Rayon Sports vs Mukura Victory Sports

Rayon Sports 0-1 Mukura Victory Sports

Uko umukino uri kugenda

Umwanditsi

: Jah d'eau DUKUZE

Amafoto

: Umwari Sandrine

20:41

Rayon Sports yongeye gutakaza amanota

Ikipe ya Rayon Sports itsinzwe umukino wa kabiri na Mukura VS nyuma yo gutsindirwa i Huye ibitego 2-1. Ibi bikaba bivuze ko ikomeje kurusha APR FC amanota ane ariko iyi kipe y'ingabo z'igihugu ifite umukino na Vision FC bazakina ku Cyumweru.

APR FC iramutse itsinze uyu mukino hasigaramo amanota abiri y'ikinyuranyo.

Umukino w'uyu munsi, ikipe ya Rayon Sports yakinnye neza igice cya mbere ariko icya kabiri kiharirwa na Mukura VS yanabonyemo igitego.

20:35

Umukino urarangiye

Mukura VS itsinze Rayon Sports igitego 1-0 ishimangira intsinzi yabonye ku mukino ubanza.

Rayon Sports igumanye umwanya wa mbere n'amanota 46 mu gihe Mukura VS yafashe umwanya wa gatanu n'amanota 33.

20:34

90+7 Gusimbuza ku ruhande rwa Mukura VS

Jordan Dimbumba ahaye umwanya Eric

20:33

90+5' Rayon Sports iracyashakisha

Muhire Kevin afashe icyemezo ubwo yazamukanaga umupira, yagera hafi y'urubuga rw'amahina agaterera kure, ariko umupira ukajya hanze cyane.

20:31

90+4 Abafana batangiye kuva muri Stade

Nubwo hakiri iminota mike, abakunzi ba Rayon Sports batangiye kuva muri Stade aho benshi mu bari baje kureba uyu mukino bigendeye.

20:29

90+3 Gusimbuza ku ruhande rwa rayon Sports

Ndayishimiye Richard asimbuwe na Elanga Jr

20:27

90' Iminota 7 y'inyongera

20:27

89' Ikarita y'umuhondo

Obedi Uwumukiza wa Mukura VS ahawe ikarita ku ikosa akoreye Aziz Bassane

20:26

87' Gusimbuza ku ruhande rwa Mukura VS

Malanda ahaye umwanya Cyubahiro

20:26

87' Gusimbuza ku ruhande rwa Mukura VS

Malanda ahaye umwanya Cyubahiro

20:25

87' Gusimbuza ku ruhande rwa Mukura VS

Malanda ahaye umwanya Cyubahiro

20:21

85' Umukino ubaye uhagaze gato

Hari umukinnyi wa Mukura VS uri kwitabwaho nyuma y' ikosa akorewe na Muhire Kevin

20:19

82' Rayon Sports ikomeje gushaka igitego cyo kwishyura

Aziz Bassane azamukanye umupira awugejeje mu rubuga rw'amahina atera mu izamu Obedi ashyira umupira muri Corner.

Iyi itewe neza na Muhire Kevin, Nsabimana Aimable ashyira ku mutwe ariko umupira ujya hanze.

20:17

81' Gusimbuza ku ruhande rwa Rayon Sports

Iraguha Hadji asimbuwe na Adama Bagayogo.

20:16

79' Rayon Sports ikomeje gushakisha

Ndayishimiye Richard abonye umupira inyuma y'urubuga rw'amahina ashatse gushota mu izamu ubwugarizi bwa Mukura buritambika barenza umupira. Corner itewe neza na Kavin ariko Malanda ashyiraho umutwe akiza izamu.

20:13

77' Corner ya Rayon Sports

Muhire Kevin apfushije amahirwe ubusa atera Corner nabi ijya hanze.

20:11

75' Igitego cya Mukura VS

Abdul Jalilu atsindiye Mukura VS igitego cya mbere. Ni umupira atereye inyuma y'urubuga rw'amahina maze Khadime Ndiaye wari wasohotse ntiyagira icyo akora.

20:08

70' Umukino uri kugana mu minota 20 ya nyuma yawo

Amakipe ya Rayon Sports na Mukura VS aracyanganya 0-0. Mu gice cya kabiri biragaragara ko buri kipe ishobora kubona igitego isaha iyo ari yo yose aho itanga indi iri buze kwegukana intsinzi ya none.

20:06

70' Rayon Sports yongeye guhusha

Coup Franc ya Muhire Kevin isanze Fitina Omborenga ahagaze wenyine ariko ateye n'umutwe umupira ujya hanze.

20:03

66' Mukura VS ihushije icyabazwe

Ikipe y'i Huye yazanye amashagaga mu gice cya kabiri yari ibonye igitego.

Nyuma yo kuguma iruhande rw'izamu rya Rayon Sports, Mensah yungukiye ku mupira yari ahawe na Diagne ariko ateye mu izamu ntiyashobora kubona inshundura ahubwo aramurura.

19:59

62' Coup Franc ya Mukura VS

Diagne akoreye ikosa Mensah hafi y'urubuga rw'amahina.

Coup Franc nziza Khadime Ndiaye ayikuyemo atabara Rayon Sports.

19:57

60' Gusimbuza ku ruhande rwa Rayon Sports

Aziz Bassane na Kanamugire Roger basimbuye Rukundo Abdulrahim na Daffe

19:55

58' Ikarita y'umuhondo

Rushema Chris wa Mukura ahawe ikarita ku ikosa akoreye Muhire Kevin.

19:55

57' Jordan Dimboumba ahaye abafana ibirori

Uyu musore wa Mukura VS acenze abakinnyi batanu ba Rayon Sports agera hafi y'urubuga rw'amahina aterekeye umupira Rushema Chris ntiyashobora kuwubyaza umusaruro awutera hanze.

19:54

56' Mukura VS iremye uburyo bwo gutsinda

Ndimboumba ahaye umupira mwiza Hakizimana Zuberi, uwugejeje mu rubuga rw'amahina ariko ateye mu izamu uca ku ruhande gato.

19:51

54' Biramahire Abeddy akomeje gushaka igitego

Rutahizamu wa Rayon Sports wigeze gukinira Mukura VS ni we uri kwigaragaza ku Amahoro. Aha, ahawe umupira na Muhire Kevin, aterera ishoti inyuma y'urubuga rw'amahina, Sebwato arawufata arawuruka ariko arongera arawufata neza.

19:49

Amashusho: Reba igitego cyemejwe kikaza kwangwa n'abasifuzi

19:49

51' Mukura VS izanye amashagaga mu gice cya kabiri

Ugereranyije n'igice cya mbere, Mukura VS iri kugerageza guhanahana bitandukanye n'uko yabikoraga mu gice cya mbere. Kugeza ubu ariko nta buryo bukomeye yari yarema ku izamu ririnzwe na Khadime.

19:47

50' Coup Franc ya Rayon Sports

Muhire Kevin akorewe ikosa hafi n'urubuga rw'amahina. Kapiteni wa Rayon Sports arekeye Omborenga Coup Franc, ariko Sebwato afata umupira neza.

19:45

Reba uko abakunzi ba Rayon Sports bishimiye Fall Ngagne mbere y'umukino

19:42

46' Ikarita y'umuhondo

Jordan Dimboumba ahawe ikarita y'umuhondo kuko yari yanze kuza mu kibuga. Ari kubaza Cucuri impamvu atayihaye Omborenga na Aimable

19:41

Igice cya kabiri kiratangiye

19:41

Amarozi? Umukino wari wanze gutangira kubera abakinnyi banze kugaruka mu kibuga...

Jordan Dimboumba wa Mukura yari yanze kugarukana na bagenzi mu gihe ari na ko byagenze kuri Nsabimana Aimable na Fitina Omborenga ba Rayon Sports. Umusifuzi wa kane ahamagaye Cucuri ngo abazane ku ngufu birangiye aba Rayon bagarutse umukino uratangira.

19:24

Igice cya mbere kirarangiye

Rayon Sports na Mukura VS bagiye kuruhuka banganya 0-0.

Ni umukino muri rusange wihariwe na Rayon Sports aho mu Mukura VS nta mahirwe menshi yaremye.

Agashya k'umukino kabaye ku munota wa 33 ubwo Biramahire Abeddy yatsindaga igitego ndetse kikishimirwa na bagenzi be aho abasifuzi bombi bari bakemeje.

Aba ariko nyuma yo kongera kuvugana bemeje ko hari habayemo amakosa kuko Abeddy yagitsinze yarariye mu gihe yanahawe umupira hakoreshejwe akaboko.

19:23

45+3 Rayon Sports ikomeje gusatira

Ikipe ya Murera iri gushaka kujya mu karuhuko ifite igitego kimwe. Aha, Biramahire Abeddy atereye umupira mu mfuruka igoye, ukubita umutambiko w'izamu uragaruka.

19:22

45+1 Sebwato atabaye Mukura

Iraguha Hadji ateye ishoti rikomeye mu izamu rya Mukura ariko kapiteni Sebwato araryama ashyira umupira muri Corner. Iyi na yo itewe neza gusa ubwugarizi bwa Mukura bushobora gukiza izamu.

19:21

45' Iminota itatu y'inyongera

19:21

45' Rayon Sports ibonye Coup Franz nziza...

Muhire Kevin ahannye ikosa ryari rikorewe Iraguha Hadji, gusa umupira ateye ukizwa neza n'ubwugarizi bwa Mukura. Nsabimana Aimable ashatse gusubizamo ariko biba iby'ubusa Sebwato awufata neza.

19:15

36' Rayon Sports yariye karungu

Ikipe iyobowe na Muhire Kevin nyuma yo kwangirwa igitego iri gusatira cyane. Nka hano uyu kapiteni wa Rayon Sports habuze gato ngo atsindishe n'umutwe ku mupira wari utewe na Bugingo Hakim.

19:14

35' Umukino wabaye uhagaze gato...

Mensah wa Mukura VS ari kwitabwaho n'abaganga.

19:10

33' Rayon Sports ibonye igitego...

... gusa kiranzwe! Biramahire Abeddy yari atsindiye Rayon Sports igitego nubwo yagaragaraga ko yaraririye mu gihe uwari umuhaye umupira yabanje kuwukora n'akaboko. Nyuma y'ibiganiro hagati y'umusifuzi Cucuri n'umwungirije bahisemo kwanga iki gitego kandi bari babanje kucyemera.

19:04

30' Coup Franc ya Rayon Sports

Muhire Kevin akorewe ikosa muri metero nka zirindwi uvuye ku rubuga rw'amahina. Iyi kipe ya Robertinho ibonye Coup Franc nziza.

Rukundo Abdurahim ahannye ikosa ariko umupira ateye uca kure y'izamu rya Sebwato.

19:03

28' Coup Franc ya Mukura VS

Exauce Malanda yari azamukanye umupira mu kibuga hagati ariko aza gushyirwa hasi na Daffe. Coup Franc ivuyemo ikinwe nabi Rayon Sports isubirana umupira.

19:01

26' Khadime Ndiaye yari akoze ibara...

Umunyezamu wa Rayon Sports yari akinnye nabi umupira ahawe na Aimable, ku bw'amahirwe make rutahizamu Mensah ntiyawugeraho urarenga.

19:00

Stade Amahoro yagoye abakinnyi ba Mukura VS

Kugeza kuri uyu munota biragaragara ko ikipe ya Mukura VS yagowe cyane na Stade Amahoro. Iyi uretse kuba itari gushobora gukina umupira isanzwe ikina, abakinnyi bayo bari kunyerera hafi kuri buri mupira bafashe bivuze ko inkweto zabo bishoboka ko zitaremewe kino kibuga.

18:58

23' Rayon Sports ipfushije amahirwe ubusa

Muhire Kevin yiboneye impano nyuma yaho myugariro Rushema Chris anyereye, gusa Kapiteni wa Rayon Sports ateye mu izamu uca ku ruhande gato.

18:56

21' Rayon Sports yongeye kurema amahirwe yo gutsinda

Muhire Kevin aterekeye umupira Fitina Omborenga, uwushyize mu rubuga rw'amahina Rushema Chris ashaka gukiza izamu ahubwo awushyira mu izamu, gusa Sebwato aratabara arawufata.

18:51

16' Rayon Sports ihushije uburyo bw'igitego

Corner ya Rayon Sports ihanahanywe neza hagati ya Muhire na Rukundo, uyu murundi ashyira umupira mu rubuga rw'amahina usanga Nsabimana Aimable ushyize ku mutwe uca ku ruhande gato.

18:50

15' Khadime Ndiaye afashe umupira wa mbere atangiza ubusatirizi bwa Rayon Sports

Coup Franc ya Abdul Jalilu iruhukiye mu maboko ya Khadime Ndiaye. Uyu ahise atera umupira imbere ashaka Biramahire Abeddy birangira uvuyemo Corner y'iyi kipe.

18:49

14' Coup Franc ya Mukura VS

Bugingo Hakim akoreye ikosa Mensah. Mukura VS ibonye Coup Franc nziza.

18:47

12' Dimboumba yari atunguranye

Uyu musore wo hagati wa Mukura VS yungukiye mu mupira utakajwe na Richard mu kibuga hagati, ashaka kuroba Khadime ariko umupira ujya hanze.

18:44

09' Rutahizamu Abeddy yari atunguye ikipe yahozemo

Biramahire Abeddy ni we uteye bwa mbere mu izamu ku mukino wa none, ubwo yarekuraga ishoti rikomeye ku mupira yari ahawe na Muhire Kevin, ariko Sebwato Nicholas akaawukuramo neza.

18:42

Abafana ku mpande zombi bari gutiza umurindi amakipe yabo

Nubwo kugeza ubu ta kipe yari yagaragaza itandukaniro, muri Stade Amahoro ho abafana ntabwo bicaye ubusa barimo guherekeza buri busatirizi bukozwe n'aikipe yabo.

18:40

05' Corner ya Mukura

Umupira umaze umwanya ucaracara imbere y'izamu rya Rayon Sports birangoira ubyaye corner. Iyi itewe neza na Obedi Uwumukiza ariko Aimable ahita akiza izamu.

18:39

04' Umukino nturabona injyana

Amakipe yombi ari gushaka gukina umupira wihuse ugana ku izamua ariko nta n'imwe irashobora kurema uburyo bufatika.

18:36

02' Corner ya Rayon Sports

Gusatira kwa mbere kwa Rayon Sports kuvuyemo Corner itewe na Muhire Kevin. Rukundo ashyize umupira mu rubuga rw'amahina ariko Aimable awuteye n'akaguru ujya hanze kure.

18:35

01' Coup Franc ya Mukura

Mensaha Boateng akorewe ikosa na Diagne. Coup Franc ivuyemo itewe nabi umupira urarenga.

18:33

Umukino uratangiye

Mukura VS no yo itangije umukino

18:31

Habanje gufatwa umunota wo kwibuka

Amakipe yombi agiye mu kibuga hagati aho abakinnyoi bivanze kugira ngo hibukwe Jean Lambert Gatare.

Icyegeranyo kijyanye n'ubuzima bwe kimaze kwerekwa abari kuri Stade Amahoro.

18:30

Umukino ugiye gutangira

Amakipe yombi yasoje kwifotoza no gusuhuzanya. Mukanya gato umukino ugiye gutangira.

18:15

Hari buze gufatwa umwanya wo kugaruka ku buzima bwa Jean Lambert Gatare

Uwari umukunzi wa Rayon Sports wagiye anaba muri Komite zitandukanye z'iyi kipe, ari buze kwibuka kuri uyu mukino.

Jean Lambert Gatare wabaye umunyamakuru ukomeye mu Rwanda, yitabye Imana tariki 22 Werurwe ashyingurwa ku wa Gatanu, aho iyi kipe iri buze kumwibuka hanyuzwaho ibyaranze ubuzima bwe.

18:10

Fall Ngagne ari gusuhuza abafana

Rutahizamu wa Rayon Sports Fall Ngagne arimo kuzenguruka muri Stade asuhuza abakunzi ba Gikundiro bamukumbuye. Uyu musore ukomoka muri Sénégal amaze iminsi yaravunitse ndetse ntazongera gukina muri uyu mwaka w'imikino.

18:08

Wasiri na Faustinho bakomeje gushyushya abafana bari i Remera

Abashyushyarugamba b'uyu munsi, Faustinho na Wasiri basanzwe bamenyerewe muri iyi kipe bari gukora ibishoboka ngo abafana baje muri Stade Amahoro ntibaze kwicwa n'irungu. Kugeza ubu abafana bari mu kirere.

18:00

Abafana baracyari bake muri Stade Amahoro

Mu gihe habura iminota 30 ngo umukino utangire, Stade Amahoro ntabwo yari yerekana ko iri buze kuzura cyangwa se ikaba yakwenda kuzura. Abafana baracyari bake ugereranyije n'abitezwe kuri uyu mukino.

Amakuru IGIHE ifite ni uko amatike amaze kugurishwa ari hafi y'ibihumbi 19 inshuro zirenga ebyiri z'abafana basanzwe buzura muri Kigali Pele Stadium i Nyamirambo.

17:48

Amakipe yombi yatangiye kwishyushya

Amakipe ya Rayon Sports yambaye uburru n'umweru na Mukura VS yambaye umuhondo yatangiye kwishyushya mrui Stade Amahoro.

Rayon Sports ni inshuro ya kane igiye gukinira kuri iki kibuga nyuma yo kuvugururwa mu gihe MUKURA VS igiye kugikiniraho bwa mbere.

17:27

Rayon Sports na yo yahageze

Ikipe iyoboye urutonde rwa Shampiyona na yo yageze kuri Stade Amahoro aho igiye kwakirira Mukura VS muri Derby y'Amateka.

17:24

Mukura VS yamaze gusesekara ku kibuga

Ikipe ya Mukura VS yamaze kugera kuri Stade Amahoro aho ije gukina na Rayon Sports mu kanya saa Kumi n'ebyiri n'igice. Dore uko yasesekaye kuri iki kibuga.

17:21

Abakunzi ba Rayon Sports batangiye kugera muri Stade Amahoro

Nubwo iyi stade ishobora kutuzura uyu munsi, ariko ku kibuga hari abakunzi benshi b'iyi kipe bamaze kugera mu Amahoro. Kugeza mu ma saa Sita, Rayon Sports yavugaga ko imaze kugurisha hafi 50% by'abafana 45 000 bajya muri iki kibuga.

13:45

Cucuri ni we ugiye gukiza abaturanyi muri Derby y'amateka

Nyuma yo gupangwa ku mukino ubanza akabura ku munota wa nyuma, Ishimwe Jean Claude bakunda kwita Cucuri ni we uri bube ari mu kibuga hagati kuri uyu mukino.

Ari buze kuba yungirijwe na Habumugisha Emmanuel na Akimana Juliette.

Nzeyimana Ish'aq ni we musifuzi wa kane na ho Munyanziza Gervais akaba Komiseri w'umukino

13:38

Abakinnyi XI Mukura VS yabanje mu kibuga

45. Sebwato Nicholas
15. Ishimwe Abdoul
5. Rushema Chris
21. Abdul Jalilu
11. Hakizimana Zuberi
3. Obedi Uwumukiza
23. Exauce Malanda
80. Jordan Dimbumba
20. Mensah Boateng
27. Oladoseu Samson
17. Ntarindwa Aimable

13:37

XI Rayon Sports yabanje mu kibuga

42.Khadime Ndiaye
26. Youssu Diagne
4. Nsabimana Aimable
2. Omborenga Fitina
24. Bugingo Hackim
23 Daffe
99 Iraguha Hadji
6.Ndayishimiye Richard
11.Muhire Kevin (C)
17. Rukundo Abdulrahim
16. Biramahire Abeddy

13:20

Mukura ikunze kugorwa n'umukino wa Rayon Sports muri Shampiyona

Intsinzi iheruka ya Mukura VS ni yo yonyine iyi kipe y'i Huye yakuye kuri Rayon Sports mu mikino itanu amakipe yombi aheruka guhuriramo muri Shampiyona.

13:14

Amakipe yombi yabonye amanota icyenda mu mikino itanu iheruka

Ikipe ya Robertinho yasaruye amanota icyenda mu mikino itanu iheruka gukina muri Shampiyona aho yatsinzemo ibiri ikanganyamo itatu. Mukura VS na yo ni uko dore ko yatsinze itatu itsindwa ibiri yakiniye i Rubavu n'amakipe yaho.

13:08

Twongeye kwishimira kuguha ikaze kuri Stade Amahoro

Nyuma y'imikino ibiri y'ikipe y'igihugu Amavubi itaranyuze abakunzi ba ruhago, twagarutse kuri Stade Amahoro mu mukino w'umunsi wa 22 wa Shampiyona ugiye guhuza amakipe abiri akomoka mu ntara y'Amajyepfo.

Ni Derby yiswe iy'Amateka, "Historical Derby" aho aya ari amwe mu makipe amaze imyaka myinshi mu Rwanda.

Ni Umukino wa kane muri itandatu aya makipe yombi azahuriramo muri uyu mwaka wa Shampiyona, aho Rayon Sports yatsinze ibiri ya gicuti bahuriyemo, mu gihe Mukura yari yatsinze uwo baheruka gukina muri Shampiyona. Aya makipe yombi azongera guhura mu mikino ibiri ya 1/2 cy'igikombe cy'Amahoro mu kwezi gutaha.

Rayon Sports iyoboye shampiyona n'amanota 46 mu gihe Mukura VS iza ku mwanya wa gatandatu n'amanota 30.

Umukino uri butangire saa Kumi n'ebyiri n'igice.

Nge ndi Jah d'eau Dukuze ngiye gufatanya na Kwizera Hervé na Sandrine Umwari.