzi Thierry
Mutsinzi Ange
Mugisha Bonheur
Bizimana Djihad (C)
Hakim Sahabo
Samuel Gueulette Marie Leopold
Kwizera Jojea
Nshuti Innocent.

16:53

AMASHUSHO: Icyizere ni cyose ku bafana b'Amavubi

16:52

Ikipe y'Igihugu ya Nigeria yamaze kugera ku kibuga

16:44

Ubwo Amavubi yageraga kuri Stade Amahoro

16:25

Icyizere ni cyose ku bafana b'Amavubi

16:22

Amavubi yazamuye amarangamutima y'Abanyarwanda i Remera

Abafana benshi b'Amavubi bari muri Stade Amahoro bagaragaje akanyamuneza nyuma yo kubona Ikipe y'Igihugu yinjiye mu kibuga cya Stade Amahoro, aho yabanje kugisura ikigera i Remera.

16:14

Nigeria ntihirwa iyo yakiniye hanze

Umukino umwe gusa wa Libya, ni wo Nigeria yatsindiye hanze kandi na bwo kuri mpaga, mu mikino itanu iheruka.

16:08

Stade Amahoro ishobora kuba nto


Kuri uyu wa Gatanu, Stade Amahoro ifite ubushobozi bwo kwakira abantu ibihumbi 45 bicaye neza, ishobora kuzura bamwe bakabura aho bicara.

Amasaha abiri mbere y'umukino, igice cyo hejuru cyamaze kuzura ubwo hari ahagri imyanya mike hagati y'abantu.

Igice cyo hasi na cyo kigeze kuri 60%.

16:05

DJ Toxxyk yahigereye

DJ Toxxyk ni we uri kuvanga imiziki muri Stade Amahoro nyuma yo gukorera mu ngata DJ Sonia.

Kuri uyu mugoroba, abitabira umukino ntibicwa n'irungu kuko basusurutswa n'abarimo umuhanzi Riderman.

15:59

Aba-hooligans b'Amavubi bahagaze

Abafana bakomeye b'Ikipe y'Igihugu, bamwe bisiga amarangi, bamaze kugera muri Stade Amahoro ndetse bashyizeho morale.

15:45

Amavubi akunze kwihagararaho mu rugo

Mu mikino itanu iheruka, Ikipe y'Igihugu 'Amavubi' yatsinzwe inshuro imwe aho yatunguwe na Libya mu gushaka itike y'Igikombe cya Afurika.

Muri iyo mikino harimo uwo yanganyijemo na Nigeria ubusa ku busa.

15:34

Abarimo Minisitiri Utumatwishima bari mu bashyuhije uyu mukino

Umukino w'u Rwanda na Nigeria wavuzwe cyane ku mbuga nkoranyambaga. Minisitiri w'Urubyiruko n'iterambere ry'ubuhanzi ntabwo abyumva kimwe na Nzovu uzwi cyane mu bijyanye no gusetsa.





15:34

Akanyamuneza ni kose muri Stade Amahoro

Abafana benshi bageze muri Stade Amahoro bari gucinya akadiho mu gihe habura amasaha abiri n'igice ngo umukino utangire.

Igice cyo hejuru cyuzuye ku rwego rwa 90%. Ni mu gihe abicaye mu gice cyo hasi bangana na 40%.

15:20

Impamvu umukino w'u Rwanda na Nigeria ari ishiraniro


Gutsinda uyu mukino birafasha u Rwanda gusubirana umwanya wa mbere mu Itsinda C, aho Benin yawugiyeho ku wa Kane nyuma yo kunganya na Zimbabwe ibitego 2-2.

Umukino uheruka guhuza ibihugu byombi mu Ugushyingo, hashakwa itike y'Igikombe cya Afurika, u Rwanda rwatsindiye Nigeria iwayo ibitego 2-1 mu gihe i Kigali, muri Nzeri, ibihugu byombi byari byanganyije ubusa ku busa.

Hejuru y'ibyo, Nigeria ifite amanota atatu gusa mu mikino ine imaze gukina muri uru rugendo rwo gushaka itike y'Igikombe cy'Isi cya 2026, nyamara ari igihugu gihora ku gitutu cyo gukina iryo rushanwa kitagiyemo mu 2022.

15:13

DJ Sonia ari gususurutse abageze muri Stade Amahoro

Kayitesi Sonia wamamaye nka DJ Sonia ari gususurutsa abafana bamaze kugera muri Stade Amahoro, binyuze mu ndirimbo zitandukanye.

Kugeza ubu, igice cyo hejuru cya Stade Amahoro kiri hafi kuzura.

14:55

Abanya-Kigali bafashijwe kugera kuri Stade Amahoro

Mu rwego rwo korohereza abatuye Umujyi wa Kigali kuza gushyigikira Ikipe y’Igihugu ‘Amavubi’ imbere ya Nigeria, hari abafatanyabikorwa baguze amatike ndetse hari n’imodoka zateganyijwe ngo zifashe abaturage kugera kuri Stade Amahoro.

14:46

Umukino w'u Rwanda na Nigeria ni imbonekarimwe


U Rwanda ruri ku mwanya wa 129 ku Isi mu gihe Nigeria ari iya 44.

Kuba iki gihugu cyo mu Burengerazuba bwa Afurika, kimaze kwegukana Igikombe cya Afurika inshuro eshatu, kiri kuri uwo mwanya, bituma ari gake gihura n'Amavubi y'u Rwanda mu marushanwa atandukanye.

Kuva mu 2004, ibihugu byombi bimaze guhura inshuro zirindwi gusa mu marushanwa atandukanye arimo na CHAN.

U Rwanda rwabonye intsinzi imwe, mu mukino uheruka guhuza ibihugu byombi mu Ugushyingo 2024 muri Uyo.

Nigeria yatsinze u Rwanda inshuro ebyiri harimo umukino wa mbere wahuje ibihugu byombi mu 2004, ku bitego 2-0.

14:37

Abanyarwanda bitabiriye umukino ni benshi

Kuva saa Sita z'amanywa, abakunzi b'umupira w'amaguru bakomeje kwerekeza kuri Stade Amahoro aho u Rwanda rukinira na Nigeria.

Ni umukino bari banyotewe nyuma y'amezi atatu Ikipe y'Igihugu idakina.

13:40

Ikaze muri Stade Amahoro

IGIHE ibahaye ikaze muri Stade Amahoro i Remera, ahagiye kubera umukino w'Umunsi wa Gatanu wo mu Itsinda C ryo gushaka itike y'Igikombe cy'Isi cya 2026, hagati y'Amavubi y'u Rwanda na Super Eagles ya Nigeria.

U Rwanda ni urwa kabiri mu Itsinda C n'amanota arindwi, rurushwa inota rimwe na Benin ya mbere mu gihe Nigeria inganya amanota atatu na Zimbabwe ya nyuma.

Umukino uratangira saa Kumi n'Ebyiri z'umugoroba.