Nyamata- Huye

Agace ka Kabiri: Nyamata- Huye
Isaha yo guhaguruka: Saa 12:00
Isaha yo gusoza: 15:43
Abasiganwa: 78
Intera: 134,6 Km

Umwanditsi : Eric Tony Ukurikiyimfura

Amafoto : Kwizera Remy Moses & Tour du Rwanda

Uko isiganwa riri kugenda

15:52

Monday, 02/23/26

Tour du Rwanda 2026 izakomereza i Rusizi


Tour du Rwanda ya 2026 izakomeza ku wa Kabiri, tariki ya 24 Gashyantare, hakinwa Agace ka Gatatu kazahagurukira i Huye Saa 11:00, kagasorezwa i Rusizi ku ntera y'ibilometero 145,3.

15:50

Monday, 02/23/26

Ikipe nziza yahembwe na Inyange Industries: Lotto- Groupe Wanty

15:49

Monday, 02/23/26

Umukinnyi wayoboye isiganwa igihe kirekire wahembwe na Ingufu Gin Ltd: Uwiduhaye Mike (Benediction Banafrica Team)

15:49

Monday, 02/23/26

Umunyarwanda mwiza mu isiganwa wahembwe na BPR Bank: Uwiduhaye Mike (Benediction Banafrica Team)

15:48

Monday, 02/23/26

Umunyafurika witwaye neza wahembwe na RwandAir: Henok Mulubrhan (Eritrea)

15:48

Monday, 02/23/26

Umunyafurika muto mwiza: Mewael Girmay (Istanbul Team)

15:47

Monday, 02/23/26

Umukinnyi wahize abandi mu kuzamuka: Miguel Heidemann (REMBE | rad-net)

15:47

Monday, 02/23/26

Umukinnyi muto witwaye neza mu isiganwa wahembwe na Prime Insurance: Hodei Munoz (Soudal Quick-Step Devo Team)

15:46

Monday, 02/23/26

Umukinnyi wahize abandi muri sprint wahembwe na BRD: Miguel Heidemann (REMBE | rad-net)

15:45

Monday, 02/23/26

Umukinnyi wambaye umwambaro w'umuhondo wahembwe na Visit Rwanda: Marti Pau (NSN Development Team)

15:45

Monday, 02/23/26

Umukinnyi wegukanye Agace ka Kabiri ka Tour du Rwanda 2026 wahembwe na Amstel: Marti Pau (NSN Development Team)

15:37

Monday, 02/23/26

Marti Pau yambaye umwambaro w'umuhondo

Umunya-Espagne Marti Soriano Pau w'Ikipe ya NSN Devo Team ni we wambaye umwambaro w'umuhondo nyuma y'Agace ka Kabiri ka Tour du Rwanda 2026 kasorejwe i Huye.

Marti awambuye Itamar Einhorn bakinana, kubera amasegonda 10 yabonye kuri "sprint" yo ku murongo imbere y'Imberabyombi i Huye.

Itamar ntiyaje mu bakinnyi 40 ba mbere ndetse kugeza kuri uwo mwanya, umukinnyi waho yarushwaga amasegonda 11 na Marti Pau mu bihe bisanzwe.



15:26

Monday, 02/23/26

Abakinnyi 10 ba mbere mu Gace ka Nyamata- Huye

1. Marti Soriano Pau (NSN Development Team): 3:10:10.30
2. Mulueberhan Henok (Eritrea): 3:10:10.32
3. Cuylits Mauro (Lotto-Groupe Wanty): 3:10:10.43
4. Muñoz Gabiña Hodei (Soudal Quick-Step Devo Team): 3:10:10.73
5. Van Gils Lucas (Lotto-Groupe Wanty): 3:10:10.84
6. Thompson Reuben (Lotto-Groupe Wanty): 3:10:10.86
7. Pareta Sala Roger (Movistar Team Academy): 3:10:10.91
8. Boos Benjamin (REMBE | Rad-Net): 3:10:10.93
9. Desta Teweldemedhn Amaniel (Team Amani): 3:10:10.96
10. Bush Jacob (Development Team Picnic POSTNL: 3:10:11.05
.
.
.
20. Nsengiyumva Shemu (Team Rwanda): 1"
30. Byukusenge Patrick (Team Rwanda): +8"
31. Mugisha Moise (Benediction): +9"
32. Manizabayo Eric (Benediction): 9"
36. Ngendahayo Jeremie (May Stars): +10"

15:21

Monday, 02/23/26

Pau Martí yegukanye Agace ka Kabiri ka Tour du Rwanda 2026

Umunya-Espagne Pau Martí w'imyaka 21, ukinira Ikipe ya NSN Devo Team, yegukanye Agace ka Kabiri ka Tour du Rwanda 2026, kahagurukiye i Nyamata kagasorezwa i Huye ku ntera y'ibilometero 134,6.

Ni intsinzi ya kabiri yikurikiranya kuri NSN nyuma y'uko Itamar Einhorn yari yatsinze agace ka Rukomo- Rwamagana ku Cyumweru.

15:10

Monday, 02/23/26

Soudal Quick-Step na NSN zigiye imbere

Abakinnyi batangiye gutegura uburyo bakoramo 'sprint' isoza mu gihe hasigaye ibilometero bibiri gusa.

15:09

Monday, 02/23/26

Hasigaye ibilometero bitanu gusa


Eritrea iracyari imbere mu gihe abakinnyi bari gusatira kwinjira mu Mujyi wa Huye.

15:04

Monday, 02/23/26

Ubu abakinnyi bose bari hamwe

Igikundi gifashe abakinnyi batatu bari imbere kuva i Nyamata, none ubu bose bari kugendera hamwe bayobowe na Eritrea.

15:02

Monday, 02/23/26

Ku Mberabyombi habitse amasegonda 10

Umukinnyi ugera mbere i Huye (ari na we utsinda), arabona amasegonda 10, uwa kabiri atandatu, uwa gatatu ane.

Isiganwa ryinjiye mu bilometero 10 bya nyuma.

Eritrea ni yo iyoboye igikundi.

15:00

Monday, 02/23/26

Hasigayemo amasegonda 10 gusa

Igikundi cyongereye umuvuduko n'imbaraga cyasatiriye abakinnyi batatu bari imbere ari bo Heidemann (Rembe), Martins (Localiza) na Erasmus (Tshenolo).

14:57

Monday, 02/23/26

Ikinyuranyo cyagabanyutse cyane


Kuri ubu hasigayemo amasegonda 25 gusa hagati y'abakinnyi batatu bari imbere n'igikundi.

14:56

Monday, 02/23/26

Abasiganwa beretswe urukundo rudasanzwe muri Nyanza

14:53

Monday, 02/23/26

Eritrea yagiye imbere

Ikipe ya Eritrea yagiye imbere iyobora igikundi, ndetse yatangiye gutegura 'sprint' ibera i Huye mu Mujyi.

Iyi kipe ni yo irimo Merhawi Kudus watsindiye i Huye mu 2019 na Henok Mulubrhan.

Kuri ubu ikinyuranyo ni amasegonda 50 gusa.

14:50

Monday, 02/23/26

Isiganwa ryinjiye mu bilometero 20 bya nyuma


Igikundi kiyobowe n'Ikipe ya NSN Devo Team ya Itamar Einhorn wambaye umwambaro w'umuhondo.

Iyi kip iri gukurana imbaraga aho kugeza ubu hasigayemo umunota hagati yabo n'abakinnyi batatu bari imbere.

14:47

Monday, 02/23/26

Heidmann yegukanye amanota ya Sprint ya Kabiri


Ni amanota yatangiwe i Nyanza, ku kilometero cya 99.

1. Heidemann
2. Erasmus
3. Martins

Umukinnyi wa mbere yungutse amasegonda atatu, uwa kabiri abiri naho uwa gatatu rimwe, aho aza gukurwa ku bihe bakoresha mu isiganwa ry'uyu munsi.

N'ubundi ni uku bari bakurikiranye ku Ruhuha, bivuze ko ubu Heidemann yamaze kwibikaho amasegonda atandatu, Erasmus ane naho Martins yazigamye amasegonda abiri.

14:42

Monday, 02/23/26

Hasigaye ibilometero 25

Abakinnyi batatu bari imbere basize igikundi umunota n'amasegonda 30.

14:39

Monday, 02/23/26

Agace ka Kabiri ka Tour du Rwanda 2026 karasorezwa i Huye, mu Mujyi ubumbatiye umuco n’uburezi by’u Rwanda


Iyo uvuze Akarere ka Huye, benshi bumva vuba i Butare ku gicumbi cy’uburezi n’umuco. Ni kamwe mu turere umunani tugize Intara y’Amajyepfo, kakaba kagizwe n’imirenge 14 iri ku buso bwa kilometero kare 581.5, umujyi wako ni umwe mu yunganira Umurwa Mukuru Kigali.

Ubuhinzi, ubworozi, ubukerarugendo, ubucuruzi n’inganda, ni wo musingi w’ubukungu bwa Huye. Ikawa ya Maraba, yabaye ikimenyabose ku ruhando mpuzamahanga ikomoka muri aka karere. Ku bakunda ibyiza by’u Rwanda bizihirwa cyane iyo batashye ingoro ndangamurage y’Imibereho y’Abanyarwanda, Ibisi bya Huye, Ishyamba ry’Arboretum n’ibindi.

Kuvuga ko mu Karere ka Huye hari igicumbi cy’uburezi si amakabyankuru kuko ari ho hatangiriye Kaminuza ya mbere yageze mu Rwanda, yahoze yitwa UNR, ubu ni Kaminuza y’u Rwanda. Aka karere kabarizwamo amashuri yisumbuye arenga 50 n’amashuri abanza asaga 100.

Akarere ka Huye ntigasigara inyuma mu muvuduko w’iterambere igihugu kirimo yaba mu mibereho myiza y’abaturage, ubuhinzi, ubucuruzi, inganda n’ibindi.

Umujyi wa Huye ni umwe muri itandatu yatoranyijwe ngo yunganire Umujyi wa Kigali. Ufite ibikorwa bitandukanye by’ubucuruzi, ibyo abikorera barimo kubaka, gare igezweho, amasoko agezweho yubatswe n’abikorera, ibikorwa remezo cyane cyane imihanda ya kaburimbo igenda ikorwa muri uyu mujyi.

Akarere ka Huye kazwiho guhinga Kawa ndetse buri mwaka hongerwa ubuso ihinzeho no gusarura izishaje.

14:26

Monday, 02/23/26

Martins yegukanye amanota y'Umusozi wa Kabiri


Ni amanota yatangiwe i Gasoro ku kilometero cya 96,3.

1. Martins
2. Heidemann
3. Erasmus

14:15

Monday, 02/23/26

Abakinnyi b'Abanyarwanda bari hagati mu gikundi


Nyuma y'ibilometero 90 bimaze gukorwa, igikundi cyasizwe iminota ibiri n'amasegonda 30.

14:04

Monday, 02/23/26

Heidemann yegukanye amanota y'Umusozi wa Mbere

Ni amanota yatangiwe i Nyamiyaga ku kilometero cya 83,9.

1. Heidemann
2. Martins
3. Erasmus

13:58

Monday, 02/23/26

Ubwo abakinnyi batatu bari imbere banyuraga ku Kiraro cya Rwabusoro


Heidemann (Rembe), Martins (Localiza) na Erasmus (Tshenolo) ni bo bakiyoboye isiganwa.

Nyuma y'ibilometero 77, ikinyuranyo kiri hagati yabo n'igikundi ni iminota ibiri n'amasegonda 10.

13:50

Monday, 02/23/26

Tour du Rwanda si amagare gusa!


Kimwe mu byo Tour du Rwanda isigira igihugu ni ukumenyekanisha ibyiza nyaburanga bigitatse cyangwa ibyerekana amateka yacyo.

Nko mu Gace ka Kabiri ka Tour du Rwanda 2026, abasiganwa bari kunyura mu Karere ka Nyanza ahafatwa nko ku gicumbi cy’umuco.

Nyanza ni Umujyi uheruka kwizihiza imyaka 125. Kuva mu 1899 habaye Umurwa Mukuru w’ubwami ku Ngoma y’Umwami Yuhi V Musinga ubwo yatoranyaga umusozi wa Gakenyeri nk’ahagomba kuba ingoro ye, avuye ku Kamonyi. Byabaye nk’ihame ku bami bamukurikiye bituma na bo bubaka ingoro zabo i Nyanza.

Ako gace ni ko kubatsemo ingoro ya Mutara III Rudahigwa mu Rukari n’ingoro ya Kigeli V Ndahindurwa ku Bigega, aho yabaye kugeza mu 1960. Ni agace kuri ubu katejwe imbere, karavugururwa ndetse Guverinoma yiyemeje kugaha umwihariko mu bukerarugendo bushingiye ku muco.

Aha muri Nyanza ni ho hari Ingoro y'Amateka y'Abami n’iyo Kwigira kw'Abanyarwanda, aho abazisuye basobanurirwa amateka yimbitse y’Abanyarwanda.

13:44

Monday, 02/23/26

Abafana bo mu Bugesera bari bihariye

13:30

Monday, 02/23/26

Ikinyuranyo gikomeje kugabanuka

Mu gihe abakinnyi bamaze kugenda ibilometero 61, intera isigayemo hagati y'abakinnyi batatu bari imbere n'igikundi ni iminota ibiri.

13:21

Monday, 02/23/26

Heidmann yegukanye amanota n'amasegonda ya Sprint ya Mbere


Ni amanota yatangiwe ku Ruhuha, ku kilometero cya 53,4.

1. Heidemann
2. Erasmus
3. Martins

Umukinnyi wa mbere yungutse amasegonda atatu, uwa kabiri abiri naho uwa gatatu rimwe, aho aza gukurwa ku bihe bakoresha mu isiganwa ry'uyu munsi.

13:11

Monday, 02/23/26

Ikinyuranyo cyatangiye kugabanyuka

Ku kilometero cya 45 i Murago, intera iri hagati y'abakinnyi batatu bari imbere n'igikundi ni iminota ibiri n'amasegonda 30 gusa.

13:09

Monday, 02/23/26

Uwiduhaye Mike afite icyizere ko Abanyarwanda bakwitwara neza i Huye



13:01

Monday, 02/23/26

Eritrea na NSN zafatanyije kuyobora igikundi

Mu gihe abakinnyi bakiri mu muhanda Kibugabuga berekeza ku Ruhuha, harimo ikinyuramo cy'iminota ibiri n'amasegonda 45.

NSN Devo Team ya Itamar na Eritrea ni zo ziri imbere mu gikundi.

12:50

Monday, 02/23/26

Amstel yateguje ibirori bidasanzwe i Huye


Uruganda rwenga ibinyobwa bisembuye n’ibidasembuye, Bralirwa Plc, rubinyujije mu kinyobwa cyarwo Amstel, rwitabiriye Tour du Rwanda ku nshuro ya gatandatu.

Muri iri siganwa, uru ruganda ruba rususurutsa abaryitabiriye binyuze mu bitaramo bitandukanye rutegura.

Ni rwo kandi ruhemba umukinnyi wegukanye isiganwa ry'umunsi.

Muri uyu mwaka, ibitaramo bya "After party" bizakorerwa i Musanze, Rubavu, Huye ndetse n’i Kigali.

Muri buri gitaramo kandi Amstel izajya ihemba igare rimwe ku mufana wahize abandi.

Si ibyo gusa kuko mu isiganwa ryo kwishimisha rizwi nka ‘social ride’ rikorwa n’abafana batandukanye, iki kinyobwa kizahemba amagare abiri ku munsi.

Iyi ‘social ride’ iteganyijwe tariki ya 26 Gashyantare 2026 i Rubavu n’i Kigali ku munsi wa nyuma tariki ya 1 Werurwe 2026.

I Huye, kuri uyu wa Mbere, Amstel yateguye "after party" ibera muri The Nova Lounge.

12:42

Monday, 02/23/26

Ikinyuranyo kirasatira iminota itatu

Heidemann, Martins na Erasmus bayoboye isiganwa, basize igikundi iminota ibiri n'amasegonda 50 nyuma y'ibilometero 27.

12:33

Monday, 02/23/26

Intera yiyongereye


Nyuma y'ibilometero 20 bimaze gukorwa, igikundi cyasizwe iminota ibiri n'amasegonda 20.

12:31

Monday, 02/23/26

NSN iyoboye igikundi


Ikipe ya NSN Devo Team ikinamo Itamar Einhorn wambaye umwambaro w'umuhondo, ni yo iri imbere mu gikundi cyasizwe iminota ibiri nyuma y'ibilometero 18 bimaze gukorwa.

Isiganwa riri gusatira i Ramiro.

12:29

Monday, 02/23/26

Kuri uyu wa Mbere haratangwa amanota ya 'bonifications'


Nk'uko byagenze mu Gace ka Mbere ka Tour du Rwanda 2026, no kuri uyu wa Mbere haratangwa amanota ya 'sprint' mu muhanda.

Birakorerwa ku Ruhuha, i Nyanza n'i Huye.

Ku Ruhuha n'i Nyanza; umukinnyi uhagera mbere arabona amasegonda atatu, uwa kabiri abiri, uwa gatatu rimwe.

Ni mu gihe ugera mbere i Huye (ari na we utsinda), arabona amasegonda 10, uwa kabiri atandatu, uwa gatatu ane.

12:25

Monday, 02/23/26

Uwiduhaye yafashwe n'igikundi


Uwiduhaye yafashwe n'igikundi cyasizwe umunota n'amasegonda 40 n'abakinnyi batatu bari imbere ari bo Heidemann, Martins na Erasmus kuri ubu bamaze kugenda ibilometero 14.

12:24

Monday, 02/23/26

Abakunzi b'umukino w'amagare ni benshi ku mihanda mu Bugesera

12:22

Monday, 02/23/26

Intera yiyongereye


Muri Mbyo, ku kilometero cya 12, Uwiduhaye yasigaye umunota n'amasegonda 15 mu gihe igikundi cyasizwe umunota n'amasegonda 30.

12:19

Monday, 02/23/26

Uwiduhaye yakurikiye abakinnyi bari imbere


Uwiduhaye Mike wa Benediction Banafrica Team yasizwe amasegonda 40 n'abakinnyi batatu bari imbere.

Ni mu gihe igikundi cyasigaye umunota n'amasegonda 15 nyuma y'ibilometero icyenda bimaze gukorwa.

12:17

Monday, 02/23/26

Imbere hari abakinnyi batatu

Ku kilometero cya gatanu, abakinnyi batatu bavuye mu gikundi bayobora isiganwa.

Abo ni Heidemann (Rembe), Martins (Localiza) na Erasmus (Tshenolo). Bashyizemo amasegonda 25 hagati yabo n'igikundi.

12:10

Monday, 02/23/26

Abakinnyi batanu bari bashatse gucomoka

Mu bilometero bya mbere, abakinnyi batanu bashatse kuva mu gikundi ngo bagende imbere, ariko Ikipe ya NSN Devo Team iri imbere mu gikundi ihita ibagarura.

Abo bakinnyi ni Heidemann (Rembe), Nkundabera Eric ( Team Rwanda), Uwiduhaye Mike (Benediction), Martins na Sousa (Localiza) aho bari bashyizemo amasegonda 10.

12:07

Monday, 02/23/26

Isiganwa nyakuri ryatangiye


Abakinnyi batangiye gukina intera y'ibilometero 134,6 mu muhanda wa Nyamata-Huye, guhera ku muhanda werekeza kuri Stade ya Bugesera.

Ni umuhanda wiganjemo gutambika no kumanuka.

12:03

Monday, 02/23/26

Agace ka Kabiri ka Tour du Rwanda 2026 karatangiye

Abakinnyi bahagurutse imbere y'Ibiro by'Akarere ka Bugesera i Nyamata.

Bagiye kubanza gukora intera ya kilometero, batangire kubarirwa ibihe bagenze ku muhanda ugana kuri Stade ya Bugesera.

11:59

Monday, 02/23/26

Amafoto y'abakinnyi bishyushya mbere yo gutangira isiganwa

11:57

Monday, 02/23/26

Abakinnyi 78 ni bo bitezwe kuri uyu wa Mbere


Abakinnyi batandatu ni bo bavuye mu isiganwa ku Cyumweru nyuma y'uko bane barivuyemo hagati, undi akaza atinze.

Ni mu gihe Dawit Teweldebrhan wa May Stars yakuwe mu irushanwa kubera gufata ku modoka y'ikipe, ibyatumye n'umutoza we ahagarikwa kudatoza kuri uyu wa Mbere.

11:39

Monday, 02/23/26

Abanyarwanda bafite icyizere

Nyuma y'Agace ka Mbere kasorejwe i Rwamagana muri 'sprint', Umutoza wa Team Rwanda, Sempoma Felix, yavuze ko bafite amahirwe yo kwitwara neza.

Ati "Etape ya Nyamata- Huye na bwo azaba ari amahirwe menshi, 90% ko izarangira ari kuri 'sprint'. Na bwo tuzongera tugerageze turebe ko twatsinda kuri sprint."


Yongeyeho ati "Icyo nabwira Abanyarwanda ni uko abakinnyi b'Abanyarwanda baritoje, bafite imbaraga, amahirwe yo gutsinda 'etape' turayafite ndetse iyo hatarajyamo ibihe binini n'ayo gutwara 'maillot jaune' byose biba bigishoboka. Etape ya Moise tuyiheruka kera cyane, ariko buri mwaka turahatana kandi byanze bikunze tuzabigeraho."

Muri Tour du Rwanda 2026 harimo abakinnyi 14 b'Abanyarwanda bangana n'Abanya-Eritrea.

11:08

Monday, 02/23/26

AMASHUSHO: Umva ibyo kwitega mu Gace ka Kabiri ka Tour du Rwanda 2026


11:03

Monday, 02/23/26

Etape ya Kabiri ya Tour du Rwanda igiye gutangirira i Nyamata

Ku nshuro ya karindwi kuva mu 2015, Tour du Rwanda igiye kunyura i Nyamata, mu Karere ka Bugesera.

Ni mu gihe ari inshuro ya kane hatangiriye isiganwa ry'iri rushanwa riri kuba ku nshuro ya 18 kuva ribaye mpuzamahanga mu 2009.

Ubwa mbere byari mu 2017 ubwo hakinwaga Agace ka Nyamata-Rwamagana kegukanywe n'Umunyarwanda Uwizeyimana Bonaventure.

Akarere ka Bugesera kari mu bilometero nka 15 uvuye mu Mujyi wa Kigali kakagira Imirenge 15 irimo itatu ifatwa nk’igize igice cy’Umujyi.

Iyo mirenge irimo Ntarama urasukiramo ugisohoka mu wa Gahanga w’Akarere ka Kicukiro ku ruhande rw’Umujyi wa Kigali. Ntarama yaganwe na benshi bashaka aho gutura no gushora imari kandi n’ubu ni ko bikimeze nubwo ubutaka bwaho bwihagazeho.

Umurenge wa Ntarama uhana imbibi n’uwa Nyamata na wo w’Umujyi ukaba ari na wo urimo ibikorwa byinshi by’ubucuruzi, Ibitaro bya Nyamata, Ibigo by’imari, aho abagenzi bategera imodoka, isoko n’ibindi. Ni na wo wubatsemo ibiro by’akarere.

Undi murenge w’umujyi ni Mayange nubwo ufite ubuso bunini budatuwe bwiganjemo ibikorwa by’ubuhinzi ndetse hakaba hakenewe abashoramari bo muri urwo rwego.

10:51

Monday, 02/23/26

Abakinnyi 10 ba mbere ku rutonde rusange nyuma y'Agace ka Mbere


1. Itamar Einhorn (NSN Development Team): 3h59'54"
2. Hodei Munoz (Soudal Quick-Step Devo Team) " + 04"
3. Henrique Da Silva Avancini (Localiza Meoo/ Swift Pro Cycling): "
4. Mewael Girmay (Istanbul Team): +06"
5. Miguel Heidemann (REMBE | rad-net):
6. Pau Marti (NSN Development Team): +09"
7. Uwiduhaye Mike (Benediction Banafrica Team):
8. Christiaan van Rees (Development Team Picnic PostNL): +10"
9. Henok Mulubrhan (Eritrea):
10. Mauro Cuylits (Lotto - Groupe Wanty):


Kugeza ku mwanya wa 70, abandi bose banganya ibihe n’umukinnyi wa munani.

10:49

Monday, 02/23/26

Ikaze mu Gace ka Kabiri ka Tour du Rwanda 2026


Tubahaye ikaze na none mu isiganwa mpuzamahanga rizenguruka u Rwanda mu mukino wo gusiganwa ku magare "Tour du Rwanda 2026", rigiye gukomeza kuri uyu wa Mbere hakinwa umunsi waryo wa kabiri, mu Gace ka Kabiri gahagurukira mu i Nyamata kerekeza i Huye ku ntera y'ibilometero 134,6.

- Etape 2: Nyamata- Huye
-Intera: Kilometero 134,6
-Isaha yo guhaguruka: Saa 12:00
-Isaha yo gusoza: Hagati ya Saa 15:12 na 15:43