Rayon Sports vs APR FC

Rayon Sports 1-1 APR FC

Uko umukino uri kugenda

Umwanditsi

: Eric Tony Ukurikiyimfura & Iradukunda Olivier

Amafoto

: Umwari Sandrine

20:36

AMASHUSHO: Mu burakari bwinshi Aba-Rayons babyegetse kuri Cucuri || APR barakubita agatoki ku kandi II Ganijuru

20:35

AMASHUSHO: Reba penaliti yahawe APR ikishyura Rayon Sports II Asman na Ouattara bigaragaje II Wasiri n'abafana

20:07

Rayon Sports yujuje imyaka itatu y'imikino idatsinda APR FC

Kunganya kwa Rayon Sports na APR FC kuri uyu wa Gatandatu bivuze ko Gikundiro yujuje imyaka itatu y'imikino idatsinda mukeba APR FC.

Rayon Sports yujuje kandi imikino irindwi idatsindira APR FC muri Stade Amahoro ivuguruye.

Iyi kipe yambara ubururu n'umweru iheruka gutsinda APR FC ku mukino wa Super Coupe wabereye i Nyamirambo muri Kanama 2023, ukarangira ari ibitego 3-0.

Ni mu gihe iheruka gutsindira muri Stade Amahoro muri Mata 2019.

19:58

Umukino urarangiye

Rayon Sports inganyije na APR FC igitego 1-1 mu mukino w'Umunsi wa 29 wa Shampiyona waberaga muri Stade Amahoro.

Gikundiro igize amanota 48 ku mwanya wa kane, irushwa amanota umunani na APR FC ya kabiri

Umukinnyi w'umukino yabaye Cheikh Djibril Ouattara wa APR FC.

19:52

90' Iminota itanu y'inyongera

Umukino winjiye mu minota itanu y'inyongera.

Amakipe yombi ari gushaka igitego cy'intsinzi.

19:51

89' Rayon Sports yirangayeho

Habimana Yves akinanye na Mugisha Didier winjiye mu rubuga rw'amahina, atera ishoti hejuru y'izamu.

19:50

88' APR FC ihushije uburyo bwiza

Ouattara ahinduye umupira mwiza mu rubuga rw'amahina, usanga Mamadou Sy ushatse kuwutera mu izamu ahindukiye vuba, awushyira ku ruhande.

19:49

87' Amafoto: Abafana bategereje igitego cy'intsinzi ariko cyabuze

19:47

85' Gusimbuza

William Togui asimbuwe na Mamadou Sy ku ruhande rwa APR FC.

19:46

84' Ikarita y'umuhondo

Umutoza wa Rayon Sports, Haringingo Francis, ahawe ikarita y'umuhondo kubera kutishimira imisifurire.

19:42

80' Uburyo bwiza bwa Rayon Sports

Ndayishimiye Richard ahannye ikosa ryakozwe na Niyomugabo, umupira usanga Tshimanga uwukinnye n'umutwe, ujya ku ruhande rw'izamu.

19:39

78' Ikarita y'umuhondo

Niyomugabo Claude ahawe ikarita y'umuhondo akiniye nabi Aziz Bassane ahagana muri koruneri.

19:36

74' Ikarita y'umuhondo

Byiringiro Jean Gilbert ahawe ikarita y'umuhondo akiniye nabi Habimana Yves.

19:35

73' Gusimbuza

Faustin Likau na Ndikumana Asman bahaye umwanya Habimana Yves na Mugisha Didier ku ruhande rwa Rayon Sports.

19:33

70' Umukino winjiye mu minota 20 ya nyuma

Icyizere ni gike ku bafana b'impande zombi.

19:33

69' Ikarita y'umuhondo

Ruboneka Bosco ahawe ikarita y'umuhondo akiniye Aziz Bassane.

19:32

68' Ikarita y'umuhondo

Aziz Bassane ahawe ikarita y'umuhondo akiniye nabi Ruboneka Bosco.

19:29

67' Coup-franc ya Rayon Sports

Dauda Yussif akiniye nabi Aziz Bassane.

Ikosa rihanwe na Obed, Rayon Sports aba ari yo ikiza izamu rya APR FC.

19:26

65' Umukino wahagaze gato

Umunyezamu wa APR FC, Hakizimana Adolphe ari kwitabwaho n'abaganga nyuma yo kugongana n'abakinnyi ba Rayon Sports ku mupira wari uhinduwe na Ganijuru.

19:26

63' APR FC ihushije uburyo bwiza

Djibril Ouattara atanze umupira Ganijuru Elie ukomereje hanze y'ikibuga. Rutahizamu wa APR FC arirukanse ahindura umupira urenze Kwizera ashaka Ruboneka, ku bw'amahirwe ya Rayon Sports ntiwajya kure y'umunyezamu wayo.

19:24

63' Gusimbuza

Denis Omedi na Memel Raouf Dao basimbuye Mugisha Gilbert na Hakim Kiwanuka ku ruhande rwa APR FC.

19:23

61' Ikarita y'umuhondo

Youssou Diagne ahawe ikarita y'umuhondo kubera kwitambika Hakizimana Adolohe wari ugiye gutera imbere umupira afashe uvuye kuri Ndayishimiye Richard.

19:22

60' Umukino urahagarara buri kanya

Ishimwe Claude 'Cucuri' arasifura buri kanya kubera amakosa atandukanye ari kubera mu kibuga.

Gusa hari ayo yakabaye yirengagiza.

19:18

56' Ikarita y'umuhondo

William Mel Togui ahawe ikarita y'umuhondo akiniye nabi Aziz Bassane mu kibuga cya Rayon Sports.

19:15

53' Uburyo bwa Rayon Sports

Faustin Likau Kitoko ateye umupira wo hasi mu izamu, ushyirwa muri koruneri na Hakizimana Adolphe.

Usubijwe mu kibuga, Adolphe yongera gutabara APR FC arawurenza.

19:13

50' Rayon Sports irarokotse

Tshimanga Ramazani atabaye Rayon Sports, ashyira muri koruneri umupira wari uhinduwe na Ouattara nyuma yo kuwutanga Kwizera Olivier wari wasohotse.

19:08

47' Uburyo bwa Rayon Sports

Tambwe Gloire ahinduye umupira ukozweho na Byiringiro, ugeze ku munyezamu Hakizimana Adolphe ananirwa kuwufata ujya muri koruneri itagize icyo itanga.

19:06

46' Ikaze mu gice cya kabiri

Rayon Sports yatangiranye umupira mu gice cya kabiri, Ndikumana Asman awusubiza inyuma kuri bagenzi be.

18:50

Igice cya mbere kirarangiye

Iminota 45 ibanza y'umukino w'Umunsi wa 29 wa Shampiyona uri guhuza Rayon Sports na APR FC, irangiye amakipe yombi anganya igitego 1-1.

18:49

45+2' Rulisa yihanangirije Haringingo


Haringingo Francis ntiyishimiye ko hadasifuwe ikosa ku mupira urengejwe na Bassane, akubita akantu Rulisa Patience mu nda.

Abatoza bungirije ba Rayon Sports bahise bitambika.

Haringingo asabye imbabazi Rulisa, undi amuha gasopo ya nyuma.

18:46

45' Iminota y'inyongera

Umusifuzi wa kane, Rulisa Patience yerekanye iminota ine y'inyongera.

Rayon Sports iri gusatira ishaka igitego cya kabiri.

18:44

43' Cucuri yanze gutanga ikarita itukura

Abakinnyi ba Rayon Sports n'aba APR FC basakiraniye hagati mu kibuga baterana ingumi, Cucuri akuramo ikarita itukura ariko ntawe ayihaye.

Bayisenge Emery winjiye mu kibuga ahawe ikarita y'umuhondo.

18:41

41' Igitego cya APR FC

Djibril Ouattara yishyuriye APR FC, atsinda neza penaliti.

Rayon Sports 1-1 APR FC.

18:40

39' Penaliti ya APR FC

Byiringiro Jean Gilbert agushijwe mu rubuga rw'amahina.

18:38

36' Coup-franc ya APR FC

Ishimwe Ganijuru akiniye nabi Ruboneka Bosco inyuma y'urubuga rw'amahina.

Ikosa rihanwe na Dauda Yussif, umupira ujya hejuru y'izamu.

18:37

36' Amafoto: Rayon Sports iyoboye umukino

18:35

34' Ganijuru akomewe amashyi

Ishimwe Elie Ganijuru akomewe amashyi menshi n'abafana ba Rayon Sports nyuma yo guserebeka akambura umupira Ruboneka Bosco wari muri contre-attaque.

18:32

32' Igitego cya Rayon Sports

Ndikumana Asman afunguye amazamu ku mupira unyuze hagati y'abakinnyi b'inyuma ba APR FC, atsindira Rayon Sports arobye Hakizimana Adolphe.

Rayon Sports 1-0 APR FC.

18:30

29' Coup-franc ya Rayon Sports

Byiringiro Jean Gilbert akiniye nabi Ndikumana Asman ahagana muri koruneri.

Ikosa rihanwe na Uwumukiza, umupira ukurwaho na Nshimiyimana Yunussu.

18:28

26' Rayon Sports iri gusatira

Uwumukiza Obed acomekewe umupira na Bassane, awutanga Niyomugabo Claude awutera hanze.

18:22

21' Rayon Sports yirangayeho

Nshimiyimana Yunussu ananiwe gukina umupira, usanga Tambwe Gloire uwinjiranye mu rubuga rw'amahina, ariko ananirwa kuroba umunyezamu Hakizimana Adolphe usohotse awufata neza, ariko baragongana.

Umunyezamu wa APR FC ari kwitabwaho n'abaganga.

18:19

17' APR FC na yo igerageje amahirwe

Dauda Yussif yongeye kugerageza uburyo bw'ishoti rya kure, ku ruhande rwa APR FC, umupira unyura ku ruhande gato.

18:18

16' Uburyo bwa Rayon Sports

Uwumukiza Obed agerageje ishoti ari inyuma y'urubuga rw'amahina, umupira ufatwa na Hakizimana Adolphe.

18:12

11' Uburyo bwa APR FC


Djibril Ouattara ananiwe kubyaza umusaruro umupira yari yinjiranye mu rubuga rw'amahina, awutakaza nyuma yo kunyerera, usanga Dauda Yussif uteye ishoti rijya ku ruhande.

18:11

10' Abafana bitabiriye


Nubwo Stade Amahoro ituzuye, ariko abafana bitabiriye ku bwinshi ku buryo harimo abagera kuri 80%.

18:08

7' Rayon Sports yirwanyeho


Mugisha Gilbert acitse Uwumukiza Obed, ahinduye umupira ashaka Ouattara, Togui na Ruboneka, ubwugarizi bwa Rayon Sports bwirwanaho bukiza izamu ryabwo.

18:07

5' Umukino wagabanyije umuvuduko


Nyuma yo gutangira abakinnyi bo ku mpande zombi bavuduka, kuri ubu Rayon Sports na APR FC zombi zatuje.

Umukino watangiye kujya uhagarara cyane kubera amakosa.

18:04

2' APR FC irarokotse

Rayon Sports iteye koruneri, umupira ushyirwaho umutwe na Abedi, ukurwamo na Adolphe, ariko hagaragazwa ko habayeho ikosa.

18:02

1' Coup-franc nziza ya Rayon Sports


Niyomugabo Claude ahagaritse Bassane agwa hanze y'ikibuga, ariko uyu Munya-Cameroun ukinira Rayon Sports ahita ahaguruka, amutanze umupira Kapiteni wa APR FC amukinira nabi inyuma gato y'urubuga rw'amahina mu ruhande.

Ikosa rihanwe na Ndayishimiye Richard, umupira ushyirwa muri koruneri na Hakizimana Adolphe usimbutse.

18:00

Umukino uratangiye

Ishimwe Jean Claude 'Cucuri' atangije umukino.

Umupira wa mbere utewe na Djibril Ouattara, awusubiza inyuma kuri bagenzi be.

17:58

Hafashwe umunota wo kwibuka

Mbere y'uko umukino utangira, abari muri Stade Amahoro bose bahagurutse bafata umunota wo kwibuka Abatutsi bishwe muri Jenoside yabaye mu 1994.

17:56

Abasifuzi b'umukino

Umukino urasifurwa na Ishimwe Jean Claude uza kuba ari mu kibuga hagati, mu mpande hari Ishimwe Didier na Ndayisaba Hamisi Saidi, mu gihe umusifuzi wa kane ari Rulisa Patience.

Komiseri w'umukino ni Sekamana Abdoul.

17:49

Akavura kabanje guha umugisha ubwatsi bw'i Remera


Imvura iringaniye iri kugwa i Remera mu gihe amakipe yombi ategerejwe mu kibuga ngo umukino utangire.

Bamwe mu bana bari bicaye ahagana hasi, bahisemo guhaguruka bajya inyuma aho amahuhwezi atabageraho.

17:47

Taleb yakoze impinduka imwe

Umutoza wa APR FC, Taleb Abderrahim, yakoze impinduka imwe ugereranyije n'ikipe yabanjemo ubwo baheruka gutsinda Mukura VS ibitego 3-0 mu cyumweru gishize.

Myugariro Nduwayo Alexis yasubije umwanya Nshimiyimana Yunussu utarakinnye icyo gihe kubera amakarita y'umuhondo.

Djibril Ouattara na William Togui barakina mu busatirizi, mu mpande hari Mugisha Gilbert na Hakim Kiwanuka mu gihe hagati hari Ruboneka Bosco na Dauda Yussif.

17:39

Haringingo yakoze impinduka ebyiri


Ugereranyije n'abakinnyi yari yabanje mu kibuga ubwo Rayon Sports yatsindaga Amagaju FC ibitego 2-0 mu cyumweru gishize, Haringingo Francis utoza iyi kipe yakoze impinduka ebyiri.

Nshimiyimana Emmanuel 'Kabange' watanze imipira ibiri yavuyemo ibyo bitego byombi, yasubije umwanya w'inyuma iburyo Uwumukiza Obed.

Ni mu gihe Mugisha Didier yasimbuwe na Aziz Bassane uvuye mu bihano by'imyitwarire mibi yari yafatiwe n'ikipe ye.

17:32

Uko APR FC yitwaye mu mikino itanu iheruka gukina

17:30

Amafoto: Umurindi w'abafana watangiye

Mu gihe abafana bategereje ko umukino utangira, batangiye kugaragaza umurindi wo gushyigikira amakipe yabo.

17:23

Niyigena Clement yabanje mu basimbura


Niyigena umaze iminsi afite imvune, ari mu bakinnyi babanje ku ntebe y'abasimbura ku ruhande rwa APR FC:

Ivan Ruhamyankiko
Alexis Nduwayo
Memel Dao Raouf
Mamadou Sy
Hakim Bugingo
Clement Niyigena
Pacifique Ngabonziza
Hadji Iraguha
Denis Omedi

17:21

Abasimbura ba Rayon Sports bose ni Abanyarwanda


Nyuma y'uko mu bakinnyi 11 babanza mu kibuga harimo abanyamahanga umunani, intebe y'abasimbura ba Rayon Sports igizwe n'Abanyarwanda gusa.

Aimable Ntagorama Ntarindwa
Emmanuel Nshimiyimana
Didier Mugisha
Yves Habimana
Emery Bayisenge
Fiston Ishimwe
Jesus Paul Sindi
Fabrice Nshimimana
Patrick Ishimwe

17:16

Abakinnyi ba APR FC babanje mu kibuga

Adolphe Hakizimana
Claude Niyomugabo (C)
Kiwanuka Hakim
Cheick Ouattara Djibril
Gilbert Mugisha
Abdoul Ishimwe
Jean Gilbert Byiringiro
Seidu Dauda Yussif
Jean Bosco Ruboneka
Yunusu Nshimiyimana
William Togui Mel

17:14

Abakinnyi ba Rayon Sports babanje mu kibuga

Olivier Kwizera
Diagne Youssou (C)
Obed Uwumukiza
Richard Ndayishimiye
Abedi Bigirimana
Faustin Likau Kitoko
Elie Ishimwe Ganijuru
Asman Ndikumana
Bassane Koulagna Aziz
Ramazani Tshimanga Tshilembi
Gloire Tambwe Ngongo

17:10

Uko imikino yabanje yarangiye


FT: Gicumbi FC 0-3 Al-Merrikh SC
FT: Musanze FC 0-0 Kiyovu Sports
FT: Etincelles FC 0-0 Amagaju FC

17:04

Uko Rayon Sports yitwaye mu mikino itanu iheruka gukina

16:48

Amafoto: Uko Amakipe yombi yageze kuri Stade Amahoro

16:43

Kera kabaye abakinnyi ba APR FC bageze ku kibuga


Saa 16:41 ni bwo abakinnyi ba APR FC binjiye mu kibuga kugira ngo barebe aho bakinira.

16:37

Rayon Sports yakwisubiza ikuzo muri Stade Amahoro cyangwa APR FC irakomeza kuganza?

Amateka y'imikino irenga 100 imaze guhuza amakipe yombi? Ntacyo yaba agiye kudufasha aka kanya dore ko benshi mu bakinnyi iyo mikino kuva mu 1995 bamanitse inkweto.

Reka turebe umusaruro wa Rayon Sports na APR FC mu mikino 10 iheruka kuzihuza:

APR FC 4-1 Rayon Sports (uheruka, FERWAFA Super Cup)
APR FC 3-0 Rayon Sports (Shampiyona)
APR FC 2-0 Rayon Sports (Peace Cup)
Rayon Sports 0-0 APR FC (Shampiyona)
APR FC 0-0 Rayon Sports (Shampiyona)
APR FC 0-0 Rayon Sports (Umuhuro mu Mahoro)
APR FC 0-3 Rayon Sports (FERWAFA Super Cup)
Rayon Sports 1-0 APR FC (Peace Cup)
Rayon Sports 1-0 APR FC (Shampiyona)
APR FC 1-0 Rayon Sports (Shampiyona)

16:22

Uko byifashe ku bindi bibuga

Kuri uyu wa Gatandatu, harakinwa imikino ine y'Umunsi wa 29 wa BK Pro League. Imikino itatu yo yamaze gutangira gukinwa igice cya kabiri, ndetse Etincelles FC iri kunganya n'Amagaju FC 0-0, Musanze FC iri kunganya na Kiyovu Sports FC 0-0, naho Gicumbi FC yatsinzwe na Al Merrikh igitego 1-0 cyashyizwemo na Gilles Razafimaro.

16:12

APR FC na yo yageze muri Stade Amahoro

Bamwe mu batoza ba APR FC bageze muri Stade Amahoro bareba uko imeze.

Abafana babo bahise bahaguruka barabakira.

Abakinnyi baracyategerejwe.

16:03

Rayon Sports yageze kuri Stade Amahoro

Abakinnyi n'abatoza ku ruhande rwa Rayon Sports bageze kuri Stade Amahoro ndetse banasura ikibuga baza gukiniramo.

16:01

Ihangana rya APR FC na Rayon Sports ryatangiriye hanze y’ikibuga

Guhangana hagati ya APR FC na Rayon Sports ku mukino ugiye kuzihuza mu masaha abiri ari imbere, byatangiriye hanze y’ikibuga by’umwihariko ku mbuga nkoranyambaga.

Mu mafoto atandukanye yagiye ashyirwa ku mbuga z'amakipe yombi, Rayon Sports yagaragazaga ko ari ikipe yivuguruye ndetse burya atari buno, dore ko inshuro nyinshi yakunze gutsindwa na APR FC.

Ni mu gihe Ikipe y'Ingabo z'Igihugu yo yerekanaga ko kuba yaratsinze mbere yakongera ikabisubiramo, yifashishije imbunda kuko ari ikipe y'Ingabo z'u Rwanda.

Abakinnyi ku mpande zombi na bo bagaragaje ko uyu mukino ari uwo gutsinda byanze bikunze, bashingiye ku cyizere bafite.



























16:00

Abatoza ba Rayon Sports bageze muri Stade Amahoro kare

Mu gihe amategeko asaba amakipe kugera kuri Stade byibuze mbere y'isaha imwe n'igice ngo umukino utangire, abatoza ba Rayon Sports bo babukereye.

Haringingo Francis n'abungiriza be binjiye mu kibuga cya Stade Amahoro Saa 15:54, bazenguruka mu bice byacyo byose bareba uko kimeze.

Bakiva mu kibuga ni bwo abakinnyi b'iyi kipe yakiriye umukino bacyinjiyemo Saa 15:59.

15:29

Umukino utegerejweho ubwitabire bw'abafana buri hejuru

Abashinzwe kumenyekanisha uyu mukino wa Rayon Sports na APR FC batangiye akazi mu byumweru bibiri bisize, abafana basabwa kuzuza Stade Amahoro ijyamo abantu ibihumbi 45.

Kugeza ubu ab'inkwakuzi yaba ku ruhande rw'Ikipe y'Ingabo z'Igihugu no ku ruhande rwa Gikundiro, batangiye kugera muri Stade bategereje ko amasaha y'umukino agera.

15:28

AMASHUSHO: Rayon Sports yakoze agashya izana igisope mbere yo kwakira APR

15:19

AMASHUSHO: Abafana ba APR FC na Rayon Sports bahiganye ubutwari mbere y'uko amakipe yombi acakirana

15:17

Derby yabanjiriwe n'igisope

Guhera Saa Cyenda, Dauphin Band yatangiye gususurutsa abari muri Stade Amahoro mu ndirimbo zitandukanye zirimo izo mu baturanyi, bimwe benshi bita Igisope.

15:06

Amafoto: Abafana ba Rayon Sports na APR FC batangiye kugera kuri Stade Amahoro


Mu gihe habura amasaha atatu ngo umukino uhuza Rayon Sorts na APR FC utangire, abafana bakomeje kugera kuri Stade.

Hari bake bahageze Saa 14:00, ariko kugeza ubu ntibara benshi muri Stade Amahoro.

14:34

Ikaze kuri Stade Amahoro


IGIHE ibahaye ikaze kuri Stade Amahoro i Remera, ahabera umukino w'Umunsi wa 29 wa BK Pro League uhuza Rayon Sports na APR FC.

Ni umukino w'abakeba, uhuza amakipe ahanganira ibikombe mu Rwanda.

APR FC iri ku mwanya wa kabiri muri Shampiyona y'u Rwanda n'amanota 55 mu gihe Rayon Sports iri ku wa kane n'amanota 47.

Gusa aya makipe yombi ni yo ahagaze neza mu makipe yo mu Rwanda kuko Shampiyona y'uyu mwaka irimo Al-Hilal na Al-Merrikh SC zo muri Sudani.

Umukino uratangira Saa 18:00.