Rayon Sports vs Bugesera FC

Rayon Sports 2-0 Bugesera FC

Uko umukino uri kugenda

Umwanditsi

: Eric Tony Ukurikiyimfura

Amafoto

: Umwari Sandrine

22:25

Wasili ati na Perezida wa Kiyovu ashaka kuza muri Rayon || Ndashaka guca agasuzuguro k'imibare

22:15

Ferdinand w'Umu-Rayon ahawe impano na Kapiteni Diagne || Ibyishimo biramusaze || Ibindi utamumenyeho

21:40

Ibyishimo by'Aba-Rayons bihoreje amarira kuri Bugesera || Kiyovu ni yo itahiwe

21:39

Amagambo Haringingo yabwiye Kwizera Olivier wahushije penaliti || Avuze ku mukino wa Kiyovu Sports

20:28

Rayon Sports yiyongereye amahirwe ku mwanya wa kabiri

Ibitego bya Ndikumana Asman na Aziz Bassane byafashije Rayon Sports gutsinda Bugesera FC 2-0, igira amanota 55 ku mwanya wa kane muri Shampiyona, ariko ikaba ku mwanya wa kabiri mu makipe yo mu Rwanda.

Iyi ntsinzi ibaye kwihorera kwiza kwa Gikundiro kuri Bugesera FC yari imaze iminsi yarayizengereje.

Ni intsinzi kandi yongereye amahirwe y'iyi kipe yambara ubururu n'umweru ku mwanya wa kabiri, mbere yo guhura na Kiyovu Sports mu mukino uzaba ari ishiraniro uzagena ikipe izakina CAF Confederation Cup 2026/27.

Uwo mukino uzaba ku wa Gatanu guhera Saa Moya.

Ikinyuranyo kiri hagati y'amakipe yombi ni amanota atatu gusa.

Bugesera FC izasoza Shampiyona yakirwa na Rutsiro FC, iri ku mwanya wa 10 n'amanota 41.

20:25

Umukino urarangiye

20:23

90+2' Ikarita y'umuhondo

Ndikumana Asman ahawe ikarita y'umuhondo akandagiye myugariro wa Bugesera FC.

20:20

90' Iminota itanu y'inyongera

Umusifuzi wa Kane, Dushimimana Eric, yerekanye iminota itanu y'inyongera.

Abafana ba Rayon Sports batangiye kubyina intsinzi.

20:19

89' Ubwo Bigirimana Abedi yavurwaga

20:19

88' Igitego cya kabiri cya Rayon Sports


Aziz Bassane Koulagna ashimangiye intsinzi ya Rayon Sports, atsinda igitego cya kabiri ku mupira acomekewe awugerana mu rubuga rw'amahina, atera ishoti rikomeye Daouda atabashije guhagarika.

Rayon Sports 2-0 Bugesera FC.

20:16

85' Uburyo bwiza bwa Rayon Sports


Sindi Paul Jesus ateye koruneri nziza, umupira usanga Tambwe Gloire usimbutse akawukina n'umutwe, ariko ujya hejuru gato y'izamu.

20:13

82' Kwizera atabaye Rayon Sports


Kwizera Olivier asohotse neza, akuramo umupira wari ucomekewe Clement John, uhinduwe na Rugangazi Prosper.

20:12

80' Uburyo Ndikumana Asman yatsinzemo igitego cya Rayon Sports

20:10

79' Gusimbuza

Mwisha Joel na Nshimirimana Darcy basimbuwe na Ishimwe Cedric na Rugangazi Prosper ku ruhande rwa Bugesera FC.

20:07

76' Umukino wari wongeye guhagarara

Kuri iyi nshuro ni Ndayishimiye Richard wari hasi ariko yahagurutse.

Uko bigaragara muri iyi minota ya nyuma, umukino uraza guhagarara kenshi.

20:05

75' Gusimbuza

Mugisha Didier na Tony Kitoga basimbuwe na Aziz Bassane na Sindi Paul Jesus ku ruhande rwa Rayon Sports.

Abedi Bigirimana asabye gusubira mu kibuga.

20:02

72' Umukino wahagaze

Abedi Bigirimana ari hasi, aho ari kwitabwaho n'abaganga.

Abatoza b'amakipe yombi baboneyeho gutanga izindi nama.

20:00

70' Umukino winjiye mu minota 20 ya nyuma


Icyizere ntikiraba cyinshi ku bafana ba Rayon Sports bari gusaba Umutoza Haringingo Francis gukora impinduka agakuramo Mugisha Didier.

19:57

66' Mbere y'uko igitego kiboneka, aba-Rayons bari bihebye

19:55

64' Coup-franc nziza ya Rayon Sports

Ndayishimiye Richard ateye coup-franc nziza ahana ikosa ryakorewe kuri Kabange, umupira ukinwa na Tambwe n'umutwe mbere y'uko ufatwa na Daouda Baleri.

19:53

62' Ikarita y'umuhondo

Clement John ahawe ikarita y'umuhondo akiniye nabi Kabange inyuma y'urubuga rw'amahina mu ruhande.

19:52

60' Bugesera FC yatangiye kwibona mu mukino


Nubwo yamaze gutsindwa igitego, Bugesera FC iri kugaragaza ko iri mu mukino kurusha uko byari bimeze mu gice cya mbere aho yakinaga irwana no gukiza izamu.

19:49

58' Igitego cya Rayon Sports


Ndikumana Asman afunguye amazamu i Nyamirambo, atsindira Rayon Sports ku mupira ateranye Ngendahimana mu rubuga rw'amahina.

Rayon Sports 1-0 Bugesera FC.

19:45

55' Abafana baratuje


Abafana bake ba Rayon Sports bitabiriye umukino, batuje kuko bategereje igitego kugeza n'ubu cyakomeje kubura.

19:39

48' Uburyo bwiza bwa Rayon Sports

Mugisha Didier yinjiranye umupira mu rubuga rw'amahina, ushyirwa muri koruneri na Daouda Baleri.

Uyu munyezamu yongeye gukuramo umupira wari usubijwemo na Asman Ndikumana, bagenzi be bahita bawusubiza muri koruneri.

19:35

46' Igice cya kabiri cyatangiye

Bugesera FC yatangiranye umupira mu gice cya kabiri, ariko ntiyawutindana, ufatwa na Rayon Sports.

19:20

Igice cya mbere kirarangiye


Igice cya mbere cy'umukino w'Umunsi wa 33 wa BK Pro League uri guhuza Rayon Sports na Bugesera FC kuri Kigali Pele Stadium, kirangiye amakipe yombi anganya ubusa ku busa.

19:17

43' Ubundi buryo bwa Rayon Sports

Tony Kitoga acomekeye umupira mwiza Mugisha Didier, acenga agana mu rubuga rw'amahina, atera ishoti rifashwe na Ibrahima Baleri.

19:10

37' Rayon Sports ihawe impano irinanirwa


Umunyezamu Ibrahima Baleri arasohotse akina umupira n'umutwe hanze y'urubuga rw'amahina, usanga Mugisha Didier awutera ku ruhande.

Uyu munyezamu wa Bugesera FC ari gutonganya bagenzi be kubera uburyo bari gukina nabi muri iyi minota.

19:08

35' Rayon Sports yananiwe kubyaza umusaruro uburyo iri kubona


Gikundiro yihariye umukino ndetse iri kugera mu rubuga rw'amahina rwa Bugesera FC inshuro nyinshi ariko Ndikumana Asman, Tambwe Gloire na Tony Kitoga bagowe no gutera mu izamu.

19:03

30' Amakipe yombi akomeje gushaka igitego

19:01

28' Rayon Sports yongeye kwirangaraho

Ndikumana Asman na none!

Uyu rutahizamu w'Umurundi ahawe umupira mwiza mu rubuga rw'amahina, awukoraho ujya imbere, agiye kuwutera mu izamu ukorwaho na Ngendahimana Eric.

18:55

23' Uburyo bwiza bwa Rayon Sports

Tambwe Gloire acomekewe umupira mwiza ujya imbere, na we awuha Ndikumana Asman uhindukiye atera ishoti rifashwe neza na Ibrahima Baleri.

18:54

21' Amakipe yombi ari guhuzaguruka


Kaneza Augustin atakaje umupira ufashwe na Tambwe Gloire, awushyira imbere y'izamu ashaka Asman, ariko uramurengana.

18:52

20' Umukino uhagaze gato


Bigirimana Abedi uryamye hasi, asabiwe kuvurwa.

18:51

18' Rayon Sports yirangayeho


Tony Kitoga yambuye umupira Iracyadukunda Eric, awinjirana mu rubuga rw'amahina, awuterekera Ndikumana Asman warebanaga n'izamu, ariko awutera hejuru.

18:50

16' Rayon Sports irarokotse

Clement John na Iracyadukunda Eric bagerageje imipira ibiri mu rubuga rw'amahina rwa Rayon Sports, ubwugarizi bwayo bwirwanaho.

Naibe yagaragazaga yakuruwe akabuzwa gukina umupira mu rubuga rw'amahina, ariko abasifuzi bakaryumaho.

18:45

13' Rayon Sports yambaye umweru n'ubururu, Bugesera FC yambara umukara

18:41

10' Abafana ni bake

Ubwitabire bw'abafana kuri uyu mukino wa Rayon Sports na Bugesera FC ni buke cyane kuri uyu mugoroba, aho bigoye kubara abantu 3000 muri Kigali Pele Stadium.

18:38

6' Gusatira kwa Rayon Sports

Ndikumana Asman ahawe umupira mwiza mu rubuga rw'amahina ari hagati ya ba myugariro ba Bugesera FC, agiye kuwutera awutangwa na Daouda Ibrahima Baleri.

18:37

5' Bugesera FC yari itunguranye

Akipseri Naibe yinjiranye umupira, acenga abakinnyi ba Rayon Sports awuha Nshimirimana Darcy winjiye mu rubuga rw'amahina, ariko ateye ishoti rifatwa na Kwizera Olivier.

18:34

3' Bugesera FC yirwanyeho


Tony Kitoga atanze umupira mwiza mu rubuga rw'amahina, Tambwe Gloire awuhindura utararenga, ushyirwa muri koruneri na Hirwa Jean de Dieu.

18:33

1' Uburyo bwa mbere ntacyo butanze

Ndayishimiye Richard utarakinnye umukino wa nyuma w'Igikombe cy'Amahoro, akinanye na Ishimwe Ganijuru Elie uri guhura na Bugesera FC yanyuzemo, ahindura umupira ashaka kuwuha Asman ariko ntiwamugeraho ujya hanze y'izamu.

18:32

Umukino watangiye

Umusifuzi Murindangabo Moise yatangije umukino.

Rayon Sports ni yo yatangiranye umupira, Ndikumana Asman awusubiza inyma kuri bagenzi be.

18:30

Hafashwe umunota wo Kwibuka


Mbere y'uko umukino utangira, abari muri Kigali Pele Stadium bafashe umunota wo kwibuka no guha icyubahiro Abatutsi bishwe muri Jenoside mu 1994.

18:23

Abakinnyi ba Bugesera FC babanje mu kibuga


Umutoza wa Bugesera FC, Banamwana Camarade, yahisemo gukoresha:

Ibrahima Daouda Baleri
Kaneza Augustin (C)
Isingizwe Rodrigue
Iracyadukunda Eric
Hirwa Jean De Dieu
Ingendahima?? Eric
Akipseri Naibe
Mwisha Bahunga Joel
Nshimirimana Darcy
Byishimo Valua
Clement John Naantuam

18:18

Umukino wa Bugesera FC waba impozamarira kuri Rayon Sports?

Gikundiro iheruka gutsindwa na APR FC ku mukino wa nyuma w'Igikombe cy'Amahoro, isoza umwaka w'imikino amara masa.

Kuri iyi nshuro, gutsinda uyu mukino byatuma Rayon Sports yigaranzura Bugesera FC ndetse ikishyira mu mwanya mwiza wo kuzakina CAF Confederation Cup ya 2026/27.

Ku rundi ruhande, Bugesera FC yategewe ibihumbi 100 Frw ku gutsinda uyu mukino, na yo ikumbuye intsinzi kuko iyiheruka itsinda Police FC igitego 1-0 ku wa 19 Mata.

18:13

Abakinnyi ba Rayon Sports babanje mu kibuga

Umutoza wa Rayon Sports, Haringingo Francis, yakoze impinduka eshatu ugereranyije n'ikipe yaherukaga kubanzamo kuri APR FC.

Abagiriwe icyizere ni:

Kwizera Olivier
Nshimiyimana Emmanuel 'Kabange'
Ishimwe Ganijuru Elie
Bayisenge Emery
Youssou Diagne (C)
Ndayishimiye Richard
Bigirimana Abedi
Tony Kitoga
Tambwe Gloire
Mugisha Didier
Ndikumana Asman

Abasimbura: Mugisha, Aimabe, Rushema, Yves, Fabrice, Jesus, Likau, Bassane na Obed.

17:52

Abavuga ko ari ikinamico batege amatwi | Ubu ndahumekera mu kwaha: Bekeni wanyagiye Gorilla FC 4-0

17:52

Etinclles FC yihererenye Gorilla FC iyinyagira ibitego 4-0

Mu mukino wabanje, Etincelles FC yashimangiye kuguma mu Cyiciro cya Mbere nyuma yo kunyagira Gorilla FC ibitego 4-0.

Iyi kipe y'i Rubavu yagize amanota 34 ku mwanya wa 14, irusha amanota atatu amakipe ari munsi y'umurongo utukura mu gihe hasigaye umukino umwe.

17:52

Etinclles FC yihererenye Gorilla FC iyinyagira ibitego 4-0


Mu mukino wabanje, Etincelles FC yiyongereye amahirwe yo kuguma mu Cyiciro cya Mbere nyuma yo kunyagira Gorilla FC ibitego 4-0.

Iyi kipe y'i Rubavu yagize amanota 34 ku mwanya wa 14, irusha amanota atatu amakipe ari munsi y'umurongo utukura mu gihe hasigaye umukino umwe.

17:45

Bugesera FC yananiye Rayon Sports


Muri iyi myaka itatu ishize, Bugesera FC yeretse Rayon Sports ko igomba kuyitondera.

Mu 2024, yayibujije gukina umukino wa nyuma w'Igikombe cy'Amahoro, iyisezerera mu 2024.

Mu 2025, Bugesera FC yabujije Rayon Sports gutwara Shampiyona, iyitsinda ibitego 2-1 mu mikino ya nyuma, aho uwo mukino wakurikiwe n'imvururu, uhagarara utarangiye, usozwa ku wundi munsi.

Mu mikino ibanza y'uyu mwaka w'imikino, Bugesera FC yatsinze Rayon Sports ibitego 2-1.

17:27

AMAFOTO: Abakinnyi ba Bugesera FC bageze kuri stade mbere yo guhura na Rayon Sports

17:05

Ikaze kuri Kigali Pelé Stadium

Umugoroba mwiza! IGIHE ibahaye ikaze kuri Kigali Pelé Stadium ahagiye kubera umukino w'Umunsi wa 33 wa Shampiyona y'u Rwanda uhuza Rayon Sports na Bugesera FC.

Ni umukino ukenewe cyane kuri Gikundiro igorwa no gukura intsinzi kuri iyi Kipe yo mu Karere ka Bugesera, kuko ari wo wayihesha amahirwe menshi yo kujya muri CAF Confederation Cup.

Umukino uratangira Saa 18:30.